12/12/2025
ဖလမ်းမြို့ကို လာသည့် စစ်ကော်မရှင်တပ် တိုက်ခိုက်ခံရပြီး ၁၄ ဦး သေဆုံး
ပါခွီး
။ ။ ချင်းပြည်နယ် ၊ ဖလမ်းမြို့သို့ စစ်ကြောင်းထိုးလာသည့် စစ်ကော်မရှင်တပ် တိုက်ခိုက်ခံရပြီး တပ် သား ၁၄ ဦးသေဆုံးကာ လက်နက်ခဲယမ်းများနှင့် အတူ သုံ့ပန်းတဦး ဖမ်းမိထားကြောင်း ချင်းစစ်ရေးသတင်းရင်းမြစ်ထံက သိရသည်။
ဖလမ်းမြို့နယ်၊ ဝေဘူလမြို့ကို သိမ်းယူထားသည့် စစ်ကော်မရှင်တပ်သည် မဏိပူရမြစ်တစ်လျှောက် ချီတက်လာစဥ် သီဖျီးနှင့် မန်းခဲန်းရွာအကြား ယမန်နေ့ (ဒီဇင်ဘာလ ၁၁ ရက်)က တော်လှန်ရေးတပ်များနှင့် တိုက်ပွဲဖြစ်ပွားခဲ့ခြင်းဖြစ်သည်။
“လေကြောင်းပစ်ကူတွေနဲ့တက်လာတဲ့ စစ်ကြောင်းကို ကျွန်တော်တို့ ပူးပေါင်းတပ်ဖွဲ့တွေက တိုက်ခိုက် ခဲ့တာပါ။ စစ်ကော်မရှင်တပ်က အလောင်းတွေအပြင် လက်နက်ခဲယမ်းနဲ့ တယောက် အရှင်မိထား ပါတယ်” ဟု စစ်ရေးသတင်းရင်းမြစ်က မဇ္ဈိမကိုပြောသည်။
တိုက်ပွဲအတွင်း ထိခိုက်သေဆုံးမှုများကို မဇ္ဈိမ အနေဖြင့် သီးခြားအတည်ပြုနိုင်ခြင်းမရှိသေးပါ။
ယင်းတိုက်ပွဲကို ချင်းပြည်ကောင်စီလက်အောက်ခံတပ်များနှင့် ချင်းညီနောင်တပ်ဖွဲ့များ ပူးပေါင်းတိုက်ခိုက်ခဲ့ခြင်းဖြစ်ပြီး RPG အပါအဝင် လက်နက်၂၉လက် သိမ်းဆည်းရမိခဲ့ကြောင်း စစ်ရေးရင်းမြစ်က ဆိုသည်။
ချင်းပြည်နယ် ၊ ဖလမ်းမြို့ကို စစ်ကော်မရှင်တပ်က ကလေးမြို့ - သိုင်းငင်းလမ်း နှင့် ကလေး - ဝေဘူလ လမ်းမှ စစ်ကြောင်းနှစ်ကြောင်းထိုး၍ ချီတက်လာနေကြောင်း သိရသည်။ ချင်းတပ်ဖွဲ့များက ကလေး- ဝေဘူလ လမ်းအတိုင်း စစ်ကြောင်းထိုးလာသည့် စစ်ကော်မရှင်တပ်ကို တိုက်ခိုက်ခဲ့ခြင်းဖြစ်ကြောင်းသိရသည်။
ကလေး - သိုင်းငင်းလမ်းမှ အင်အား၃၀၀ခန့်ဖြင့်တက်လာသည့် စစ်ကြောင်းသည် ဖလမ်းမြို့နှင့် မိုင် ၅၀ခန့်အကွာရှိ ဘွာလ်ခွားကျေးရွာရှိ ဒေသခံ ၁၂ ဦးကို ဒီဇင်ဘာလ ၇ ရက်က ဖမ်းဆီးခဲ့ပြီး ဆက်လက် စစ်ကြောင်းထိုးလာလျက်ရှိကြောင်းသိရသည်။
စစ်ကောင်စီတပ်သည် စစ်ကြောင်းနှစ်ကြောင်းဖြင့် ချီတက်လာနေသော်လည်း ရာသီဥတု ၊ ရိက္ခာပြတ်လပ်မှုများကြောင့် စိတ်ဓါတ်ကျဆင်းပြီး တိုက်ခိုက်လိုစိတ်ရှိပုံမရကြောင်း စစ်ရေးသတင်းရင်းမြစ်ကပြောသည်။
တီးတိန်မြို့နယ်၊ သိုင်းငင်းရွာတွင် တာဝန်ကျနေသည့်(ခလရ၂၆၉) တပ်ရင်းမှ ပြည်သူစစ်သားနှစ်ဦး ဖြစ်သော လားအဲန်ပွီးယာနှင့် မင်းကျော်သိမ်း တို့သည် ဒီဇင်ဘာလ ၁၀ရက်နေ့ တွင် လက်နက် ခဲယမ်းများနှင့်အတူ ဒေသခံချင်းတပ်ဖွဲ့ဖြစ်သည့် PDF – Zoland ထံ အလင်းဝင်ရောက်ခဲ့ သေးသည်။
လက်ရှိ စစ်ကြောင်းအတွင်းရှိ တပ်သားများနှင့် အထိုင်စခန်းများတွင် တာဝန်ထမ်းဆောင်နေသော စစ်ကော်မရှင်တပ်ဖွဲ့ဝင်များအားလုံး အလင်းဝင်ကြရန် ချင်းတပ်ဖွဲ့များက အသိပေးထားသည်။
စစ်ကော်မရှင်တပ် စစ်ကြောင်းထိုးလာသဖြင့် ချင်းပြည်နယ်မှ ဒေသခံ ၂၀,၀၀၀ကျော် စစ်ဘေးတိမ်းရှောင်နေရပြီး စားနပ်ရိက္ခာ၊ အမိုးအကာနှင့် ဆေးဝါးများလိုအပ်နေကြောင်း အကူအညီပေးသူများထံကသိရသည်။
စာတည်း။ ။အောင်ကျော်ဖြိုး
ဓါတ်ပုံ - ချင်းတော်လှန်ရေး တပ်များ ဖမ်းဆီးရမိသည့် သုံ့ပန်းနှင့် လက်နက်ခဲယမ်းများ။ ချင်းပြည်နယ် ၊ ဖလမ်းမြို့နယ်အတွင်း စစ်ကြောင်းထိုးလာသည့် တပ်နှင့် ဒီဇင်ဘာ ၁၁ ရက်က တိုက်ပွဲဖြစ်ပွားပြီး စစ်ကော်မရှင်တပ်သား ၁၄ ဦး သေဆုံးကာ လက်နက်ခဲယမ်းများနှင့် သုံ့ပန်း တဦးဖမ်းဆီးရမိထားကြောင်း ချင်းတပ်ဖွဲ့များကပြောသည်။ (CJ)
#ပြည်တွင်းသတင်း
#ချင်းပြည်နယ်
#ဖလမ်းမြို့
#သုံ့ပန်း
#တိုက်ပွဲ
----------------------------------------------
