10/01/2025
Bu ilin yanvar ayının 7-də ölkə prezidenti İlham Əliyevin yerli televiziya kanallarına növbəti bir uğurlu müsahibəsi oldu.
Prezident bu müsahibəsi ilə keçən ilin iqtisadi inkişaf baxımından yenə də uğurlu il olduğunu və bunun təməlində düşünülmüş siyasət dayandığını vurğulayaraq Azərbaycanımızın gündən-günə gücləndiyini, COP29-un ölkəmizin beynəlxalq aləmdəki nüfuzunun bir göstəricisi oduğunu bir daha bəyan etmiş oldu.
Eyni zamanda, son günlər mənfur qonşumuzun silahlanmasının yeni gərginliyə səbəb olacağını haqlı olaraq qeyd edən müzəffər Ali Baş Komandan “Biz bunu istəmirik. Biz sülh istəyirik. Biz istəyirik ki, artıq müharibə səhifəsi bağlansın. Ancaq görürük ki, Ermənistanın həm özü, həm onun yeni havadarları bunu istəmirlər. Onlar revanşist fikirlərlə yaşayırlar və Ermənistan faktiki olaraq bölgə üçün bir təhdid mənbəyidir. Bir daha demək istəyirəm ki, biz, sadəcə olaraq, müşahidəçi kimi buna tamaşa edəsi deyilik. Ermənistan silahlanmanı dərhal dayandırmalıdır. Ona silah verən Fransa və digər ölkələr o kontraktlara xitam verməlidir, ləğv etməlidir. Artıq Ermənistana göndərilmiş silahlar geri qayıtmalıdır. Bu, bizim şərtimizdir. İndi kim bunu necə istəyir elə də qəbul etsin. Mən sözümü deyirəm, onlar da bilirlər, onların arxasında duranlar da bilirlər ki, əgər biz nəyisə deyiriksə, deməli, artıq bu məsələyə çox ciddi yanaşırıq” - deməklə dünyaya – erməni faşizmin arxasında duraraq onu getdikcə daha çox faciələrə sürükləyən “dostlarına”, həm də bir mesaj vermiş oldu.
Həmişə dövlətinin və xalqının müqəddaratını düşünən Prezident Ermənistanın Türkiyə ilə Azərbaycan arasında coğrafi maneə rolunu oynamaqdan çəkinməli olduğunu bildirərək, onları Zəngəzur dəhlizini açmağa çağıraraq “Onlar bunu nə qədər tez başa düşsələr, bir o qədər yaxşıdır”, - deyə onlara doğru yolu da göstərdi.
Müsahibənin mənim və daima öz yurd-yuvalarına qayıtmaq arzusu ilə yaşayan hər bir Qərbi azərbaycanlının istəyinə uyğun olan hissəsi cənab prezidentin jurnalistin “İndiki şərtlər altında bu perspektivlər nə qədər real görünür?” sualına cavabı oldu:
“Xüsusilə nəzərə alsaq ki, indiki Ermənistan ərazisi, demək olar ki, vaxtilə onun mütləq əksəriyyətini təşkil edən hissəsi azərbaycanlıların yaşadıqları tarixi torpaqlardır. Bu gün biz deyirik ki, 300 min Qərbi azərbaycanlı o bölgələrə qayıtmalıdır. Amma bütövlükdə o bölgədən çıxmış və bu gün Azərbaycanın müxtəlif bölgələrində yaşayanların və onların nəvələrinin, nəticələrinin sayı 300 mindən bir neçə dəfə çoxdur. Hələ XIX əsr rus imperiyasının xəritələrinə baxın. Orada bütün toponimlərin Azərbaycan mənşəli olması göz önündədir, ya da rus imperiyasının XX əsrin əvvəllərində tərtib edilmiş xəritələri. Orada da bütün şəhərlərin adları Azərbaycan mənşəlidir. Orada siz “Sevan gölü” adlı bir göl görməzsiniz. Orada Göyçə gölü yazılıb. Biz deyəndə ki, bu, bizim tarixi torpağımızdır, biz həqiqəti deyirik. Bunu hətta bu yaxınlarda mətbuata çıxmış Ermənistanın birinci faşist prezidentinin çıxışında da özü deyir ki, üç rayonda azərbaycanlılar əksəriyyət təşkil edirdi. Zəngəzurda azərbaycanlılar əksəriyyət təşkil edirdi. Bəli. Əksəriyyət yox, tam azərbaycanlılardan ibarət olan kəndlər idi. Biz XX əsrdə üç dəfə deportasiyaya məruz qaldıq və hər dəfə bu deportasiya böyük fəsadlara gətirib çıxarırdı. 1920-ci ilin noyabrında Qərbi Zəngəzur Azərbaycandan ayrıldı və Ermənistana birləşdirildi. Ondan iki il əvvəl, əfsuslar olsun ki, Azərbaycan Xalq Cümhuriyyəti İrəvan şəhərini Ermənistana bağışladı və ondan sonrakı dövrdə xalqımız nə qədər əzab-əziyyət çəkib. Ona görə vaxt gəlib ki, Ermənistan şərait yaratsın, Qərbi azərbaycanlılar öz dədə-baba yurdlarına qayıda bilsinlər. Əlbəttə ki, biz bu məsələdə Ermənistan rəhbərliyindən çox dəqiq və beynəlxalq hüquqa uyğun mövqe gözləyirik.
Mən hesab edirəm, yaxşı olardı ki, Ermənistanın baş naziri Qərbi Azərbaycan İcmasının nümayəndələrini qəbul etsin. Bildiyimə görə, onlar İrəvana da getməyə hazırdırlar. Qəbul etsin, onların dilindən onların problemlərini eşitsin, dinləsin onları. Yəni, onlar oradan əsassız qovulmuşlar. Onların tam hüququ var ki, oraya qayıtsınlar”.
Bəli, cənab Prezidentin də dediyi kimi, Ermənistanın baş naziri özündə cəsarət taparaq bizi – Qərbi azərbaycanlıların bir qrupunu qəbul etsə, ona deməyə çox sözümüz var. Mən o torpaqlarda doğulub boya-başça çatan, əmək fəaliyyəti dövründə tez-tez “üzdəniraq” qonşularla üz-üzə gələn və heç bir vaxt geri çəkilməyərək sözünü istər onlarla dialoqda, istərsə də rayon qəzetinin səhifələrindəki yazıları ilə deyən bir şəxs kimi o görüşdə iştirak etmək istərdim. Çünki ona və onun millətinə: “Biz fədakar və düşünülmüş siyasəti ilə Qarabağımızı qaytaran, xalqımızı 200 illik əsarətdən qurtaran Prezident İlham Əliyevin sayəsində o doğma torpaqlarımıza da qayıdacağıq. Zor, ya xoş. Bunu fikirləşin və yolumuzu açın!”,- deyərdim.
