Humwatan international

31/12/2025

بنگلادیش نیشنل پارٹی کی لیڈر خالدہ ضیاء نے 1991 میں وزارت عظمیٰ سنبھالی تھی، وہ بنگلادیش کے سابق صدر ضیاء الرحمٰن کی اہلیہ تھیں۔خالدہ ضیاء 15 اگست 1946 کو دیناج پور میں پیدا ہوئیں، انہوں نے 1960 میں فوجی افسر ضیاء الرحمٰن سے شادی کی، اس وقت ان کی عمر تقریباً 15 برس تھی، 1971 کی جنگِ آزادی کے بعد ضیاء الرحمن ایک قومی ہیرو کے طور پر ابھرے، 1977 میں صدر بنے اور 1978 میں بنگلادیش نیشنل پارٹی کی بنیاد رکھی۔1981 میں ایک ناکام فوجی بغاوت کے دوران ضیاء الرحمن کے قتل کے بعد خالدہ ضیاء عملی سیاست میں داخل ہوئیں اور وقت کے ساتھ بنگلادیش نیشنل پارٹی کی قیادت سنبھال لی۔1991 کے عام انتخابات کو بنگلادیش کی تاریخ کے پہلے آزادانہ انتخابات قرار دیا جاتا ہے جس میں خالدہ ضیاء نے غیر متوقع طور پر شیخ حسینہ کو شکست دی، انہیں ملک کی سب سے بڑی اسلامی جماعت، جماعتِ اسلامی کی حمایت حاصل تھی۔1996 میں وہ انتخابات میں شکست کھا گئیں، تاہم صرف 5 برس بعد 2001 میں شاندار اکثریت کے ساتھ دوبارہ وزیرِاعظم بنیں، اکتوبر 2006 میں عام انتخابات کیلئے اقتدار سے الگ ہوگئی تھیں، سیاسی کیریئر کے دوران ان پر کرپشن کے الزامات لگے، انہیں 2018 میں 5 برس کیلئے جیل بھی کاٹنا پڑی تھی۔2018 میں خالدہ ضیاء، ان کے صاحبزادے طارق رحمان اور دیگر افراد کو ایک یتیم خانے کے لیے موصول ہونے والی تقریباً 2 لاکھ 50 ہزار ڈالر کی غیر ملکی امداد میں مبینہ بدعنوانی کے الزام میں سزا سنائی گئی۔خالدہ ضیاء نے ان الزامات کو سیاسی انتقام قرار دیا، انہیں جیل بھیجا گیا، تاہم خراب صحت کے باعث مارچ 2020 میں انسانی بنیادوں پر گھر میں نظر بند کر دیا گیا۔2025 میں بنگلادیش کی سپریم کورٹ نے خالدہ ضیاء اور طارق رحمن کو اس بدعنوانی کیس میں بری کر دیا، جس کی بنیاد پر 2018 میں انہیں سزا ہوئی تھی۔عوامی لیگ کی لیڈر شیخ حسینہ واجد سے ان کی طویل سیاسی رقابت بھی رہی، بالآخر شیخ حسینہ واجد کو پچھلے سال حکومت چھوڑنا پڑگئی تھی۔یاد رہے کہ خالدہ ضیاء کے بیٹے طارق رحمن 17 برس کی جلاوطنی گزارنے کے بعد چند روز قبل بنگلادیش پہنچے ہیں۔

