Diario Aruba

05/09/2026

E sector di construccion na Aruba ta enfrentando un problema serio di control y supervision, mientras tanto proyectonan chikito como grandi ta sigui crece riba nos isla. Segun un e lider sindical di STA, señor Diego de Cuba, e departamento di Gobierno DOW, cu den gran parti ta esun responsabel pa control di construccion, no tin suficiente personal pa controla tur proyecto cu ta andando.

Pa motibo ey, ta necesario pa Gobierno considera expansion di e servicio, reorganisacion di e proceso di inspeccion y un sistema mas eficiente pa garantisa cu reglanan di construccion y siguridad ta wordo cumpli.

El a menciona cu e preocupacion no ta solamente calidad di construccion, sino tambe siguridad laboral. E sector tin mester di control mas fuerte pa proteha tur trahador y reduci riesgo di accidente riba sitio di construccion.

Un otro punto importante ta escases di man di obra cualifica. Segun e lider sindical, eliminacion di scolnan di ofishi na Aruba tabata un paso cu a laga consecuencia grandi. Cu cambio di economia despues cu Lago a cera, pa un modelo principalmente orienta riba turismo, Aruba a perde parti di su capacidad pa forma suficiente profesional tecnico y di ofishi. Como consecuencia, mercado a bira cada biaha mas dependiente di trahadornan importa di exterior. Y esaki a bira un free for all, segun de Cuba.

E falta di personal cualifica, crecemento acelera di construccion y demanda halto tambe tin impacto directo riba costo di vivienda.

Por conclui cu, Gobierno mester fortalece supervision, inverti den formacion profesional y crea un maneho di construccion y vivienda cu ta sostenibel. Si no actua awor, falta di control, personal cualifica y vivienda pagabel por sigui aumenta, cu consecuencia directo pa trahador, consumidor y futuro economico di Aruba.

Segun señor Diego de Cuba di STA:

05/09/2026

Diabierna den oranan di atardi, un grupo di tour operators a tuma accion pa expresa nan malcontento

tocante e clausura di e ruta California Lighthouse - Alto Vista na Juni y con e situacion actual ta afecta nan trabou.

E grupo, cu a bay protesta cu un cantidad grandi di vehiculonan UTV y ATV rond di e Rotonde Las Americas, kier yega na un dialogo directo cu Gobierno pa busca un solucion na e problema y yega na un acuerdo cu por beneficia tur e partinan involucra.

Durante e accion, e manifestantenan a expresa nan preocupacion tocante e decisionnan cu ta relaciona cu ceramento di acceso na un gran parti di costa nort di Aruba, un area cu ta importante pa e sector turistico y pa e actividadnan di tour operators.

Grupo Tour Operators Uni a bati alarma e siman aki riba e ceramento di e ruta y e caso cu lo wordo trata den Corte dia 10 di September venidero entre Aruba Birdlife Conservation contra Pais Aruba y Aruba Conservation Foundation (ACF) - Parke Arikok. Nan ta kere cu e decision por tin consecuencianan negativo pa hasta nos hendenan mes! E por exclui tur vehiculo di motor pa drenta loke ta wordo considera un ‘natuurgebied’, manera Duin di California & Saliña Tierra del Sol; Tera Cora & ‘Noordoostkust’ y Tres Trapi.

ORANJESTAD (AAN): Diabierna den oranan di atardi, un grupo di tour operators a tuma accion pa expresa nan malcontento

05/09/2026

E bukinan aki ta disponibel!!! Pasa awe mes! Entrada via e hanchi na banda.

04/09/2026

E bukinan aki ta disponibel! ‼️Entrada via e hanchi na banda‼️

04/09/2026

Durante e reunion un di e puntonan cu a bin dilanti ta e situacion di Maritieme Politie, cu actualmente ta confrontando reto pa loke ta trata material y ekipo cu nan mester pa por ehecuta nan trabao.

Minister Cicilia a indica cu esaki ta un asunto cu ya tin su atencion y cu el a reuni cu Minister di Husticia, Arthur Dowers. Maritieme Politie ta cay bou di responsabilidad di Husticia, y p’esey ta importante cu tin coordinacion entre e ministerionan pa mira con por atende e necesidadnan cu a wordo identifica.

