07/03/2022
Əli Kərimli: Rusiya Müdafiə Nazirliyi Qarabağdakı erməni separatçılarının Ukraynaya humanitar yardım göndərməsi haqda saxta məlumat yayıb. Məlumat ona görə saxtadır ki, Qarabağdakı separatçılar özləri Rusiyanın yardımı ilə ayaqda qalır, onların kiməsə yardım edəcək halı yoxdur. Ancaq Rusiya MN-nin bu məlumatı təkcə saxta yox, həm də təxribat xarakterlidir. Çünki bu məlumatda "Dağlıq Qarabağ" ifadəsi işlədilib. Azərbaycan ərazisində isə belə bir inzibati ərazi vahidi yoxdur.
İlin-günün bu vaxtında Rusiya nəyə görə Azərbaycana qarşı təxribat törədir? Bəlkə Azərbaycan hakimiyyətinin yersiz və çoxsaylı güzəştləri onu belə həvəsləndirib? Azərbaycan hakimiyyəti 10 noyabrda Azərbaycanın qələbəsini oğurlayan Rusiyaya təşəkkür etməklə Azərbaycana qarşı belə saymazyana siyasətə zəmin yaradıb. Rusiya "sülhməramlıları" hər dəfə suveren hüquqlarımızı pozanda ona təşəkkür etməklə cavab verən Azərbaycan hakimiyyəti öz cəsarətsizliyi ilə Rusiyanı dövlətimizə qarşı saymamazlığa cəsarətləndirib. Heç olmasa bu dəfə - Rusiyaya qarşı bütün dünyanın birləşdiyi indiki vaxtda Azərbaycan hakimiyyəti cəsarətlə davranmalıdır. Açıq deyilməlidir ki, Rusiya "sülhməramlılarının" sistematik anti-Azərbaycan fəaliyyəti onların ölkəmizdən çıxarılmasının tələb edilməsilə nəticələnə bilər.
