Wat zijn de openingstijden?

Maandag 09:00 - 17:00 Dinsdag 09:00 - 17:00 Woensdag 09:00 - 17:00 Donderdag 09:00 - 17:00 Vrijdag 09:00 - 17:00

Diario Aruba, Lloyd G. Smith Boulevard 120, Oranjestad (2026)

04/06/2026

Recientemente Fundacion Epilepsia Aruba a celebra su 19 aña di existencia, marcando casi dos decada di compromiso cu informacion, conscientisacion y apoyo pa personanan cu epilepsia y nan famia.

Como parti di e compromiso aki, riba 16 di mei 2026, e fundacion a organisa su prome encuentro “Mama Nan Ban Topa” na WGK Savaneta. E mainta special aki a reuni diferente mamanan cu tin un yiu cu epilepsia den un ambiente calmo, sigur y yen di comprondemento.

Durante e encuentro, mamanan a haya oportunidad pa siña mas tocante epilepsia, comparti nan experiencia personal y conecta cu otro mayornan cu ta pasa pa situacionnan similar. E mainta tabata yen di informacion util, apoyo emocional y momentonan di conexion cu a toca hopi curason.

Fundacion Epilepsia Aruba ta hopi contento di mira cu tin mamanan cu ta ansioso pa siña mas, pero tambe cu tin necesidad di comparti nan historia y tende cu nan no ta nan so den e caminda aki. E encuentro a confirma cu tin un gran necesidad den nos comunidad pa crea espacionan unda personanan por sinti nan mes comprendi, sosteni y informa.

Encuentro Social: Siguiendo e iniciativa aki, Fundacion Epilepsia Aruba ta invita comunidad pa un encuentro social riba 6 di juni 2026 na Club San Martin, di 9:00 am te 11:00 am. E tema central lo ta enfoca riba con pa maneha emocionnan ora bo ta biba cu epilepsia, of ora bo tin un ser keri cu epilepsia.

E encuentro aki ta habri pa tur hende cu tin epilepsia, tin un familiar cu epilepsia of simplemente kier siña mas y compronde miho.

E meta ta pa sigui concientisa, ofrece apoyo emocional y fortalece e sentimento cu ningun hende no mester pasa pa e experiencia aki nan so.

Fundacion Epilepsia Aruba kier gradici tur mama cu a participa, tur persona cu ta yuda organisa e maintanan, y tur sponsor nan cu ta contribui pa haci e encuentronan un exito.

Cu hopi entusiasmo, e fundacion ta mira dilanti pa futuro encuentronan y pa sigui creando mas conexion y apoyo den nos comunidad.

Pa mas informacion, comunidad por sigui Fundacion Epilepsia Aruba riba red social, of tuma contacto cu Margarita na 593-5806 of Maryla na 594-5362. “Bo no ta bo so.”

Diasabra awor tin encuentro pa comunidad

04/06/2026

Segun Presidente di Sindicato di Polis Aruba (SPA) señor Lito Lacle, e preocupacion number un di su miembronan ta e asistencianan cu mester duna unda cu ta enfrenta cu personanan cu salud mental. “Dado momento, e conexion entre ariba y abou, no tey. Y dado momento, SPA tey pa por escrito pidi un update di loke ta pasando”, señor Lacle a expresa.

Esaki SPA a haci tambe door di manda carta cu e preocupacion aki na Korpschef Ramon Arnhem y na Minister di Husticia Arthur Dowers na unda cu ta boga pa un protocol di colaboracion entre KPA y Respaldo pa determina con nan mester colabora y comunica cu otro den situacionnan relaciona cu personanan cu problemanan di salud mental.

Señor Lacle a expresa cu SPA ta dispuesto pa pusha pa e samenwerkings protocol wordo realisa. Pero no por keda warda. Nos polisnan riba caya mester di mas proteccion. “Desde ayera, esun personalmente responsabel den caso cu algo bay robes, ta nos Korpschef pasobra SPA a pone e bala den su scochi pa e cuminsa haci algo. Pero nos no por keda asina aki”, señor Lacle a expresa.

Recientemente, el a remarca, cu cuerpo policial a duna asistencia na un ciudadano cu problema mental cu no tabata inscribi na Respaldo. Sinembargo, polis mester deal cu ne pasobra no tin otro opcion. No tin un samenwerkings protocol entre Respaldo y KPA.

El a indica cu na Hulanda, straatdienst no ta haci e trabao aki mas pero ta cay bou di arestatie team. SPA ta boga pa yega na acuerdonan pa siguridad di polis riba caya. Na Aruba, pa motibo cu no tin otro acuerdo ni procedura, casonan unda tin persona cu salud mental, ta wordo atendi pa polis prome.

