23/10/2023
Müharibə əleyhinə status yazdığı üçün əvvəlcə Dövlət Təhlükəsizlik Xidməti tərəfindən çağırılan, daha sonra isə Bərdə rayon prokurorluğu tərəfindən həbs əmri verilən ictimai fəal Əmrah Təhməzov Bərdə Rayon Polis İdarəsinin saxlama yerində üzləşdiyi p*s rəftardan danışır. "2vur2Media"nın Açıq Söhbət podcastında başına gələnləri danışan ictimai fəalın çıxışından əsas hissələr aşağıdakılardır. Daha ətraflı videodan və "ClubHouse" platformasından dinləyə bilərsiniz.
• 3 dənə şey gətirirdilərsə 1 dənənin parasını buraxırdılar;
• Dostlarım mənə neçə dəfə pul gətiriblər, onu mənimsəyiblər;
• Yanıma qəsdən narkomanları salırdılar;
• Vəkilim mənə 30 dəfə zəng edib, heç birində icazə verməyiblər;
• Hakim mənə dedi ki, "Sənin yazdığın kişiliyə də uyğun gəlmir... Rədd ol! Təmin olunmur";
• Dostlarım 100 manatlıq bazarlıq edib verirdilərsə, onun 10 manatlığını mənə veriblər;
• "Prostina" dəyişdirilmirdi, illərin matrasları idi. Dəhşətli iy gəlirdi;
• Ombudsman köməkçisi gələndə "prostina" sərilirdi, o gedən kimi çıxarılırdı;
• Olduğum yerdə pəncərə yox idi, isti su yox idi, soyuq, nəm idi. Bizə yorğan verilmirdi, istilik sistemi də qoşulmamışdı;
• Telefonla danışmağa icazə vermədilər, bir ay həbsdə oldum, bircə gün 1 dəqiqə evlə danışa bildim. Heç kim görüşə buraxılmadı;
• Atama deyilib ki, oğluna siqaret lazımdır. Mən siqaret çəkmirəm. Atam alıb, verib. Sonra öyrəndim ki, idarə rəisi siqareti öz dükanında satıb;
• Mənə göndərilən pulun bir manatını da görməmişəm. 200 manata yaxın pulumu mənimsəyiblər;
• Tualetdən siçan çıxırdı, butulka basırdıq ki, siçan çıxmasın...
