10/12/2025
PATHEN KAHTYK CELUIHTHLI
*********************************
Celtuih atihetah Bawipa amah zyngla amah lawng acel tih atuih ati ngaihna ni thuingaihna tah Bawipa awl kaza thlang, huhdoon thaihu Vision kakhyh thlang, Bawipa ram bibina dawng Ciimmuithla taraana kakhyh thlangla awm. Zaan veng carym dawngah khaw Bawipa lawng acelthli on celtuihthli, tawnghathli, awlthang theen phawngkung on cangpuikungthli akhyh te Baibul dawng huhla awm.
Bawipa lawng acel tih atuih thlangtah Camaw ahkhaw Patawng ahkhaw Acuihnawh ahkhaw tu aming nawh ahkhaw Kri bibi ham Vision huhtih kasai thlang kathui thlangtetah Celtuih ponni telawng tah lungnaropna avan khyn mingtheenna sadingna ngaimawng loihna vankhyn taana on Pathen kah kawpok rai thaihu aka awm nawh thaihu huhsak taree la awm.
1. Adam on Evi, (Gen 3)
Adam tah Bawipa lawng asai tih ave ruh tekhaw azu Evi asai pe Eden dum khuiah Bawipa awl azaak hih tih Bawipa on zalpawla awmpopa Adam tah Bawipa lawng asyncyk angla Bawipa awlkhaw kaza cykla awm.
Evi tah Bawipa awl za nawhde ava Adam awl ngaai hamla awm, Saitan kah sykhalhna dawng kalawng Evi tah apyh cuihna angaih dawngah thawlhna vacong.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
2. Mousi on Aron (Exo 32)
Isrelcathli loih hamla Mousi tah Bawipa awl azaaktih Izip ukkungteng cehham Bawipa lawng atuih Mousi lawngah ka awl khawl Bawipa atinatih Isrelthli mawthamla athana Bawipa lawng nang bawmkungla Aron te namah lawng himbai vanbai sak atina Aron tah cuih awl athuithai thlangla awm tila huhla awm.
Aron tah Bawipa kah celna tuihna awmnawh Aron tengah awlkhaw thuipe nawh Mousi awl ni angaai hamla awm tih Mousi tlangah Pathen awlpeek alawh te aring myhla
Isrel thlangthli kah awl ngaina rang on Israel cathli lawng Bawipa haiah tuileh kap vaitaw muirawl asai u la awm.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
3.Abham on lot (Gen 19)
Abaham tah Bawipa amahlawng akhy, aceltih atuihla awm tede Lot tah Bawipa kah awlza nawh de Abaham hu kabang thlangla awm dawngah Lot lawng Abaham awl angai hamla awm, Lot tah Pathen karih thlang khatla khaw awmbal taksa ngaih anawm atykna rang on S***m Komawrah thlangthlikah thawlhnathli te tula khaw saknawh.
4. Devid on Saul (1Samuel 15)
Saul Sengparang abi thlan vengah Bawipa lawng tawngha Prophet akhyh pe Bawipa lawng akhyh pe tawngha te Isrelthli lawng a ngaih nawh dawngah kaimi hamla mawtkung vantyk atina tih Tawngha Samuel lawng Saul te atyk pe tih Isrelthli kah Sengparang la awm.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
Saul lawng tawngha awl a eek dawngah ahih zyngla Devid tah Bawipa lawng atyk dawng kalawng Bawipa awl azaaktih situi asyyp thlangla awm. Tede Saul a awm khui ahtah Devid lawng Saul kah paihyn rawtnawh Saul he Bawipa kah celna awmnawh tih thlanghing kah tyk thlangla awm dawngah Bawipa kah awlkhaw zavaai nawh, Prophet tawngha kah awl khaw ngai thai nawh, Pathen thlangthli khaw tula saknawh amah sai ngaihna kalawng Saul tah thawlhtih Pathen kah situi syyp thlang on too la raalla thou.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
5. Celtuihthli, (Mathai 10)
Jesu lawng dilaihan ah a awm veng hubangla thlaang 12 acel tih atuihla awm tedawngah Celtuih 12 hawna rangon thlang bro nawh lawng Jesu kri kawng azaak u tih hell khuikalawng loih u, thlangbro nawhlawng dungzaan hingna vadawng ram te apang u.
Judahthli on Farasithli lawngtah amami on amami khawsoih bawila sai u tih Bawipa awl khaw za u nawh, Jesu Kri kah cangpuina khaw tula sak u nawh, Ciimmuithla kah bibi khaw ming u nawhtih Ongcathli athee khana u, apin u, ahoot u, zahrau byng apawhsak u.