“E prome caminda cu pueblo ta pidi yudansa ta directamente na centrale post y no na Respaldo. No tin nada poni preto riba blanco di e procedura cu mester sigui y esaki ta loke KPA mester traha cu ne awendia”, señor Lito Lacle a duna di conoce.

Lito Lacle di Sindicato SPA:

04/06/2026

Dialuna 22 di juni 2026, mas di 600 mucha di scolnan basico di henter Aruba lo subi escenario na Renaissance Convention Center pa e Concierto di Fin di Aña di Leerorkest Aruba.

E concierto ta marca e culminacion di un aña di educacion musical, trabao den team, y desaroyo personal. Alumnonan di diferente scol lo presenta un programa musical diverso, mustrando e progreso cu nan a logra pa medio di e programa Leerorkest Aruba.

E concierto di e aña aki lo conta cu presentacion di alumnonan di klas 3 te cu klas 6, como tambe e Orkesta Despues di Scol. E programa ta inclui un variedad di seleccion musical internacional, caribense y local. Invitado special ta e conductor Patrick de Heus di Hulanda, cu lo dirigi e orkesta durante e concierto. Patrick tin hopi experiencia trahando cu musiconan hoben pa medio di e programa Leerorkest na Hulanda y a pasa henter siman ta ensaya cu e studiantenan como preparacion pa e evento special aki. Segun coordinadora Juliette van Romondt, e concierto ta trata di hopi mas cu musica.

“Tur mucha merece e oportunidad pa descubri nan talentonan y experiencia exito. Pa medio di musica, muchanan ta siña confianza, disciplina, traha den team, y perseverancia. E concierto aki ta un celebracion di tur loke nan a logra durante henter aña.” E evento ta 22 di Juni na Renaissance Convention pa 9’or di mainta.

ORANJESTAD (AAN): Dialuna 22 di juni 2026, mas di 600 mucha di scolnan basico di henter Aruba lo subi escenario na Renaissance Convention Center pa...

04/06/2026

Riba Diaranson, Corte Superior a trata e apelacion di Alvin Alfonso ‘Alan’ Howell, contra su sentencia di dia 24 Maart 2023, caminda el a wordo condena na 24 luna di prizon di cual 6 ta condicional, multa di 35 mil Florin of 120 dia sera y cu 15 mil Florin ta keda confisca. Un abogado di Curacao, mr. Herrera, a bin Aruba pa asisti Howell. Ta asina cu mr. Herrera den pasado tabata Polis na Aruba y despues a bay Curacao. E tabata traha hunto cu Howell. Tambe tabata presente un otro colega Polis cu ta bibando na Bonaire, cu tambe a yuda mr. Herrera prepara e caso.

Abogado ta cuestiona cu investigacion ta ilegal: Na comienso di e caso, mr. Herrera a pidi Hof pa e presenta un demanda preliminar contra Procurador General (PG). Aunke cu PG tabata contra y a bisa cu Hof mester rechaza e peticion, Hof a bay di acuerdo.

Herrera a mustra cu ora Landsrecherche a cuminsa cu e investigacion, Alan Howell tabata Parlamentario. E abogado a bisa cu segun ley mester ta cauteloso cu no ta usa Constitucion pa persecusion politico. El a sigui bisa cu segun ley, Landsrecherche ta cay bao di PG. E abogado a mustra cu un Fiscal a entrega Landsrecherche un rapport di investigacion financiero FIU di transaccionnan cu Howell a haci, a base di sospecho MOT. El a mustra cu for di 2 Februari 2019 e hefe di Landsrecherche a cuminsa haci investigacion siendo cu te na Maart 2019, PG a duna orden pa haci investigacion penal contra Howell. Na opinion di abogado, esey ta trece cune cu tur loke Landsrecherche a haya, no por wordo usa como prueba pasobra e ta inhusto.
E abogado a bisa Hof cu esaki ta un violacion grandi di e proceso husto di un caso. El a mustra cu e fechanan di procesverbaal di Landsrecherche y PG no ta cuadra. Cada un ta referi na otro y esaki ta un violacion grandi den un Estado di Derecho na un pais democratico. Den un pais democratico e pueblo mester por confia cu no tin persecusion politico. E ta haya cu ta un caso serio di ta pone acusacionnan a base di un investigacion no husto. El a pidi Hof pa declara PG no admisibel.

Reaccion di PG: Aki PG a bisa Hof cu a duna orden pa cuminsa investigacion, a base di e rapport di MOT. Segun PG, articulo 3 di Constitucion, Recherche no mester haya orden di PG pa cuminsa investigacion contra un mandatario. Segun PG, e investigacion MOT ta a base di FIU y no tin nada ilegal manera mr. Herrera ta pretende.