31/12/2025

وزیر اطلاعات و ثقافت پنجاب عظمیٰ بخاری نے کہا ہے کہ اپوزیشن لیڈر کا پورے میڈیا کو بکا کہنا ان کی بکا ذہنیت کی عکاسی ہے، انہوں نے واضح(باقی صفحہ 3 بقیہ نمبر19) کیا کہ جو صحافی اپوزیشن کے حق میں بات کرے اسے صحافی تسلیم کیا جائے لیکن باقی صحافیوں کی خدمات کو نظرانداز یا کمتر قرار دینا ناقابلِ قبول ہے، وزیر اطلاعات نے صحافیوں کے ساتھ اظہار یکجہتی کرتے ہوئے پنجاب اسمبلی سے واک آئوٹ کیا اور اعلان کیا کہ اپوزیشن لیڈر کے خلاف ہتک عزت کے الزامات کے سلسلے میں ڈیفمیشن ایکٹ کے تحت قانونی کارروائی کی جائے گی۔ پنجاب اسمبلی کے باہر صحافیوں سے اظہار یکجہتی کرتے ہوئے عظمیٰ بخاری نے کہا ہے کہ پنجاب اسمبلی میں گزشتہ دنوں پیش آنے والے واقعات نے پوری دنیا کو دکھا دیا کہ اپوزیشن کو بولنے کی عادت تو ہے، مگر سننے کی برداشت نہیں۔ انہوں نے کہا کہ اپوزیشن کی جانب سے مہمانوں کی فہرست باقاعدہ طور پر جمع کروائی گئی، جس کے مطابق داخلے کا اہتمام کیا گیا، لیکن اس کے باوجود وزیراعلی خیبرپختونخوا اپنے ساتھ ایسے غیر متعلقہ افراد اور یوٹیومرز کو ساتھ لائے جن کا اسمبلی سے کوئی تعلق نہیں تھا۔ یہ افراد ایوان کے تقدس کو پامال کرتے ہوئے ہلڑ بازی اور صحافیوں سے بدسلوکی پر اتر آئے۔عظمیٰ بخاری نے کہا کہ پنجاب اسمبلی کے اندر صحافیوں کو دھکے دیے گئے، مارا پیٹا گیا، گالم گلوچ کی گئی اور انہیں اپنے فرائض کی ادائیگی سے روکا گیا۔ انہوں نے افسوس کا اظہار کرتے ہوئے کہا کہ تشدد کے بعد معذرت تو دور کی بات، اپوزیشن نے الٹا میڈیا اور صحافیوں کو بکا قرار دے کر اپنی اخلاقی دیوالیہ پن پر مہر ثبت کر دی۔ ان کا کہنا تھا کہ جن کی سوچ اور سیاست بکا ہو وہی آزاد میڈیا کو بکا کہتے ہیں۔وزیر اطلاعات نے واضح کیا کہ پنجاب اسمبلی کے صحافیوں اور پریس گیلری کے ساتھ بدسلوکی ناقابلِ قبول ہے، اسی لیے بطور اظہارِ یکجہتی میں نے ایوان سے واک آٹ کیا۔ صحافیوں کے ساتھ کھڑی تھی، ہوں اور رہوں گی۔انہوں نے یہ بھی کہا کہ لاہور کیسا لگا؟ اگر یہ سوال اپوزیشن کی چھیڑ ہے تو اس میں ہمارا کیا قصور؟ سوال پوچھنا صحافت کا حق ہے، اور جو حق برداشت نہ کرے وہ سوال نہیں، صرف تالیاں چاہتا ہے۔عظمیٰ بخاری نے کہا کہ میڈیا سے معافی مانگنے کے بجائے اپوزیشن نے پشتون شناخت کو ڈھال بنا کر لسانیت کا کارڈ کھیلنے کی کوشش کی حالانکہ بات کسی قومیت کی نہیں، رویے کی تھی۔ پنجاب سمیت پورا پاکستان جانتا ہے کہ پشتون کمیونٹی معزز اور قابلِ احترام ہے، مگر بدسلوکی کرنے والے افراد کو پشتون قوم سے جوڑ کر سیاسی فائدہ اٹھانا شدید نامناسب ہے۔وزیر اطلاعات نے اپنے خلاف لگائے گئے الزامات پر قانونی کاروائی کا اعلان کرتے ہوئے کہااپوزیشن لیڈر نے جو بے بنیاد الزام لگایا کہ میں نے پِیڈ صحافی بھیجے، اب وہ یہ الزام عدالت میں ثابت کریں۔ میں ڈیفمیشن ایکٹ کے تحت ان کے خلاف قانونی کارروائی کر رہی ہوں، اور نوٹس جاری ہو رہا ہے۔ یہ وقت آ گیا ہے کہ جھوٹ اور بہتان کی سیاست کا احتساب ہو۔انہوں نے مزید کہا کہ جن یوٹیوبرز کو اپوزیشن اسمبلی میں لے کر آئی وہ سوشل میڈیا پروپیگنڈا سیل کا حصہ تھے؛ نہ انہیں کوئی ادارہ اون کرتا ہے، نہ صحافت کے اصولوں سے کوئی واسطہ ہے۔ وہ خود کو صحافی کہلوانا چاہتے ہیں۔عظمیٰ بخاری نے کہا کہ جو شخص دہشت گردی، گورننس اور عوامی مسائل پر سوال سننا گناہ سمجھتا ہو، وہ جمہوری سیاست کا دعویدار کیسے ہو سکتا ہے؟ ۔انہوں نے اپوزیشن کو مخاطب کرتے ہوئے کہا سوال سے اتنی تکلیف ہے تو جواب دینا سیکھیں۔ میڈیا پر حملے، بدزبانی، اور صحافیوں کے خلاف مہم چلانا سیاست نہیں، کم ظرفی ہے۔آخر میں وزیر اطلاعات نے دوٹوک موقف اپناتے ہوئے کہا کہ آزاد میڈیا پر حملے برداشت نہیں کیے جائیں گے۔ پنجاب اسمبلی صحافیوں پر تشدد کرنے والوں کی آماجگاہ نہیں بن سکتی۔