“Nos a haya e noticia placentero cu lo bay duna atencion na Maritieme Politie den e presupuesto binidero. A aloca fondo pa reemplasa e boto, a aloca fondo pa sigui fortifica e ekiponan cu Maritieme Politie tin na su disposicion, pa nan por sigui efectua miho control tambe”, e minister a bisa.

El a menciona cu ora ta trata di control riba lama, Maritieme Politie tin e regie den su man pa efectua e controlnan aki. Lo cual ta un responsabilidad comparti di diferente instancia, pero tambe cada un tin su tarea y mester cumpli cu e tarea aki debidamente.

E minister a enfatisa cu mester traha pa mehora ta comunicacion y e compartimento di informacion entre e instancianan cu ta responsabel cu siguridad riba lama. Un meta di esaki ta pa evita incidentenan cu ta pone e sector turistico den luz negativo.

Minister Cicilia ta menciona cu den nos ley y regulacion ta poni cu si un persona of compania di watersport tin un conducta cu ta contra ley, un vaargedrag iresponsabel, si esaki wordo identifica, por perde su permiso.

Tambe, por ehempel, si no tin un spotter on board, si no tin propeller guard na ordo, si ta subi lama bou di un of otro tipo di influencia, por perde permiso pa opera. Riba e aspectonan tecnico, e minister a enfatisa cu cada seis luna e botonan ta wordo revisa pa Directie Scheepvaart.

“Y esaki ta e mensahe cu nos kier comunica: cu e ta un responsabilidad colectivo, comparti di Gobierno, di Maritieme Politie, di Scheepvaart, pero tambe di e propio propietarionan di watersportvergunning, cu ta esnan cu tin e permiso, y ta esnan cu ta ultimamente responsabel. Y bo por perde bo permiso si acaso bo no ta cumpli cu e ley y regulacionnan cu tin riba papel e momento aki. Pasobra bo conducta iresponsabel riba lama ta trece bo propio bida na peliger, di esnan cu bo ta brindando e servicio, den e caso aki sea local of bish*tante, pero tambe e usuarionan di nos awanan territorial”, Minister Cicilia a enfatisa.

Minister Wendrick Cicilia:

04/09/2026

Buki di storia pa mucha, novela, Historia di Aruba… tur na Papiamento!

04/09/2026

E origen di preocupacionnan cu a surgi den e dianan aki relaciona cu acceso na cierto ruta pa tour guides y operadornan di UTV y ATV, Minister di Vivienda, Infrastructura, Servicio Interno y Telecomunicacion, Rene Herdé, a tuma iniciativa pa reuni cu e sector y atende e situacion den un ambiente di dialogo habri.

Algun operador a expresa nan malcontento publicamente den media. Gobierno ta comprende e preocupacion cu cualkier cambio cu por afecta un ruta di tour por causa entre empresarionan y trahadonan den e sector. P’esey, desde cu e situacion a presenta, Minister Herdé a busca pa atende e asunto cu prioridad y crea espacio pa scucha e diferente partidonan envolvi.

Minister Herdé kier aclaria cu Gobierno no tin intencion di stop operacion di UTV of ATV, ni di elimina trabou di ningun persona den e sector. E meta ta pa yega na un maneho balansa, cu ta tene cuenta tanto cu continuidad di actividad economico como cu e otro interesnan cu mester considera den uzo di e area.

E situacion cu a genera e preocupacionnan a surgi debi na un caso lanta di parti ABC contra Gobierno pa pone fin na e tour- of operacionnan di UTV y ATV. Gobierno, sinembargo, a reconoce e impacto cu e situacion por tin pa e sector y a actua pa busca un solucion practico y tene na cuenta e interes di tur partido envolvi.

Como parti di e solucion, Departamento di Obra Publico (DOW) y Departamento di Infrastructura y Planificacion (DIP) a traha riba un ruta alternativo, cu intencion di ofrece un solucion cu por mantene acceso necesario y na mes momento atende e situacion cu a presenta.