Herrera a reacciona cu segun Constitucion di Aruba, un Parlamentario ta un empleado di Gobierno y no ta asina cu por cuminsa investigacion sin tin orden di PG. El a remarca cu mester tin indicacionnan di MOT specifico kico ta e delito pa asina cuminsa investigacion. Den e caso aki MOT no ta specifica nada.
Persecusion politico: Alan Howell a bisa Hof cu durante 5 aña ta ocupa cu e caso y awor pa saca afor cu ta door di cuestionnan politico e caso aki a bin. Segun Howell, door cu el a nenga di forma parti di MEP, e mesun dia a cuminsa un caso penal contra dje. Segun Howell, Evelyn Croes a manda orden y Landsrecherche a cuminsa investigacion. E mesun dia Evelyn Croes a baha Gobierno sin cu a tene un reunion.

Decision Hof: Hof a pospone e caso pa bay evalua. Despues Hof a bisa cu abogado mr. Herrera a trece puntonan hopi importante y PG tambe. Hof a bisa cu e lo tuma decision riba esey pero despues, ora cu caba cu tratamento di e caso completo.

Abogado mr. Herrera a remarca cu segun articulo 316 lid 5, mester tin un decision promer cu cuminsa cu e caso. El a pidi Hof pa skirbi e decision cu Hof a bisa pa asina e lo por haci Casacion o sea apela na Corte Supremo na Hulanda.

Howell ta insisti di ta inocente: Hof a puntra Alan Howell pakico e ta apela. Howell a bisa cu el a consulta cu su abogado mr. Herrera y ta haya cu e caso aki no ta cuadra. El a bisa cu tur placanan cu el a paga tin 2 raport di accountant cu ta splica tur cos. E para riba cu e no a malversa placa.

Hof a puntra Howell si tur loke el a declara na Hues den Promer Instancia, si e ta para tras di nan. Howell a bisa cu e ta para tras di su declaracion. Hof a mustra cu tin investigacionnan adicional cu a haci y tambe a scucha 2 testigo. Hof a bisa cu Howell ta bisa cu no tin nada di violacion di MOT. Hof ta mustra cu ta acusa Howell di malversacion y falsificacion. Corte den Promer Instancia a hay’e culpabel y a conden’e.

Hof a mustra cu durante henter e periodo, e fundacion di partido POR a haya casi mey miyon Florin di Gobierno pa e fraccion POR den Parlamento. Howell a bisa Hof, cu e no a haci nada. El a bisa cu e raport di accountant ta mustra esey claramente. El a splica cu fraccion ta haya placa pa asina por paga e trabaonan cu fraccion tin cu haci.

Hof a puntra, pakico tabata paga cash y no via banco. Segun Howell, tanto e como Marisol Tromp tabata paga cash y no via banco. El a bisa Hof cu na Aruba hopi hende ta paga cash ainda. Segun Howell, e tabata paga su tata cu tabata su consehero. Hof a bisa cu si tabata haci transaccion di banco, esey ta mas facil pa mira. Howell a bisa cu tabata traha recibo y asina tur cos tabata cuadra cu e administracion di fraccion di POR.

Hof a repasa diferente cobranza cu Howell a haci na e fundacion di POR. El a splica cu e tabata paga cosnan di su s**o y despues tabata cobra e partido POR. Howell a splica cu e fundacion yama Blue Love Foundation. Hof a mustra cu e periodista femenino F.B. cu e portal ‘E Arubiano News’, tabata traha pa e fraccion y a haya mas cu 100 mil Florin. Hof a mustra riba e carta 16 April di F.B.

Howell a splica cu el a ripara fayo di van Putten den administracion y e periodista F.B. a cambia e documento cu tabata un calculacion den un cobranza. El a bisa cu e tabata paga e periodista F.B. cash y despues e tabata haya placa bek di e fundacion. Hof a puntra riba e asina yama Sinterklaas Bonus. Hof a mustra cu tabatin mensahe di WhatsApp caminda van Putten y Howell, tabata papia y van Putten a bisa cu e ta haya 1.000 Florin y Howell 10 mil. Howell a remarca cu esey tabata un joke. El a splica cu e mil Florin tabata pa van Putten den caha di administracion y e 10 mil tabata pa paga e portal ‘E Arubiano News’.

PG a exigi pa Hof mantene sentencia: PG a bisa Hof cu e ta exigi pa confirma e sentencia di Corte den Promer Instancia. PG a bisa cu e caso a cuminsa a base di e raport FIU caminda ta señala cu placanan cu fraccion di partido POR tabata haya di Gobierno, tabata bay riba cuenta di Howell. Investigacion a mustra cu mas cu 197 mil Florin a wordo paga na otronan. PG ta haya cu Howell y van Putten a malversa 154 mil Florin. El a mustra cu Howell no tabatin declaracion satisfactorio pakico e tabata paga cash y no transferi placa di e fundacion.

