06/10/2025
एडिलेडमा बढ्दै गएको ‘नेटवर्किङ व्यवसाय’को प्रलोभन: नयाँ विद्यार्थीहरू सतर्क रहनुहोस्!
हाल एडिलेडमा अध्ययनका लागि आएका नयाँ विद्यार्थीहरूबीच ‘नेटवर्किङ व्यवसाय’ (networking business) वा तथाकथित ‘independent business’ योजनाबाट प्रभावित हुने घटनाहरू तीव्र रूपमा बढिरहेका छन्।
Adelaide Nepal र Adelaide Ma Nepali जस्ता सामाजिक समूहहरूमा पछिल्लो समय यस विषयमा गुनासो र सचेतना सन्देशहरू लगातार देखिन थालेका छन्।
एक नयाँ विद्यार्थीले आफ्नो अनुभव सुनाउँदै भनेका छन्:
“म सबै नयाँ आगन्तुकहरूलाई सचेत गराउन चाहन्छु। कृपया अत्यधिक सहयोगी र सधैं सकारात्मक देखिने केही व्यक्तिहरूबाट सावधान रहनुहोस्। धेरैजसो यस्ता मानिसहरू नेटवर्किङ वा तथाकथित ‘स्वतन्त्र व्यवसाय’मा संलग्न हुन्छन्।”
उनका अनुसार,
“सुरुमा उनीहरू काम खोज्न सहयोग गर्ने नाटक गर्छन्, अनि ट्रेक, पिकनिक वा हाइकमा बोलाएर नजिक सम्बन्ध बनाउन खोज्छन्। पछि उनीहरूले ‘व्यवसाय अवसर’को कुरा निकाल्छन् र महँगो सामान खरिद वा सदस्यता लिन दबाब दिन थाल्छन्। उनीहरूले आर्थिक स्वतन्त्रता, चाँडो रिटायरमेन्ट, र spare time मा पैसा कमाउने कुरा गरेर आकर्षित गर्छन् — जुन उनीहरूको भर्ती रणनीति हो।”
यसरी नयाँ विद्यार्थीहरूलाई विश्वास दिलाएर आर्थिक रूपमा फसाउने र भ्रममा पार्ने यस्तो प्रवृत्ति दिनानुदिन बढ्दै गएको छ।
सामाजिक सञ्जालमा धेरैले यस्ता योजनाबाट जोगिन र अरूलाई सचेत गराउन आह्वान गरेका छन्।
एडिलेडमा विगत लामो समयदेखि स्थायी रूपमा बसोबास गर्दै आएका नेपाली समुदायका सामाजिक अभियन्ता तथा पेशाले Registered Nurse गोविन्द रानाका अनुसार —
“यहाँ मेहनत नगरी धेरै पैसा कमाउन सकिँदैन, there is no easy money, त्यसैले यस्ता प्रलोभनमा नपर्न सबैमा आग्रह गर्दछु।”
यसै विषयमा NRNA South Australia Youth Coordinator संगम पाण्डेले पनि नयाँ विद्यार्थीहरूलाई चेतावनी दिँदै भनेका छन् —
“कृपया यस्ता भ्रामक ‘नेटवर्किङ व्यवसाय’ वा सजिलो कमाइका प्रस्तावमा विश्वास नगर्नुहोस्। यदि कसैले यस्ता कुरा गर्छ भने मलाई वा हाम्रो टोलीलाई तुरुन्त जानकारी दिनुहोस्।”
उनले थपे —
“NRNA SA छिट्टै नयाँ विद्यार्थीहरूका लागि केही उपयोगी र सकारात्मक गतिविधिहरू ल्याउने तयारीमा छ, जसले नयाँ आगन्तुकहरूलाई समुदायमा सहज रूपमा घुलमिल हुन सहयोग पुर्याउनेछ।”
सबैलाई पुनः अनुरोध गर्दछौ, साँचो मेहनत र इमानदारीले मात्रै सफलता सम्भव हुन्छ। यस्ता प्रलोभन र मीठा बोलीमा नफसी, सचेत र जागरुक रहौं।
