02/06/2026
اپر چترال اور لوئر چترال کے عوام ٹرانسپورٹ مافیا کے رحم و کرم پر، ضلعی انتظامیہ فوری نوٹس لے
ضلع چترال اپر و لوئر کے عوام ایک طویل عرصے سے ٹرانسپورٹ کے شعبے میں سنگین مشکلات کا سامنا کر رہے ہیں۔ چترال سے پشاور، دیر، ملاکنڈ اور دیگر اضلاع جانے والی مسافر گاڑیوں کے بعض مالکان اور ڈرائیور حضرات اپنی مرضی کے مطابق کرایے وصول کر رہے ہیں، جس کی وجہ سے عام شہری، طلبہ، مریض، سرکاری و نجی ملازمین اور مزدور طبقہ شدید ذہنی اور مالی پریشانیوں میں مبتلا ہے۔
مہنگائی کے اس دور میں جہاں عوام پہلے ہی بے شمار معاشی مسائل کا شکار ہیں، وہاں ٹرانسپورٹ کرایوں میں بلاجواز اور من مانا اضافہ عوام کے زخموں پر نمک چھڑکنے کے مترادف ہے۔ افسوس کے ساتھ کہنا پڑتا ہے کہ بعض ٹرانسپورٹرز سرکاری قوانین اور مقررہ نرخ ناموں کو نظر انداز کرتے ہوئے اپنی مرضی کے کرایے وصول کر رہے ہیں، جبکہ مسافروں کی مجبوریوں سے ناجائز فائدہ اٹھایا جا رہا ہے۔
عوامی حلقوں میں یہ احساس روز بروز مضبوط ہو رہا ہے کہ متعلقہ ادارے اور ضلعی انتظامیہ اس اہم مسئلے پر خاطر خواہ توجہ نہیں دے رہے، جس کے باعث شہریوں کی مشکلات میں مسلسل اضافہ ہو رہا ہے۔ عوام یہ حق رکھتے ہیں کہ انہیں سرکاری طور پر مقرر کردہ کرایوں کے مطابق سفری سہولیات فراہم کی جائیں اور ان کے ساتھ کسی قسم کی زیادتی نہ ہو۔
ہم ڈپٹی کمشنر چترال اپر، ڈپٹی کمشنر چترال لوئر، محکمہ ٹرانسپورٹ اور دیگر متعلقہ حکام سے پُرزور اپیل کرتے ہیں کہ اس سنگین عوامی مسئلے کا فوری نوٹس لیا جائے، تمام روٹس پر سرکاری کرایہ ناموں پر سختی سے عملدرآمد یقینی بنایا جائے، من مانے کرایے وصول کرنے والوں کے خلاف بلاامتیاز قانونی کارروائی کی جائے اور عوام کو فوری ریلیف فراہم کیا جائے۔
چترال کے غیور عوام مزید مشکلات برداشت کرنے کے متحمل نہیں ہو سکتے۔ وقت کا تقاضا ہے کہ ذمہ دار ادارے عملی اقدامات کے ذریعے عوام کا اعتماد بحال کریں اور ٹرانسپورٹ کے نظام کو قانون کے مطابق منظم بنائیں تاکہ شہری سکون اور اطمینان کے ساتھ سفر کر سکیں
جاری کردہ: مہتر اعزاز احمد عارف کوآرڈینیٹر، پاکستان مسلم لیگ (ن) ڈسٹرکٹ چترال لوئر، تحصیل دروش