PG a ripiti gran parti di e sentencia di Hues di Corte den Promer Instancia, pa mustra cu Alan Howell ta culpabel y ta exigi pa mantene e castigo. PG a remarca cu despues di 3 aña, e defensa ta presenta un declaracion bao huramento. PG ta puntra con a yega na e declaracion aki. No por investiga esaki. PG a pidi Hof pa no acepta e declaracion aki. PG a bisa cu e no ta kere den e facturanan cu Howell a presenta. PG no ta kere cu Howell a paga ‘E Arubiano News’ asina hopi placa. El a mustra cu e periodista femenino F.B. a duna declaracion na Landsrecherche cu Howell a oblig’e pa skirbi carta cu el a haya hopi placa. PG ta haya cu Howell tabata uza factura di ‘E Arubiano News’ pa e mes haya placa. PG ta haya Howell culpabel di malversacion di mas cu 195 mil Florin y falsificacion di facturanan. PG a pidi Hof pa confirma e sentencia di 24 Maart 2023 di Hues di Corte den Promer Instancia.

Abogado no ta haya cu tin prueba: mr. Herrera a bisa Hof cu e ta haya cu no tin suficiente prueba pa a condena Howell. El a mustra riba e declaracion di e ruman di Howell cu ta splica tur cos tocante pagamento cash. E abogado a bisa Hof cu Howell no a falsifica facturanan pa propio uso di placanan. Na opinion di abogado, e carta di FIU tabata informacion pa cuminsa investigacion. E abogado ta haya cu door di no a haya raport di MOT, a viola e derecho di Howell pa haya informacion pa abogado por haci investigacion.

El a mustra cu a pidi PG diferente biaha pa haya raport MOT pero nada. El a cuestiona e hecho cu Landsrecherche a cuminsa investigacion sin cu tin suficiente informacion y no kier duna e raport di MOT. E abogado ta haya cu mester kita tur e informacionnan di e investigacion. El a señala cu Hof den su decision den e proceso di investigacion, ta mustra cu e raport di FIU no ta motibo pa cuminsa e investigacion, siendo cu PG a usa e raport di FIU pa Landsrecherche haci investigacion. E abogado a remarca cu FIU ta haya cu e transaccionnan di placa pa fraccion di POR, no por wordo usa pa otro cosnan. Howell ya ta haya un entrada. FIU ta haya remarcabel cu ta usando placanan di e fraccion pa paga otro cosnan. Abogado a mustra cu tin acuerdo firma entre fraccionnan y Gobierno pa cu usamento di placanan di fraccion. Na opinion di abogado mr. Herrera, esaki ta mustra cu no tin un hecho castigabel. E ta haya cu Landsrecherche a bin cu acusacionnan cu no ta cuadra. E abogado ta haya cu a tacha e bon imagen di Howell.

E abogado a señala cu e rapport di Landsrecherche no tin nada otro cu e contenido di e raport di FIU y ningun investigacion! El a mustra cu e fundacion di POR a haya te na 2018 pago di fraccion cu forza retroactivo. El a bisa cu e pago na Fonso Advicesary, ta e tata di Howell tabata conseha Howell y Howell tabata paga su tata. Tin acuerdo entre fraccionnan y Gobierno cu e hendenan cu ta traha pa fraccion no mester declara na Belasting. E abogado a bisa cu ta increibel cu e dama F.B. cu a traha un calculacion pa trabaonan cu el a haci durante 2 aña, a bay bisa Landsrecherche cu Howell a force traha un carta, siendo cu el a bay di acuerdo pa traha un factura nobo.

E abogado a remarca cu e pagonan a wordo haci cash y no ta asina cu mester haci transferencia. Como tal no por bisa cu a falsifica facturanan. El a mustra cu Marisol Tromp tambe a pidi placa cash di fundacion. Segun e abogado, Marisol Tromp a bisa cu Gobierno a paga laat y Marisol Tromp tabata kier su placa cash pa asina e paga e hendenan cu a traha p’e. El a paga su ruman Lelicia Tromp pa publicacionnan cu a haci. E abogado a bisa cu e lidernan di fraccion mes mester a paga di nan s**o pasobra Gobierno a paga laat. Abogado ta puntra cu si esaki ta wordo considera malversacion di placa.

E abogado a pidi Hof pa destrui e sentencia contra Howell y declara PG no admisibel. mr. Herrera ta haya cu mester declara Howell liber.

