20/07/2025
عرب ٹائمز کے مطابق کویت میں کسٹمز کی جنرل ایڈمنسٹریشن نے ملک کے بین الاقوامی ہوائی اڈے پر نقدی، سونا اور دیگر قیمتی اشیا لانے اور لے جانے والے مسافروں کے لیے نئے قوانین وضع کیے ہیں۔
رپورٹ کے مطابق نئے کسٹمز قوانین کے تحت کویت میں داخل ہونے یا باہر جانے والے مسافروں کے پاس 3 ہزار کویتی دینار یا اس سے زیادہ رقم ہونی چاہیے۔ چاہے وہ مقامی کرنسی میں ہو یا غیر ملکی کرنسی میں۔
مسافروں کو نقدی کے علاوہ ان کے پاس موجود سونا کسی بھی شکل میں (بشمول زیورات، سکے، بلاکس) کے ساتھ دیگر پرتعیش اشیا مثلاً گھڑیاں، الیکٹرونکس مصنوعات، قیمتی ذاتی سامان سے بھی ایئرپورٹ عملے کو آگاہ کرنا ہوگا۔
مذکورہ اشیا مسافر دستی سامان میں لے جا سکتے ہیں، تاہم ملکیت کے ثبوت کے طور پر رسیدیں ان کے پاس ہونی چاہئیں۔ اس کے علاوہ کویت سے روانہ ہونے والے مسافروں کو ملک چھوڑنے سے قبل کسٹم ڈیکلریشن مکمل کرنا ہوگا۔
کویت آنے والے مسافروں کو بھی اپنے قیمتی سامان سے متعلق ایک مکمل ڈیکلریشن فارم اور معاون رسیدیں کسٹم حکام کو پیش کرنا ہوں گی۔
کویتی حکام کا کہنا ہے کہ کسٹمز سے متعلق نظر ثانی شدہ قوانین سرحدی حفاظت کو سخت کرنے، سامان اور مسافروں کی قانونی اور شفاف نقل وحرکت کو فروغ دینے کی وسیع تر کوششوں کا حصہ اور بین الاقوامی معیار کی تعمیل کو یقینی بنانا ہے۔
تاہم اس کے ساتھ ہی کویت کسٹمز حکامنے متنبہ کیا ہے کہ مطلوبہ اشیا ظاہر نہ کرنے پر کسٹم حکام کی طرف سے اس سامان کی ضبطگی، قانونی کارروائی، جرمانہ حتیٰ کہ گرفتاری بھی ہو سکتی ہے۔
متعلقہ حکام نے مشورہ دیا ہے کہ جرمانے اور سزا سے بچنے کے لیے مسافر کویت روانگی سے قبل یا پہنچنے کے فوری بعد تمام ضروری کسٹم ڈیکلریشنز کو مکمل کر لیں۔
