02/04/2026
38ਵੀਂ ਆਸਟ੍ਰੇਲੀਆਨ ਸਿੱਖ ਗੇਮਜ਼ 2026 – ਮੈਲਬੌਰਨ
ਆਸਟ੍ਰੇਲੀਆ ਵਿਚ ਵੱਸਦੇ ਸਿੱਖ ਭਾਈਚਾਰੇ ਦੀਆਂ ਸਭ ਤੋਂ ਵੱਡੀਆਂ ਤੇ ਮਾਣ ਵਾਲੀਆਂ ਖੇਡਾਂ — ਆਸਟ੍ਰੇਲੀਆਨ ਸਿੱਖ ਗੇਮਜ਼ — ਇਸ ਸਾਲ ਆਪਣੀ 38ਵੀ ਵਾਰੀ ਨਾਲ ਸਾਡੇ ਸੋਹਣੇ ਸ਼ਹਿਰ ਮੈਲਬੌਰਨ ਵਿੱਚ ਕਰਵਾਈਆਂ ਜਾ ਰਹੀਆਂ ਹਨ। ਇਹ ਮਹਾਕੁੰਭ 3 ਤੋਂ 5 ਅਪ੍ਰੈਲ 2026 ਤੱਕ ਬੜੀ ਧੂਮਧਾਮ ਨਾਲ ਮਨਾਇਆ ਜਾਵੇਗਾ।
ਇਸ ਵਿਸ਼ਾਲ ਸਮਾਗਮ ਵਿੱਚ 8000 ਤੋਂ ਵੱਧ ਖਿਡਾਰੀ ਆਸਟ੍ਰੇਲੀਆ ਦੇ ਵੱਖ-ਵੱਖ ਸੂਬਿਆਂ ਤੋਂ ਆ ਕੇ ਹਿੱਸਾ ਲੈਣਗੇ। ਕਬੱਡੀ, ਫੁੱਟਬਾਲ, ਕ੍ਰਿਕਟ, ਵਾਲੀਬਾਲ ਅਤੇ ਹੋਰ ਕਈ ਖੇਡਾਂ ਵਿੱਚ ਜਬਰਦਸਤ ਮੁਕਾਬਲੇ ਵੇਖਣ ਨੂੰ ਮਿਲਣਗੇ। ਖਿਡਾਰੀਆਂ ਦੀ ਤਿਆਰੀ, ਜਜ਼ਬਾ ਤੇ ਖੇਡਾਂ ਦੀ ਰੌਣਕ ਇਸ ਸਮਾਗਮ ਨੂੰ ਹੋਰ ਵੀ ਖਾਸ ਬਣਾਉਂਦੀ ਹੈ।
ਇਸ ਤੋਂ ਇਲਾਵਾ, ਲਗਭਗ 1 ਲੱਖ ਤੋਂ ਵੱਧ ਦਰਸ਼ਕਾਂ ਦੇ ਪਹੁੰਚਣ ਦੀ ਸੰਭਾਵਨਾ ਹੈ, ਜੋ ਇਸ ਸਮਾਗਮ ਨੂੰ ਇੱਕ ਵੱਡੇ ਮੇਲੇ ਦਾ ਰੂਪ ਦੇਵੇਗਾ। ਦੇਸ਼ ਦੇ ਹਰ ਕੋਨੇ ਤੋਂ ਲੋਕ ਆਪਣੇ ਪਰਿਵਾਰਾਂ ਸਮੇਤ ਮੈਲਬੌਰਨ ਵੱਲ ਰੁਖ ਕਰ ਰਹੇ ਹਨ, ਜਿਸ ਨਾਲ ਸ਼ਹਿਰ ਵਿੱਚ ਇੱਕ ਵੱਖਰੀ ਹੀ ਚਲਹਲ-ਪਹਿਲ ਬਣ ਗਈ ਹੈ।
ਮੈਲਬੌਰਨ ਵੱਸਦੇ ਪੰਜਾਬੀ ਭਾਈਚਾਰੇ ਦੇ ਸਹਿਯੋਗ ਨਾਲ ਆਯੋਜਕ ਕਮੇਟੀ ਵੱਲੋਂ ਬਹੁਤ ਹੀ ਪੁਖਤਾ ਤੇ ਸੁਚੱਜੇ ਪ੍ਰਬੰਧ ਕੀਤੇ ਗਏ ਹਨ, ਤਾਂ ਜੋ ਹਰ ਆਉਣ ਵਾਲੇ ਮਹਿਮਾਨ ਅਤੇ ਖਿਡਾਰੀ ਨੂੰ ਵਧੀਆ ਤਜਰਬਾ ਮਿਲ ਸਕੇ।
ਖੇਡਾਂ ਦੇ ਨਾਲ-ਨਾਲ, ਕਲਚਰਲ ਨਾਈਟਸ ਵੀ ਇਸ ਸਮਾਗਮ ਦਾ ਮੁੱਖ ਆਕਰਸ਼ਣ ਹਨ। 3 ਅਤੇ 4 ਅਪ੍ਰੈਲ ਦੀਆਂ ਸ਼ਾਮਾਂ 7 ਤੋਂ 11 ਵਜੇ ਤੱਕ ਭੰਗੜਾ ਤੇ ਗਿੱਧਾ ਮੁਕਾਬਲੇ ਹੋਣਗੇ, ਜਿੱਥੇ ਆਸਟ੍ਰੇਲੀਆ ਦੀਆਂ ਟਾਪ ਟੀਮਾਂ ਆਪਣਾ ਜਲਵਾ ਵਿਖਾਉਣਗੀਆਂ। ਰੰਗ-ਬਰੰਗੇ ਕਪੜੇ, ਜੋਸ਼ ਭਰੇ ਡਾਂਸ ਤੇ ਪੰਜਾਬੀ ਸੱਭਿਆਚਾਰ ਦੀ ਝਲਕ ਦਰਸ਼ਕਾਂ ਨੂੰ ਮੋਹ ਲਵੇਗੀ।
ਇਹ ਸਿਰਫ ਖੇਡਾਂ ਹੀ ਨਹੀਂ, ਸਗੋਂ ਸਾਡੇ ਵਿਰਸੇ, ਸੱਭਿਆਚਾਰ ਅਤੇ ਇਕੱਠ ਦੀ ਨਿਸ਼ਾਨੀ ਹੈ। ਆਓ ਸਾਰੇ ਮਿਲਕੇ ਇਸ ਮਹਾਨ ਸਮਾਗਮ ਦਾ ਹਿੱਸਾ ਬਣੀਏ ਅਤੇ ਆਪਣੀ ਹਾਜ਼ਰੀ ਨਾਲ ਇਸਨੂੰ ਹੋਰ ਵੀ ਯਾਦਗਾਰ ਬਣਾਈਏ।
✍️ ਪਲਵਿੰਦਰ ਠੁੱਲੀਵਾਲ