Hof a bisa cu lo tuma 5 siman pa studia e caso bon. Dia 8 Juli 2026 lo sera tratamento di e caso na Curacao y via video conference lo dicta sentencia pa 1:45 pm.

Abogado a cuestiona cu e investigacion ta ilegal

03/06/2026

Señora Julie Wever, Director Tecnico y Comercial di FCCA (Fundacion Cas Comunidad Arubiano), a elabora den entrevista cu DIARIO, tocante e mantenimento di e casnan di FCCA, cu ta un aspecto hopi importante, tanto pa e famia como pa e bario.

“FCCA tin su plan cu e ta haci pa e temporada largo di cinco aña, unda ta prepara ki mantencion ta haci pa e periodo venidero. Y tambe nos ta trahe pa cada aña, pa zorg pa nos tin nos presupuesto tambe, pa cu esaki.

“Nos ta trahando duro pa nos parti strategico, y esaki ta cu nos ta bish*tando tur e casnan di nobo, pa cuminza drecha e parti pafo y tambe e landscaping. Pa e parti pafo, nos ta bisa nos ta zorg pa bentana, portanan ta wordo cambia, y nos a dicidi pa haci asina aki tambe, pa mas lihe posibel pa nos zorg pa tur e barionan ta bon den otro. Pues, cu e mantencion ta bon”, Julie Wever a señala.

Wever a sigui splica cu drecha un bario ta tuma hopi mas cu solamente drecha e cas. “E ta tuma di nos tambe cu ta biba den un cas pa yuda mantene bo cura. Esaki ta parti tambe, di e responsabilidad di cada un di nos cu ta biba den un cas. Esey ta conta pa nos tur; bo ta mantene rond di bo cas nechi”, el a expresa.

Señora Wever a agrega cu un bario di FCCA ta consisti di diferente elemento: bo tin e cas, tin e partinan cu ta responsabilidad di FCCA cu ta e landscaping, pero tambe e caminda y e acera, cu ta parti di e partnership cu Gobierno pa e convenio aki tuma lugar na tempo.

“Pues nos ta den palabracion cu Gobierno con nos por mehora e aspecto aki hunto”, Julie Wever a señala.

Julie Wever, Director Tecnico y Comercial:

03/06/2026

Presidente di Parlamento di Aruba, Marlon Sneek, ta invita tur ciudadano di Aruba pa nomina hoben ehemplar y talentoso pa e Premio Hala di Shoco di Parlamento 2026.

E Premio Hala di Shoco ta un reconocimento especial cu Parlamento di Aruba ta entrega na hoben cu, door di nan liderazgo, dedicacion y aportacion positivo, ta sirbi como ehempel inspirador pa otro hoben y pa comunidad.

E Hala di Shoco ta simbolisa hubentud cu sabiduria, ambicion y liderazgo. Cu e premio aki, Parlamento di Aruba kier honra hoben cu a contribui significativamente na desaroyo di nos comunidad y nos pais.

Ciudadanonan por entrega nan nominacion door di bay na e website di www.parlamento.aw

Por entrena nominacion entre 3 di juni 2026 te cu 3 di juli 2026. Parlamento ta haci un yamada special na scolnan, organizacionnan no gubernamental y otro institucionnan cu ta traha cu hoben pa nomina hoben talentoso cu nan ta considera como bon ehempel pa otro.

Pa cualifica pa e Premio Hala di Shoco, e nominado mester cumpli cu e siguiente criterianan: (*) E nominado mester tin nacionalidad Hulandes y/of a biba na Aruba pa un periodo continuo di minimo 10 aña y tabata registra na e registro civil durante e periodo aki. (*) E nominado mester tin entre 15 pa 24 aña. (*) E nominado mester a aporta na desaroyo di comunidad y pais. (*) E nominado mester a demostra capacidad di liderazgo y habilidad pa motiva otro hende.

(*) E aportacion y logronan mester a tuma luga den e ultimo cinco añanan. (*) E contribucion mester a wordo haci den capacidad personal y no como funcionario di gobierno nombra of eligi.

Proceso di seleccion: Un comision consistiendo di un Miembro di Parlamento di cada fraccion representa den Parlamento lo evalua tur nominacionnan y selecciona tres finalista.

Durante e reunion di seleccion, tur Miembro di Parlamento lo scoge e ganador di e Premio Hala di Shoco di Parlamento basa riba e recomendacionnan di e comision.

Tradicionalmente, e premio ta wordo entrega durante e Apertura di Aña Parlamentario na e hoben ganador.

Presidente Marlon Sneek a enfatisa cu Aruba tin hopi hoben cu talento, perseverancia y deseo sincero pa contribui positivamente na sociedad. “Cu e Premio Hala di Shoco nos kier pone den centro di atencion e hobennan cu ta haci diferencia y cu ta inspira otro pa sigui nan soño y traha pa un mihor Aruba,” asina Sneek a declara.