30/12/2025

سپیکر پنجاب اسمبلی کے بیان پر معاون خصوصی اطلاعات خیبر پختونخوا شفیع جان نے ردعمل دیتے ہوئے کہا ہے کہ سپیکر نے پنجاب اسمبلی کو( ن) لیگ کا ذیلی دفتر بنا دیا ہے۔ شفیع جان کا کہنا ہے کہ پنجاب اسمبلی کو ماسی کا گھر کہنے والا خود آئین، جمہوریت اور مہمانوں کا احترام بھول گیا، منتخب وزیراعلیٰ کے دورے کو چھلانگیں قرار دینا سپیکر پنجاب اسمبلی کی سیاسی گھبراہٹ ہے۔سپیکر جیسے عہدے پر براجمان شخص شریف خاندان کی ذاتی ملازم بننے کی بجائے سپیکر کا کردار ادا کریں، پی ٹی آئی کے جعلی کیسز پر بات کرنے سے پہلے شریف خاندان کی تاریخ پر نظر ڈالیں۔ معاون خصوصی اطلاعات خیبر پختونخوا کا کہنا تھا کہ سپیکر پنجاب اسمبلی نے 9 مئی کا واویلا کر کے (ن) لیگ کی سیاسی انتقام کو چھپانے کی ناکام کوشش کی ہے، آئین کا احترام صرف تقریروں سے نہیں، عمل سے ثابت کیا جاتا ہے۔ پنجاب اسمبلی میں منتخب وزیراعلیٰ اور اراکین کو دھکے دینا کون سا آئین اجازت دیتا ہے؟ پنجاب حکومت سیکیورٹی کے نام پر سیاسی خوف چھپا رہی ہے۔ ان کا کہنا تھا کہ سپیکر پنجاب یاد رکھیں، اسمبلی سب جماعتوں کی ہے، اراکین کوکیوں روکا گیا؟ منتخب نمائندوں کی تذلیل کر کے جمہوریت مضبوط نہیں کمزور ہوتی ہے، پنجاب اسمبلی میں پیش آنے والا واقعہ( ن) لیگ کی سیاسی عدم برداشت کی واضح مثال ہے۔عظمیٰ بخاری نے مسلسل نسلی تعصب پر مبنی بیانات دیئے، پنجاب حکومت کے جعلی حکمران سیاسی انتقام میں پاگل ہوچکے ہیں، سپیکر پنجاب اسمبلی کو خیبرپختونخوا اسمبلی آنے کی دعوت دیتا ہوں۔