6. Celtuih Piter. (Mathai 16:18)
Hubang 12 he Jesu lawng awl adoot vengah Piter lawngah nangtah kahing Pathen capa ni atina vengah Jesu lawng nanglawng naminghe Pa lawngni mingsak tedawngah helungnu saw ah kathlangbol kapai sak vetih nakut dawng ah vaan cabi kan kan peek ai atina tevengah Piter he Jesu amah hu ah abang hyn dawngah Piter lawng amah pok ah hawna paraapnawh.
Jesu lawng vaan alui tawm vengah awl athui sut angla Peticos hin ah Ciimmuithla kanthui ai tering u atina, Ciimmuithla te hailai angla paitih Piter lawng Ciimmuithla rang on saithaina boih adang cong kalawngtah ahih rang on thlangboih kah lungbui ah Kri thlangbol apaisak, Piter lawng Vaan cabi on awlthangtheen a awngthli boihboih te thlangboih lawng taksa lungbui muithla amik tyng u, aha khui u tih Bawipa kah zouthenna adang u la awm.
Judah on Farasithli tah athin calla sa u tih Aana awl tula sak u nawh tila thawlh apel u, tihin to Krikah thlawnna mingmyhla Aana awl on amami on amami pin u.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
7. Celtui Paul (Galati 1:1)
Paultah thlangcuih thlangthom khatla awm tih Farasithli kah mawtna huiah ka awm thlangkhatla awm van dawngah Ongcathli on Kri hubang thlangthli thee khana popa thlangkhatla awm, Damasku khaw ah Kri ka Ongthlangthli bro nawhla awm tite azaak tih theekhaana hamla aceh lii vengah lawngpyng ah Jesu Kri kah angla lawng a thyy cong kalawng tah Paul tah Jesu kri rang on amik tyng tih Pathen awlte ahaa roro on azaakla dawngah Bawipa Jesu Kri te pahoi atangna te kalawng Bawipa ram bibi ham pahoi kamtlah la awm.
Paul lawng kai celtui tila athui he khatben pok vengah tah tyngnawh tudawngah tiahtah Jesu dilai han ah a awm vengah hubang 12 atyk angla Paul he tyk nawhde Jesu kri kah awl azaak cong kalawngtah Paul lawng kaihe celtui la katyng nawhde Jesu Kri dyktih thawhkopna rang on Pathenkah tuihla ka awm kai Celtuih Paul tila athuila awmpon. Baibul cathai byh vengah Jesu hubang Piter angla Paul lawngkhaw Jesu Kri awlthangthen thuitih Kri hubang thlang bro nawhla acongsak, thlangbol khaw bro nawhla pai, bibi kungtheenthli khaw bro nawhla awm tite huhla awm.
= Bibi kung lawng Bawipa kah celtih tuih awl zaaknawh ahtah Pathen ramkhui bibi hamla rai.
Pathen kah awl zaakna ka awm nawh Evi rang on thawlhna vapung.
Pathen kah awlzaak myhka Aron rang on Pathen thinsana taree cong.
Lot lawng Pathen awl zaakmyhla nawmna atykna rang on karam khui ah thangthee zahawh.
Pathen awl zaakmyhla Saul rang on Pathen kah celtuih Devid on raalhih.
Cuihna thomna sangsang cangna kalawng Celtuihla awm nawhtih Patheen awl zaakna tih Ciimmuithla rang on ni Celtuihla awm. Pathen ram apai na hamla huhdoon thaihu Vision khyh tih dykhing on me angraina tawngkhaw Bawipa ham ngahngah bi kabi thli te Celtuih thlini.
Pathen awl zaakmyhla atlo bibi kungthli on bawithli, ukkungthli rihlak ah Patheen lawng aceltih atuihthli he canau hamtoo la arih awm tangkiik, celtuihthli atheenla byhthawngtih hinzahna kakhyh thlangthli, kadoudan thlangthli he Pathen cathli ni tede celtuithli tula kasak nawh tih zah apawh sak thlangthli, kadou nawh thlangthli te thawlhna kasai thaihu thee byng typtyp kapok saitan kah cathli la awm u. Bawipa lawng zakmingna on Celtuihthli bawmkungla congham Ciimmuithla amah lawng cangpui u lang Pathen ram pai taree hawn seh. Amen
Rev. Michael Thangtun