ORANJESTAD (AAN): Presidente di Parlamento di Aruba, Marlon Sneek, ta invita tur ciudadano di Aruba pa nomina hoben ehemplar y talentoso pa e Premio...

03/06/2026

Parlamentario Evelyn Wever-Croes a splica den un comunicado cu Secretario di Estado Eric van der Burg a declara

publicamente cu e, como Prome Minister, a duna instruccion na ambtenaarnan pa prepara HOFA. E ex-Prome Minister a enfisa cu esaki no ta berdad.

E hechonnan ta documenta y disponibel publicamente:

E iniciativa pa un Rijkswet di supervision financiero pa Aruba a bini for di banda Hulandes bou di Secretario di Estado Raymond Knops.

E Raad van State di Reino a duna su conseho riba e proposicion dia 10 di maart 2021. E proposicion a wordo entrega formalmente na Tweede Kamer dia 9 di februari 2022. Knops mes a confirma cu esaki tabata su meta: establece un supervision financiero via Rijkswet pa Aruba.

Tur esakinan por wordo verifica den e documentonan oficial di parlamento y e conseho di Raad van State di Reino.

Parlamentario Evelyn Wever-Croes ta spera di un Secretario di Estado cu ta encarga di Relacionnan di Reino cu e ta basa su mes riba hecho.

ORANJESTAD (AAN): Parlamentario Evelyn Wever-Croes a splica den un comunicado cu Secretario di Estado Eric van der Burg a declara

03/06/2026

Cuerpo Policial Aruba conhuntamente cu Ministerio Publico ta informa comunidad riba e resultado di e campaña di e entregamento di arma di candela ilegal interinsular pa Aruba.

Manera a wordo anuncia anteriormente, desde 24 di maart 2026 te cu 24 di mei 2026, tabatin e oportunidad pa deposita arma di candela ilegal, piesa, of municion (bala cayente) den e containernan blauw situa na San Nicolas y na Oranjestad.

Durante e periodo menciona tabatin e posibilidad di entrega esakinan di forma anonimo y sin risico di wordo persigui penalmente.

Durante e campaña “Entreg’e of Nos ta Bin Busc’e”, un total di 3 arma di candela y 359 bala cayente a wordo deposita den e containernan blauw.

E armanan tabata entre otro: (*) Un Beretta di 9mm. (*) Un Wi******er 255. (*) Un C**t .38.

Loke ta municion tabata 5 bala di 9mm, 332 bala di .22(caliber), y 22 bala di .38(caliber).

Traha cu 3D Printer: Pa loke ta trata e combatimento di posesion di arma di candela ilegal a traves di investigacion policial, abase di datos di Ministerio Publico desde 1 december 2025 te cu 29 mei 2026 e cifranan ta lo siguiente;

Un total di 40 sospechoso a wordo deteni. A confisca 13 arma di candela, cual 2 tabata traha cu 3D printer.

Di e 40 sospechosonan 9 a ricibi castigo. E resto di sospechosonan ta wardando nan caso bin dilanti den corte.

Cuerpo Policial Aruba y Ministerio Publico ta enfatisa cu e tempo pa entrega arma di candela boluntariamente a pasa. Awor lo sigui combati posesion ilicito di arma di candela severamente y ta pasa pa e siguiente fase di “Nos ta bin busc’e”.

KPA ta haci un apelacion na comunidad cu si bo sa algo of a wak algo yama e Tiplijn di Polis na 11141. Bo yamada ta keda totalmente anonimo. Bo NO a entreg’e, awo nos ta bin busc’e.

‘Entreg’e of Nos ta Bin Busc’e’

03/06/2026

Diamars mainta dos Procurador General (PG) a presenta nan punto di bista riba e apelacion den Hof, encuanto caso Flamingo. Por a constata cu e dos Procurador General, a mantene e mesun castigo cu a exigi na November 2024 pa e tres sospechosonan, Esser, Wever y e ex-minister Otmar Oduber.

Tur tres pasando dificil: Promer cu PG a hiba palabra, Hof a puntra e tres sospechosonan di nan circunstancia personal. Wever a bisa Hof cu desde Januari 2026 e no ta trahando y recien DIP a mand’e decreto ministerial cu e ta haya retiro. El a bisa cu su situacion no ta facil y tin basta stress.

Esser a bisa Hof cu e ta sigur cu e no a haya placa pa yuda hende. El a bisa cu e ta depresivo y ainda ta hayando tratamento. Esser a bisa Hof cu door di e caso aki el a bira malo y e ta hopi tristo.

Otmar Oduber a bisa Hof cu door di stress el a sufri ulcera y mester a wordo opera. El a confronta problema financiero caminda el a perde su proyecto Bochincha. Actual e tin trabao pero e tin cu traha scondi. El a mustra cu banco a yama su doño y bis’e pa paga tino cu Oduber.

PG: No tin persecusion politico: E ora PG a cuminsa na bisa cu cada vez den casonan contra politico cu a fungi como minister of un funcion importante den Gobierno, ta pinta Ministerio Publico di persecusion politico. Esaki tambe ta e caso cu caso Flamingo.

PG a bisa Hof cu Ministerio Publico ta haciendo su trabao a base di denuncia cu ta wordo haci. Mas ainda e hecho cu ultimo tempo ta persiguiendo diferente politico. PG a enfatisa cu Ministerio Publico ta siego pa color politico.

Pakico a apela sentencianan: PG a bisa cu den caso Flamingo, ta trata di un Minister cu a tuma hendenan den servicio y Gobierno tabata paga salarionan halto, sin cu e hendenan tabata traha. Tambe cu un Minister ta pasa tereno na hendenan. Esey tabata motibo cu ta persigui Oduber. Den promer instancia Hues a declara Oduber liber pa un parti di acusacionnan.

PG a apela pasobra e no ta haya cu a haci husticia. Tambe den caso Esser a apela pasobra PG no ta haya cu a haci husticia. PG a pidi Hof pa considera e requisitorio di den Corte den Promer Instancia como presenta den Corte Superior.

PG a mustra cu den Promer Instancia, e defensa di Oduber a bisa cu mester declara Ministerio Publico no admisibel pasobra no a hiba un proceso husto. PG a bisa cu e no ta haya cu e investigacion ta inhusto. El a mustra cu e defensa a cuestiona cu e denuncia di Marisol Tromp no ta husto. Di parti di Wever, abogado a mustra cu mester declara Fiscal no admisibel pasobra Wever a traha bou orden di Oduber. PG a muster cu Hues a rechaza tur dos defensa den Promer Instancia.

Malversacion di Gobierno: PG ta haya cu Oduber a malversa Gobierno. PG a menciona cu Oduber y Esser a haci esey cu e empleadonan fantasma. PG a mustra cu Hues a bisa cu mal uzo di funcion ta ora cu Minister ta duna orden pa haci algo cu no ta bon.

PG no ta comparti opinion di Hues pa a declara Oduber y Esser liber di mal uzo di funcion. Ta pesey a apela.

Pasamento di tereno na amigonan: Den caso Malmok, ta sospecha Wever di a traha carta falso mientras cu Oduber a pasa tereno pa hendenan. PG a bisa cu Wever y Oduber ta wordo sospecha di a malversa Gobierno door di duna tereno na F. y e dama C.

PG a mustra cu mientras DIP tabata atende cu peticion di terenonan di 2012, a pasa tereno na G. na 2016. Un aña despues 2017, e dama C. cu ta pareha di e amigo di Oduber, M., a manda peticion pa e mesun tereno cu G. a haya. A viola e mesun reglanan cu Oduber a introduci. E homber F. na 2014 a haci peticion y na 2019, F. ta haya tereno na Malmok. F. a bisa cu el a pidi M. pa pidi Oduber si por regla tereno p’e. Na Mei 2019 tanto F. y C. ta haya tereno, siendo cu ainda C. no a haya tereno reserva. F. ta haya reserva di tereno sin cu el a presenta financiamento. 10 luna despues cu el a haya tereno, el a presenta financiamento.

A kita terenonan cu a pasa: PG a mustra cu ora Oduber a retira como minister, tanto e tereno di F. y C. a wordo kita na Maart 2023. PG a mustra Hof cu Hues a rechaza defensa di Oduber y Wever pa cu e asunto di pasamento di tereno na Malmok.

Na opinion di PG, ta un hecho cu Oduber a viola su mesun maneho stipula pa dunamento di tereno y a facilita F. y C. tereno. Ta bisto cu esnan cu conoce e minister Oduber, ta haya trato preferencial. PG ta haya cu Wever tabata sa cu Oduber no tabata actuando manera e maneho cu a keda stipula. Oduber a bisa Wever pa pasa e terenonan na F. y C. kitando esun di G.

PG a bisa cu a pesar cu defensa a bisa cu Wever a traha bou instruccion di Minister, Hues ta haya cu Wever ta culpabel. Hues a haya Wever culpabel di complice di malversacion. Oduber a percura pa su amigonan haya tereno preferencial y kita tereno di G. caminda Oduber a firma caba pa G. haya e tereno. PG ta considera cu tanto Oduber como Wever a abusa di nan funcion.