Dialogo cu e sector

Diabierna 4 di september, Minister Herdé lo tene un “Encuentro cu Minister” cu companianan y operadornan concerni. E encuentro lo tuma luga di 2:00 PM pa 4:00 PM na John F. Kennedy Education Center, cu intercambio di informacion riba ruta pa UTV como tema central.

E reunion ta brinda oportunidad pa e operadornan comparti nan preocupacionnan, experiencia y sugerencianan directamente, mientras Gobierno por informa riba e pasonan cu ta tumando y e alternativa den preparacion y kita tur mal informacion circulando.

Pa Minister Herdé, dialogo ta esencial specialmente ora un decision of situacion por tin consecuencia pa personanan y organisacionnan cu ta depende di un sector como nan entrada. E intencion no ta pa cera porta, sino pa sinta na mesa, scucha e sector y busca un solucion balansa y realistico.

Gobierno ta consciente cu tour guides y operadornan di UTV y ATV ta forma parti di e actividad turistico y economico di Aruba. E proceso cu ta sigui awo ta enfoca riba yega na un alternativa cu ta tene cuenta cu e diferente interesnan, sin perde di bista e personanan cu nan trabou y nan pan di cada dia cu ta conecta directamente cu e actividad aki.

*Gobierno no tin intencion di stop operacion di UTV of ATV

04/09/2026

E Arubiano Ulrich Peña ta prepara pa participa den Swim to Fight Cancer Nijmegen, un evento deportivo cu ta uni cientos di participante cu un meta comun: recauda fondo pa investigacion cientifico y prevencion di cancer.

Diadomingo 6 di september 2026, Peña lo drenta e awa di Spiegelwaal na Nijmegen pa landa un distancia di 1,5 kilometer. Participantenan por landa distancia di 500, 1.500 of 3.000 meter, cada un na su propio ritmo y cu apoyo di famia, amigonan y donantenan.

Peña, kende a studia na Hulanda y actualmente ta traha na AstraZeneca Nijmegen, a dicidi di acepta e reto pa di dos aña pa aporta na e lucha contra cancer. Riba su pagina di recaudacion, e ta subraya cu investigacion ta crucial pa desaroya miho metodo di deteccion y tratamento.

“Cada euro ta conta. Hunto nos por haci un gran paso den e lucha contra cancer,” ta e mensahe cu Peña ta comparti cu tur cu ta desea di haci un donacion.

Yamada na comunidad Arubiano: Pa Ulrich Peña, e participacion aki no ta solamente un reto deportivo, sino tambe un oportunidad pa representa Aruba y un esfuerso pa mobilisa comunidad di Aruba tambe pa un causa cu ta toca hopi famia.

Comunidad Arubiano, tanto na Aruba como na exterior, ta wordo invita pa sostene su esfuerso personal cu un donacion. No tin un suma minimo obligatorio: cada aporte, grandi of chikito, ta contribui na financia investigacion cu por yuda mehora diagnostico, tratamento y posibilidad di cura.

Peña su meta personal ta pa recauda €300. Por haci un donacion directamente via e pagina oficial di Ulrich Peña cu ta obtenibel riba e pagina general di fightcancer.nl.

Cu cada donacion, comunidad por duna Ulrich un empuhe adicional pa completa su 1,5 kilometer y, na mes momento, contribui na un futuro cu miho investigacion y mas posibilidad pa sobrevivi cancer.

Na Hulanda

04/09/2026

E hoben Q.P. di 19 aña, Diahuebs mainta a scucha Hues bisa cu e ta haya proba cu Q.P. tabatin potretnan di armanan cu ta parce berdad. Hues a bisa cu e ta duda cu tin di e armanan ta real y esey a haci cu el a baha e exigencia di Fiscal di 24 luna di prizon.

Tratamento di e caso a tuma lugar 25 Augustus 2026 caminda e acusacion cu Fiscal a presenta contra Q.P. ta cu entre 27 April y 3 Juni 2026 e tabatin potretnan di pistol- y revolvernan den su smartphone. En total tabatin 17 potret.

Exigencia di Fiscal: Fiscal a bisa cu e ta tene cuenta cu Q.P. ta promer biaha cu e ta cay den man di husticia pa un caso serio asina. El a mustra cu tin maneho stipula di Minusterio Publico.