30/12/2025

وزیرِاعلیٰ خیبرپختونخوا سہیل آفریدی نے کہا ہے کہ پنجاب حکومت ذہنی اور اخلاقی پستی کا شکار ہے، قومی یکجہتی کے وقت نفرت آمیز رویّے ملک کے لیے نقصان دہ ہیں، کے پی حکومت اس رویے کی شدید مذمت کرتی ہے۔ صوبائی کابینہ سے خطاب میں انہوں نے تین روزہ دورہ لاہور کے دوران پنجاب حکومت کے رویّے پر سخت تحفظات کا اظہار کیا اور کہا کہ پنجاب حکومت کا رویّہ غیر جمہوری اور قابلِ مذمت ہے، پنجاب حکومت کی جانب سے کابینہ اراکین کو تشدد کا نشانہ بنایا گیا، ایک صوبے کے وزیراعلی کے لیے مسلسل راستے بند کیے گئے اور بازاروں کو زبردستی بند کروایا گیا، پنجاب پولیس کی جانب سے موٹروے پر ریسٹ ایریاز بھی بند کروائے گئے، مزار اقبال پر حاضری کے دوران لائٹس بند کرادی گئیں۔ انہوں نے کہا کہ پنجاب حکومت اخلاقی اور ذہنی پستی کا شکار ہے، ملک میں معاشی و سیاسی عدم استحکام کے دوران ایسا رویّہ تشویش ناک اور ناقابل فہم ہے، قومی یکجہتی کے وقت نفرت آمیز رویّے ملک کے لیے نقصان دہ ہیں، خیبر پختونخوا حکومت پنجاب حکومت کی اس رویے کی شدید مذمت کرتی ہے۔ وزیراعلی نے خیبرپختونخوا کے تمام سرکاری افسران کو واضح ہدایات دیں کہ دیگر صوبوں سے آنے والے سرکاری وفود کی روایات اور استطاعت سے بڑھ کر خدمت کی جائے، خیبر پختونخوا میں کسی کو اجنبیت محسوس نہ ہو۔ سہیل آفریدی نے وفاقی حکومت کی جانب سے اے آئی پی فنڈز کی عدم ادائیگی پر شدید اعتراض کیا اور کہا کہ فنڈز کی عدم ادائیگی کے باعث ضم اضلاع میں ترقیاتی منصوبوں پر پیشرفت متاثر ہو رہی ہے ، خیبر پختونخوا کے 4758 ارب روپے وفاق کے ذمے واجب ادا ہیں، وفاقی وزارتِ خزانہ نے من گھڑت پروپیگنڈا کے ذریعے فسکل ریلیز سے متعلق میڈیا ٹرائل کی کوششیں کی، وفاقی حکومت تمام صوبوں کو دیے گئے فنڈز کی تفصیل بھی سامنے لائے۔ وزیراعلی نے خیبر پختونخوا اور دیگر صوبوں کے بقایاجات کا موازنہ کرنے کا بھی مطالبہ کیا اور بقایاجات کے حوالے سے تمام محکموں کو باضابطہ خطوط لکھنے اور تحریری جواب مانگنے کی ہدایت کی۔ وزیراعلیٰ نے کہا کہ اگلے اجلاس میں بقایاجات سے متعلق تمام محکمے صوبائی کابینہ کو بریفنگ دیں۔ وزیراعلی نے جاری ترقیاتی منصوبوں پر کام تیز کرنے کا حکم دیا، صحت اور تعلیم کو حکومتی ترجیحات قرار دیا گیا۔ سہیل آفریدی نے مزید کہا کہ عمران خان کے وژن کے مطابق ہیلتھ اور ایجوکیشن صوبائی حکومت کی اولین ترجیح ہے۔

29/12/2025

وزیراعلیٰ خیبر پختونخوا سہیل آفریدی نے مریم نواز کو کے پی میں جلسہ کرنے کا چیلنج دے دیا اور کہا ہے کہ مریم نواز کے پی میں اور میں پنجاب میں جلسہ کروں گا دیکھتے ہیں کس کی کال پر عوام زیادہ باہر نکلتی ہے۔ دورہ لاہور کے تیسرے دن سینئر صحافیوں، اینکر پرسنز، ڈیجیٹل میڈیا نمائندوں، مختلف ٹی وی چینلز کے بیورو چیفس اور نورین نیازی سے ملاقات کے دوران گفتگو کرتے ہوئے انہوں نے پنجاب کی وزیراعلیٰ مریم نواز کو خیبر پختونخوا آنے کی دعوت دی۔ وزیراعلیٰ نے کہا کہ مریم نواز خیبر پختونخوا آئیں، جہاں انہیں بتایا جائے گا کہ وزیر اعلیٰ کے منصب کا استقبال اور احترام ایک جمہوری اور مہذب انداز میں کس طرح کیا جاتا ہے۔
وزیراعلیٰ نے مریم نواز کو خیبرپختونخوا میں جلسہ منعقد کرنے کا کھلا چیلنج بھی دیا اور کہا کہ اگر پنجاب حکومت یہ دعویٰ کرتی ہے کہ عمران خان کی کال پر عوام باہر نہیں نکلتے تو وہ مریم نواز کو تیاری کے لیے ایک ہفتے کا وقت دیتے ہیں، ہفتے کی تیاری کے بعد مریم نواز خیبر پختونخوا آئیں اور وہاں جلسہ کر کے دکھائیں، جبکہ اس کے برعکس وہ خود پنجاب میں جلسہ منعقد کریں گے اس کے بعد یہ واضح ہو جائے گا کہ کس کی کال پر عوام کی تعداد زیادہ باہر نکلتی ہے۔ انہوں نے کہا کہ گزشتہ عام انتخابات میں پاکستان تحریک انصاف نے پنجاب سے 180 نشستیں جیتی تھیں، جو اس بات کا واضح ثبوت ہے کہ پنجاب کے عوام نے پاکستان تحریک انصاف پر اعتماد کیا تھا اور وہ عمران خان کی کال پر نکلے تھے اور آج بھی نکلنے کے لیے تیار ہیں۔ وزیر اعلیٰ نے کہا کہ جو لوگ غیر قانونی طریقے سے حکومت پر قابض ہو چکے ہیں، یعنی فارم 47 کے ذریعے بننے والی حکومت، ان کا عوام سے کوئی تعلق نہیں رہا۔ یہ لوگ مکمل طور پر عوام سے ڈسکنیکٹ ہو چکے ہیں۔
وزیر اعلیٰ نے کہا کہ پنجاب آ کر اور زمینی حقائق کو خود سامنے دیکھ کر انہیں شدید حیرت ہوئی ہے پنجاب حکومت کی جانب سے جس قسم کی سختی، جبر اور زیادتیاں کی جا رہی ہیں، ان کی پاکستان کی تاریخ میں کہیں کوئی مثال نہیں ملتی، ایسا محسوس ہو رہا ہے جیسے ماضی کے کالے قانون کا نظام اب موجودہ پنجاب حکومت نے پنجاب میں نافذ کر دیا ہے، جس کے تحت اجتماعی احتساب کیا جا رہا ہے، گھروں پر چھاپے مارے جا رہے ہیں، شیشے توڑے جا رہے ہیں، لوگوں کو ہراساں کیا جا رہا ہے اور خوف و ہراس کی فضا قائم کی جا رہی ہے۔

29/12/2025

عوامی نیشنل پارٹی کے سربراہ ایمل ولی خان نے کہا ہے کہ نجکاری تمام مسائل کا حل ہے، حکومت حاکمیت کرے کاروبار نہیں۔ پشاور میں تقریب سے خطاب میں ایمل ولی خان کا کہنا تھاکہ غلام بلور نیشنل پارٹی میں تھا ہے اور رہے گا، عوامی نیشنل پارٹی کو ختم کرنے کی کوشش کی گئی مگر نہیں ہوئی۔ نجکاری کی حمایت کرتے ہوئے کہا کہ نجکاری تمام مسائل کا حل ہے، حکومت حاکمیت کرے کاروبار نہیں، پاکستان اسٹیل ملز، ریلوے، قومی ائیرلائن تباہ ہے، نجکاری سے ملک کو مزید ٹیکس ملے گا۔ ان کا کہنا تھاکہ نجکاری بھی شفاف ہونی چاہیے، غیرشفاف نجکاری قبول نہیں، 140 کاروبار سے ٹیکس وصول نہیں کیا جارہا۔ ایمل ولی خان نے مطالبہ کیا کہ حکومتی ادارے جس کام کیلئے بنے ہیں وہی کام کریں، ریاست پاکستان ازسرنو جائزہ لے کر نجکاری کے عمل کو شفاف بنائے۔ ان کا مزید کہنا تھاکہ افغانیوں کو لانا نہیں چاہیے تھا، لایا تو بھیجنا نہیں چاہیے۔

29/12/2025

گورنر پنجاب سردار سلیم حیدر نے کہا ہے کہ بانی پی ٹی آئی کے ایجنڈے پر انتشار پھیلایا جاتا ہے۔سردار سلیم حیدر نے میڈیا سے گفتگو کرتے ہوئے خبردار کیا کہ پی ٹی آئی جمہوری طریقے سے چیزوں کو آگے لے کر چلے یہ پی ٹی آئی اور ملک دونوں کے لیے بہتر ہے۔انہوں نے کہا کہ اڈیالہ جیل ایک تاریخی جیل ہے، بانی پی ٹی آئی کو وہیں رہنا چاہیے۔

29/12/2025

پیپلز پارٹی پارلیمنٹرینز کی مرکزی ترجمان شازیہ عطا مری نے کہا ہے کہ جب بھی 27 دسمبر آتا ہے تو شہیدبینظیر بھٹو کی جدائی شدت سے محسوس ہوتی ہے،ان کا ہمارے درمیان نہ ہونا ملک اور قوم کے لیے ایک ناقابلِ تلافی نقصان ہے۔ شہید بینظیر بھٹو کی برسی کے موقع پر جاری ویڈیو بیان میں شازیہ مری نے کہا کہ شہید بینظیر بھٹو کی جدوجہد کا اچانک تھم جانا آج بھی دل کو تکلیف دیتا ہے، تاہم ان کی پوری زندگی مختلف چیلنجز، قربانیوں اور جمہوریت کے استحکام کے لیے مسلسل جدوجہد سے عبارت رہی۔شہید محترمہ نے بطور بیٹی، بہن، اہلیہ، ماں اور سیاسی قائد ہر کردار کو نہایت احسن انداز میں نبھایا۔ شہیدبینظیر بھٹو کی زندگی اور جدوجہد آج بھی ہم سب کے لیے مشعلِ راہ ہے اور ان کی قربانیاں آنے والی نسلوں کو جمہوریت، آئین اور عوامی حقوق کے تحفظ کا درس دیتی ہیں۔ انہوں نے کہا کہ 27 دسمبر ہمیشہ درد اور تکلیف کی یاد دلاتا ہے، تاہم شہید محترمہ کے مزار پر حاضری دے کر آج بھی کارکنان روحانی طاقت اور حوصلہ حاصل کرتے ہیں۔

29/12/2025

سابق امیر جماعت اسلامی سراج الحق کا کہنا ہے یہ پاکستان کی تاریخ کا بڑا المیہ ہے کہ لیاقت باغ میں دو وزرائے اعظم کو مجمع عام میں شہید کیا گیا مگر آج تک قاتل بے نقاب نہ ہو سکے۔ اپنے ایکس بیان میں کہا پیپلز پارٹی برسوں اقتدار میں رہی لیکن اپنی قائد کے قاتلوں کو انصاف کے کٹہرے میں نہ لا سکی۔ یہ صرف ایک جماعت نہیں بلکہ پورے نظامِ انصاف کی ناکامی ہے۔

28/12/2025

معروف بھارتی عالم دین مفتی شمائل ندوی نے کہا ہے کہ پاکستان میں کسی بھی قسم کا اسلامی نظام موجود نہیں ہے اور نہ ہی اس ملک کو اسلامی نظام کا حامل کہا جا سکتا ہے۔ ایکس پر وائرل ہونے والی ویڈیو میں مفتی شمائل ندوی نے کہا کہ اسلامی ریاست وہ ہوتی ہے جہاں اسلامی قوانین مکمل طور پر نافذ ہوں جبکہ پاکستان میں اسلامی قوانین کے عملی نفاذ کی کوئی واضح علامت نظر نہیں آتی۔ واضح رہے کہ گزشتہ دنوں مفتی شمائل ندوی اور بھارتی مصنف جاوید اختر کے درمیان ''خدا کے وجود،،کے عنوان پر بحث ہوئی تھی جس کے بعد پاکستان اور بھارت میں اس بحث پر بہت زیادہ بات کی گئی اور اس بحث کو مفتی شمائل ندوی کے مضبوط دلائل کے باعث جیت اور جاوید اختر کی ہار سے تعبیر کیا گیا تھا۔

28/12/2025

متحدہ قومی موومنٹ پاکستان کے سینئر مرکزی رہنما و وفاقی وزیر مصطفیٰ کمال نے الزام لگایا ہے کہ عمران فاروق کوبانی ایم کیوایم نے مروایا، بانی متحدہ نے نشے میں دُھت ہوکرعمران فاروق کوقتل کرنےکاحکم دیا۔ کراچی میں پریس کانفرنس سے خطاب کرتے ہوئے ان کا کہنا تھا کہ بانی ایم کیوایم ڈرامے بازآدمی ہے، بانی متحدہ لاشوں پر آئٹم سانگ کرتے ہیں، بانی متحدہ سمجھتا ہے کہ وہ راجہ ہے۔
انہوں نے کہا کہ ڈاکٹرعمران فاروق کی اہلیہ کی لاش پربانی ایم کیوایم نےناٹک شوکیا، بانی نےلاش پاکستان بھیجنےکےلیےلاکھوں پاؤنڈ کاچندہ وصول کیا، بانی متحدہ کی سالگرہ پرعمران فاروق کومارکرتحفہ دیا گیا، لاش کےلیےچندہ لینےکی اپیل کی۔ بانی متحدہ را سے فنڈنگ لیتے رہے ہیں، یہ پوری نسل برباد کرچکا ہے اور اب بھی برباد کررہا ہے، یہ 40 سالوں میں کتنے لوگوں کو کھاگیا، اب بھی کھا رہا ہے،عمران فاروق کے بچوں سے درخواست کرتا ہوں کہ بانی سے رابطہ نہیں کریں۔

28/12/2025