Trahadornan fantasma: PG a bisa cu ta acusa Oduber di a malversa y haci mal uzo di funcion door di duna Phillips, Tiel y Geerman trabao. PG a bisa Hof cu e no ta di acuerdo cu Hues a declara Oduber liber di a wordo cumpra door di Phillips y Tiel. PG a mustra cu tanto Phillips y Tiel a haya un salario a base di loke Oduber a dicidi.

Na opinion di PG, e forma di tuma hendenan den servicio sin cu tin control, ta un mal uzo di e systema di Gobierno. Entre 2018 y 2020, Phillips a gana masha hopi placa sin cu e tabata presenta na trabao. Phillips mes a bisa Landsrecherche cu e no mester traha y no mester duna cuenta. E tabata na Colombia pa un tempo. E hecho cu no tabatin descripcion di trabao, no tabatin control si Phillips tabata traha. PG a bisa cu Phillips tabata gana mucho mas placa cu realmente e mester haya.

PG a mustra cu segun Phillips el a wordo tuma door di Oduber pasobra e tin boca grandi y e ta para tur politico. Corte a condena Phillips cu e mester paga bek e placanan cu el a haya. Phillips a apela e sentencia. Segun PG, tin un persona cu a bisa cu e sa mira Phillips na Pos Chiquito na oficina di City Inspector. PG ta kere cu ta Oduber a yama e persona pa declara asina cu Phillips tabata bay na e oficina. El a mustra cu Tiel tambe tabata haya hopi placa y no tabata traha. El a mustra cu Esser a manda mensahe pa Tiel pa e bisa cu e tabata inspecciona casnan bandona.

PG a mustra cu Tiel tabata yuda e yiu di Oduber cu su negoshi, bendiendo bebida alcoholico. El a mustra cu Oduber y Tiel a wordo condena di malversa Gobierno y ta haya cu mester mantene esey. Tiel a wordo condena pa paga Gobierno bek. PG no ta di acuerdo cu Hues no ta haya cu Tiel a cumpra Oduber. El a mustra cu tin yamadanan entre Tiel y e yiu di Oduber y Tiel tabata traha pa yiu di Oduber. PG ta haya cu Tiel a cumpra Oduber caminda Oduber a tuma Tiel pa e traha pa e yiu di Oduber. Tambe PG ta haya cu Oduber a abusa di su funcion pa cu Tiel y Phillips. PG ta di acuerdo cu sentencia di Hues cu Oduber no a abusa di su funcion cu Geerman.

E caso Esser, PG ta haya cu Esser a haya placa pa yuda hendenan cu a yuda den campaña. PG ta considera esaki di a cumpra den forma pasivo. E ta haya cu Esser a wordo cumpra door di Vito Croes pa yuda Vito Croes cu e situacion di tereno pa proyecto. Esser a yuda hende haya trabao den Gobierno. Varios di e hendenan a haya trabao na Serlimar y DOW. Tambe tin persona a haya trabao na DIP. PG ta considera esaki, mal uzo di funcion.

Caso Flamingo ta corupcion: PG ta haya cu den caso Flamingo ta un organizacion criminal mescos cu casonan di droga. E Minister tabata paga hendenan cu a yuda den campaña y a percura pa nan haya trabao den Gobierno. PG ta haya cu Oduber y Esser a hunga papel importante den esaki. E ta haya cu aki por papia di un forma di corupcion.

PG a exigi castigo: PG a bisa Hof cu e ta haya Wever culpabel y ta exigi pa Hof mantene e exigencia den Promer Instancia cu ta 240 ora di trabao of 120 dia sera. 6 luna di prizon condicional cu 3 aña di prueba.

PG ta considera Esser e persona di confianza di Otmar y a exigi 18 luna di prizon

Pa Oduber, PG a exigi e mesun castigo cu den Promer Instancia esta 3 aña di prizon y cu pa 6 aña, Oduber no por tin ningun funcion den Gobierno.

Diahuebs ta dia cu e abogadonan lo hiba nan defensa y diabierna ta dia cu lo tin reaccion di PG y abogadonan. Despues Hof lo fiha un fecha pa sentencia.

Requisitorio di Ministerio Publico

Diario Aruba

04/06/2026

04/06/2026

04/06/2026

04/06/2026

03/06/2026

03/06/2026

03/06/2026

03/06/2026

03/06/2026

Adres

Openingstijden

Telefoon

Website

Meldingen

Contact

Snelkoppelingen

Delen

Type

Maandag	09:00 - 17:00
Dinsdag	09:00 - 17:00
Woensdag	09:00 - 17:00
Donderdag	09:00 - 17:00
Vrijdag	09:00 - 17:00