Fiscal a bisa cu no ta tolera cu tin arma ta circula. El a mustra riba e actitud di Q.P. di no kier bisa nada di e otro dos armanan cu e tin scondi. Fiscal a exigi 24 luna di prizon di cual 6 luna ta condicional cu 2 aña di prueba.

Sentencia: Diahuebs mainta Hues a bisa cu el a evalua leynan, entre otro riba e ponencia di abogado encuanto informacion anonimo. Hues a mustra cu ley ta bisa cu un informante anonimo mester duna suficiente informacion valioso y concreto. Hues ta haya cu esey ta e caso y Ministerio Publico por a cuminsa investigacion. Esey ta haci cu e investigacion ta husto.

Hues a mustra cu a base di observacion y informacionnan, Polis por a para Q.P. y listra e auto y confisca e smartphonenan. Hues a rechaza defensa di abogado tanto cu e investigacion ta inhusto, como cu no por usa e potretnan den cellular.

Hues ta haya legalmente proba cu Q.P. tabatin potretnan den su cellular pero no por bisa cu ta armanan di candela. Hues a bisa cu e ta duda cu ta arma di candela real.

Hues ta haya proba cu Q.P. tabatin obhetonan cu ta parce arma cu por usa pa menaza hende. En todo caso tin 3 potret cu ta parce na arma di candela real.

Pa cu e castigo, Hues a bisa cu e ta tene cuenta cu sentencianan di Hof, cu ta bisa cu si no ta un arma di berdad, mester baha castigo. Tambe Hues a tene cuenta cu Q.P. ta promer biaha cu e ta cay sera. Hues a cuestiona e hecho cu Q.P. no kier a bisa unda e armanan fake cu e tin scondi ta. Hues a condena Q.P. na 6 luna di prizon di cual 3 luna ta condicional cu 3 aña di prueba.

Hues a sigui bisa cu pa loke ta e articulonan cu a keda confisca, e cellular den cual cu a haya e potretnan y videonan di arma lo keda confisca. E otro smartphones, tas y otro cosnan lo wordo debolbi. Hues a bisa cu e droganan no lo wordo debolbi y tampoco e atributonan pa cu uzo di droga.

Hues ta haya cu e armanan ta real

03/09/2026

E Ley HOFA ainda ta un preocupacion grandi pa Sindicatonan Uni”, segun e lider sindical mr. Hose Figaroa a duna di conoce, den entrevista cu Matutino DIARIO. Esey ta e tema cu Dialuna nan a trata durante nan reunion.

“Nos a manda diferente carta pa Gobierno, specificamente pa Minister Presidente tambe, den cual nos a pidi pa un reunion, tocante e asunto aki, specialmente mirando e hecho cu ya casi dos luna pasa, Minister Presidente a declara cu tin e negociacionnan cu ta andando cu Hulanda, pa loke ta trata cierto ahustenan den e HOFA ey, aunke nos puntonan di salida ta keda, cu nos tin ningun tipo di necesidad pa bin cu un rijkswet at all.

Nos lo kier toch papia cu gobierno, intercambia di idea riba kico ta eigenlijk loke nan ta mira como e ahustenan cu nan lo kier haci, y esey nos kier haci prome cu yega na palabracionnan concreto cu Hulanda”, e lider sindical mr. Hose Figaroa a menciona. Figaroa a sigui splica cu nan a palabra ayera, cu nan ta bay bolbe manda recordacion pa Minister Presidente, y nan ta spera cu na corto plazo nan por haya un audiencia den cual e sindicatonan kier combersa specificamente riba kico ta e proposicionnan cu kier haci na Hulanda y explora atrobe e posibilidad di cambia e direccion cu nos ta bayendo aworaki, pa no bay papia di regula supervision financiero a base di un ley di Reino, pero pa mantene esaki na nivel local.

“Y negocia cu Hulanda kico ta e posibilidadnan pa mantene tur of parti di e beneficionan financiero cu nan ta dispuesto pa duna, cu nos mester entrega di nos banda, manera nos a palabra, un parti di nos autonomia parlamentario door di regula esaki pa medio di un rijkswet”.

Lider sindical Sindicatonan Uni, Hose Figaroa: