Gözətçi, Azerbaijan str, Baku (2025)

30/09/2025

📢 Anar Məmmədli müdafiə çıxışını davam etdirib: “Qondarma ittihamlar hüquqların kriminallaşdırılmasıdır”

🔹 Hüquq müdafiəçisi məhkəmə çıxışında 2020–2024-cü illərdəki fəaliyyətinin qanuni, ittihamların isə əsassız və saxta olduğunu deyib

29 sentyabr 2025-ci il tarixində Bakı Ağır Cinayətlər Məhkəməsində keçirilən məhkəmə iclasında Anar Məmmədli müdafiə çıxışını davam etdirib. Məmmədli ittiham aktında yer alan ittihamları rədd edərək, məhkəmədən və prokurordan bununla bağlı sübutlar və qanuna istinad edilən izahat tələb edib.

Məmmədli 2020–2024-cü illərdəki ictimai fəaliyyətinin milli və beynəlxalq hüquqi əsasları və mahiyyəti haqqında ətraflı məlumat verib və ona qarşı irəli sürülən “qaçaqmalçılıq”, “cinayət yolu ilə əldə edilmiş əmlakın leqallaşdırılması”, “qanunsuz sahibkarlıq”, “vergidən yayınma” kimi ittihamların cinayət qanununa zidd olmasını və eləcə də istintaqın sübut toplama prosesində yol verdiyi çox saylı pozuntuları məhkəmənin diqqətinə çatdırıb.

Çıxışında Məmmədli bəyan edib ki, SMDT və şəxsən onun fəaliyyəti seçkilərin monitorinqi, yerli icma qruplarının maarifləndirilməsi, mülki və siyasi hüquqlar üzrə şikayətlərin toplanması və sənədləşdirilməsi, eləcə də milli və beynəlxalq hüquqi müdafiə mexanizmlərindən istifadəni təşviq etməyə yönəlib. O, həmçinin pandemiya dövründə fəaliyyətin dayanmasına baxmayaraq, istintaqın saxta “layihə siyahıları” hazırladığını qeyd edib. Məmmədli 2020 parlament və 2024 prezident seçkilərinə dair rəy və hesabatlar hazırladığını, karantin məhdudiyyətlərinin hüquqi qiymətləndirilməsi ilə bağlı ictimai çıxışlar etdiyini vurğulayıb. Eyni zamanda müharibə dövründə və ondan sonrakı mərhələdə mülki itkilərə dair materialların toplanmasına və AİHM müraciətlərinin hazırlanmasına töhfə verdiyini qeyd edib.

Ətraflı ➡️ https://tinyurl.com/jptrxhj8

30/09/2025

📢 "Toplum TV işi": İstintaq sübutları saxtalaşdırıb

🔹 Sentyabrın 29-da Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib.

Hakim Azər Tağıyevin sədrliyi ilə baş tutan prosesdə təqsirləndirilən şəxslərdən “Toplum TV”-nin həmtəsisçisi və media eksperti Ələsgər Məmmədli ötən iclasdakı çıxışına davam edib.

Ələsgər Məmmədli bu dəfəki çıxışında şəxsinə və “Toplum TV”-yə qarşı irəli sürülən ittihamlara cavab verib.

O, ilk olaraq qeyd edib ki, “Toplum TV”-nin dövlət qeydiyyatından keçməməsi iddiası ittiham tərəfinin media sahəsindəki hüquqi tənzimləmədən “xəbərsizliyini göstərir”.

““Toplum TV” bir domen adıdır. Beynəlxalq Kommunikasiya Assosiasiyasının qaydalarına görə, domen adları beynəlxalq və ya ölkə kodları ilə ola bilər. Məsələn: “com”, “org”, “net”, “info”, “tv” və s. kimi domenlər beynəlxalq domen adlarıdır. Onlar internet üzərindən onlayn qaydada fərdi “e-mail” göstərərək, 8-10 dollar ödəyərək “whois.com” domenindən alına bilir. Bunun hər hansı digər prosessual qaydası və ya dövlət qeydiyyatı nəzərdə tutulmur”, – ekspert bildirib.

Ətraflı ➡️ https://rb.gy/zavt10

27/09/2025

📢 Anar Məmmədlinin səhhəti pisləşib

🔹 Məmmədli 17 aydır ki, keyfiyyətli həkim müayinəsi ilə təmin edilmir

Bu barədə Anar Məmmədlinin valideynləri onunla 26 sentyabrda görüşdükdən sonra bildiriblər.

Ailəsinin Məmmədliyə istinadən verdiyi məlumata əsasən, Məmmədli diz oynağının artrozu-qonartroz xəstəliyindən əziyyət çəkir və xəstəlik hazırda kəskinləşib. O, addım atmaqda çətinlik çəkir, diz nahiyəsində şişkinlik və qızartı müşahidə olunur. Məmmədlinin ailə üzvlərinin revmatoloq və travmatoloqlarla apardıqları məsləhətləşmələrindən sonra xəstəliyin bursit (oynaqdaxili bursa kisəsinin iltihabı) və sinovit (oynaqdaxili sinovial qişanın iltihabı) ilə əlaqəli ola biləcəyi bildirilib. Həkimlər ayaqda şiş, qızartı və temperatur artımını da bununla izah ediblər.

Həkimlərin tövsiyəsinə əsasən, belə xəstələr mütəmadi olaraq nəzarətdə saxlanılmalı, MRT, rentgen və laborator müayinələrdən keçməlidir. Lakin Məmmədli artıq 17 aydır ki, heç bir keyfiyyətli və lazımi tibbi müayinələrdən keçirilmir. Onun vəkillərinin mülki xəstəxanada hərtərəfli müayinələr aparılması üçün dəfələrlə etdiyi müraciətlərə rədd cavabı verilib.

Ailəsinin sözlərinə görə, hüquq müdafiəçisinin saxlanıldığı rütubətli və nəm şərait də onun ağrıları və iltihabi prosesinı daha da ağırlaşdırır.
Məmmədli normal saxlanma şəraiti, təcili tibbi müayinə və müalicə ilə təmin edilməsə, onun davam edən məhkəmə proseslərində iştirakı səhhəti ilə əlaqəli olaraq mümkünsüz ola bilər.

🔹 Seçkilərin Monitorinqi və Demokratiyanın Tədrisi Mərkəzinin sədri, hüquq müdafiəçisi Anar Məmmədli 29 aprel 2024-ci ildə Azərbaycanda media və vətəndaş cəmiyyəti təşkilatlarına qarşı aparılan repressiyalar çərçivəsində həbs edilib. Məmmədli öz həbsini Azərbaycanda müstəqil yerli seçki müşahidəçiliyi, icma quruculuğu və hüquq müdafiəsi sahəsindəki müstəqil fəaliyyətləri ilə əlaqələndirir.

Beynəlxalq insan haqları təşkilatları Məmmədlini siyasi məhbus hesab edir, onun dərhal azad olunmasını və hüquqlarına hörmət olunmasına dair çoxsaylı çağırışlar ediblər.

26/09/2025

📢 "Abzas Media"nın qadın jurnalistləri Lənkərandakı həbsxanaya köçürülüb

🔹 Sentyabrın 25-də “Abzas Media”nın həbsdə olan baş redaktoru Sevinc Vaqifqızı və əməkdaşları Nərgiz Absalamova ilə Elnarə Qasımova Lənkəranın Qurumba kəndində yerləşən Penitensiar Kompleksə köçürülüblər.

Bu barədə “Abzas Media”ya jurnalistlərin yaxınları məlumat verib.

Onların sözlərinə görə, jurnalistlər Bakı İstintaq Təcridxanasından köçürülən zaman rəis müavini Cavid Gülalıyev tərəfindən Nərgiz Absalamovaya qarşı kobudluq edilib.

Yaxınlarının bildirdiyinə görə, köçürülmə prosesi qəfil olub:

“Səhər saat 9-da onlara deyiblər ki, 1 saata hazır olun. Lənkərana çatana qədər hara aparıldıqlarını bilməyiblər.”

Jurnalistlər Bakıdan Lənkərana iki-üç saatlıq məsafənin yaxınları ilə görüşlər üçün ciddi çətinlik yaratdığını bildirirlər.

Onlar başqa rayonda yerləşən müəssisəyə köçürülməyi məhz yazılarına görə olduğunu deyirlər.

🔹 Xatırladaq ki, iyunun 20-də Bakı Ağır Cinayətlər Məhkəməsində hakim Rasim Sadıxovun sədrliyilə keçirilən iclasda Ülvi Həsənli, Sevinc Abbasova (Vaqifqızı), Hafiz Babalı və Fərid Mehralızadə 9 il, Nərgiz Absalamova, Elnarə Qasımova 8 il, Məhəmməd Kekalov isə 7 il 6 ay azadlıqdan məhrum ediliblər.

Sentyabrın 9-da Bakı Apellyasiya Məhkəməsi bu qərarı qüvvədə saxlayıb.

23/09/2025

📢 BMT təmsilçisi Anar Məmmədli ilə bağlı çağırış etdi

🔹 Aşağıda 19 sentyabr 2025‑ci il tarixli “Aarhus Konvensiyası üzrə Ekoloji Müdafiəçilərin Xüsusi Məruzəçisi” Michel Forst tərəfindən Azərbaycan Baş Prokuroru Kamran Əliyevə ünvanlanan məktubunu təqdim edirik.

Məktubun əsas məzmunu:

Məktub Aarhus Konvensiyasının (“İnformasiya əldə etmək, qərar qəbuletməsində ictimai iştirak və ekoloji məsələlərdə ədalətə çıxış”) 3‑cü maddəsinin 8‑inci bəndinə istinad edir. Bu bəndə görə, konvensiyaya üzv ölkə şəxslərin bu konvensiyanın tələblərinə uyğun hüquqlarını həyata keçirdikləri üçün heç bir təzyiqə, cəzaya, təqibə və ya narahatlığa məruz qoyulmamalıdır.

Məktub ekoloji müdafiəçi statusunda olan Anar Məmmədlinin işi ilə bağlıdır. Anar Məmmədli “Climate for Justice” təşəbbüsünün həmtəsisçisidir və Azərbaycan hökumətinin COP29‑a hazırlıq proseslərində, ekoloji ədalət tədbirlərində fəal iştirak edib.

Məktubda qeyd olunur ki, A. Məmmədli barəsində 2024‑cü ilin aprelində Azərbaycan Cinayət Məcəlləsinin 206.3.2 maddəsi ilə ittiham irəli sürülüb və 2025‑ci ildə əlavə altı ittiham əlavə edilib.

Məktub müəllifi onun barəsindəki məhkəmə prosesinin, xüsusilə mühakiməyə hazırlıq dövrünün (pre‑trial detention) uzadılması, apellyasiya məhkəmələrinin bu uzadılmaları təsdiqləməsi və onun azadlıqdan məhrum edilmə halları ilə bağlı narahatlıqlarını ifadə edir.

Məruzəçi onu da vurğulayır ki, bu cəza tədbirləri və proseslər həm konvensiyanın, həm beynəlxalq insan hüquqları normalarının tələblərinə uyğun olmalıdır — xüsusən məzmun üzrə ittihamların məqsədi, adekvatlığı, cəzanın ölçüsü və motivasiyası diqqətlə qiymətləndirilməlidir.

Məktub Azərbaycan tərəfinə çağırış edir ki, Anar Məmmədlinin hüquqları pozulmamalıdır, ona qarşı ittihamlar geri götürülsün, məhkəmə proseduru ədalətli və beynəlxalq tələblərə uyğun aparılsın, onun istintaq dövründə azadlıqda olması təmin edilsin.

Azadlıq qəzeti

23/09/2025

📢 Jurnalist Aytac Tapdığınn həbs müddəti artırılıb

🔹 “Meydan TV işi” üzrə ittiham olunan jurnalist Aytac Əhmədovanın (Tapdıq) da həbs müddəti daha 3 ay artırılıb.

Sentyabrın 22-də Xətai Rayon Məhkəməsində keçirilən prosesdə bununla bağlı qərar verilib və jurnalist barəsində çıxarılan həbs qətimkan tədbirinin müddəti 2026-cı il yanvarın 6-dək uzadılıb.

🔹 Xatırladaq ki, ötən ilin dekabrında “Meydan TV”yə qarşı başlanmış polis əməliyyatı nəticəsində bir neçə jurnalist saxlanılıb. İlk mərhələdə Aytac Tapdıq, Aysel Umudova, Aynur Qənbərova (Elgünəş), Natiq Cavadlı, Ramin Cəbrayılzadə (Deko), Xəyalə Ağayeva və Bakı Jurnalistika Məktəbinin direktor müavini Ülvi Tahirov həbs olunublar.

Daha sonra bu ilin fevral və may aylarında “Arqument az” saytının baş redaktoru Şəmşad Ağayev, həmçinin jurnalistlər Nurlan Qəhrəmanlı (Libre), Fatimə Mövlamlı və Ülviyyə Quliyeva (Əli) eyni iş üzrə saxlanılıb. Avqustun 28-də isə jurnalist Əhməd Muxtarın da bu iş çərçivəsində həbs olunduğu bildirilib.

Jurnalistlər əvvəlcə Cinayət Məcəlləsinin 206.3.2-ci maddəsi (qaçaqmalçılıq – qabaqcadan əlbir olan qrup şəklində törədildikdə) ilə ittiham olunublar. Avqust ayında isə ittihamlar daha da ağırlaşdırılaraq qanunsuz sahibkarlıq, çirkli pulların yuyulması, qaçaqmalçılıq, vergidən yayınma və sənəd saxtalaşdırma maddələri əlavə edilib.

Saxlanılan jurnalistlər bütün ittihamları rədd edir, onların siyasi sifarişlə hədəfə alındığını və peşə fəaliyyətlərinə görə cəzalandırıldıqlarını bildirirlər.

AbzasMedia

22/09/2025

📢 Anar Məmmədli Bakı Ağır Cinayətlər Məhkəməsində çıxış edib

🔹 22 sentyabr 2025-ci ildə Bakı Ağır Cinayətlər Məhkəməsində hüquq müdafiəçisi, Seçkilərin Monitorinqi və Demokratiya Tədrisi Mərkəzinin (SMDT) həmtəsisçi sədri Anar Məmmədli müdafiə çıxışı edib. O, irəli sürülmüş ittihamları əsassız və siyasi motivli adlandıraraq, prosesi “hüquqi” yox, “rejimin qurduğu siyasi tamaşa” kimi qiymətləndirib.

Məmmədli xatırladıb ki, 2013-cü ildə ona qarşı eyni maddələr və eyni faktlar toplusu ilə aparılan cinayət təqibi Avropa İnsan Hüquqları Məhkəməsinin (AİHM) 19 aprel 2018-ci il tarixli “Məmmədli Azərbaycana qarşı” qərarı ilə siyasi sifarişli və hüquqdan sui istifadə kimi qiymətləndirilib.

Anar Məmmədli çıxışında məhkəmə prosesinin ədalətli məhkəmə araşdırması standartlarına cavab vermədiyini vurğulayıb. O, bildirib ki, AİHM “Məmmədli Azərbaycana qarşı” qərarı artıq hüquqi presedent yaradıb və həmin qərarda onun əvvəlki məhkumluğunun siyasi sifariş olduğu sübut edilib.

Məmmədli sual edib ki, əgər eyni faktlar toplusu üzrə AİHM “əsaslı şübhə yoxdur” qərarına gəlibsə, hazırkı proses əvvəlkindən nə ilə fərqlənir?

Məmmədli öz çıxışında həm birinci, həm ikinci həbsinin ölkədə keçirilən qeyri demokratik seçki monitorinqi barədə tənqidi hesabatlarından sonra həyata keçirildiyini təsadüfü ardıcıllıq yox, hökümətin siyasi qisas motivləri ilə izah edib və məhkəməni AİHM presedentini tətbiq edərək hüququn aliliyini qorumağa və eyni səhvləri təkrarlamamağa çağırıb. Məmmədli AİHM-in 2018-ci il Məmmədli Azərbaycana qarşı qərarının azərbaycanca tərcüməsini məhkəməyə təqdim edib. O, məhkəmədən ittihamların siyasi motivli olduğunu etiraf edib ədalətli mövqe ortaya qoymağı tələb edib.

Ətraflı 👉 https://tinyurl.com/2mmrcmjb

18/09/2025

📢 Jurnalist Şəmşad Ağa müalicə müəssisəsinə yerləşdirilib

🔹“Meydan TV işi” ilə bağlı həbs edilən jurnalist, “arqument.az” saytının baş redaktoru Şəmşad Ağanın (Ağayev) səhhətində problem yaranıb.

Ailəsinin Meydan TV-yə bildirməsinə görə, jurnalist mədə-bağırsağında yaranan problemə görə Penitensiar Xidmətin Müalicə Müəssisəsinə yerləşdirilib.

Onun mədə xorasından əziyyət çəkdiyi bildirilir.

🔹 Xatırladaq ki, Şəmşad Ağa fevralın 5-də Meydan TV ilə əlaqəli cinayət işinə görə həbs olunub.

Ona qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb və məhkəmənin qərarı ilə barəsində həbs qətimkan tədbiri seçilib.

Bu iş üzrə hazırda ümumilikdə 12 nəfər həbsdədir.

Toplum TV

17/09/2025

📢 “Meydan TV işi” üzrə həbs olunanların həbs müddəti uzadılıb

🔹 Sentyabrın 16-da Xətai Rayon Məhkəməsində “Meydan TV işi” üzrə həbs olunan jurnalistlərin növbəti məhkəmə prosesi keçirilib.

"Meydan TV"-nin xəbərinə görə, ayrı-ayrılıqda icra olunan proseslərdə jurnalistlər Fatimə Mövlamlı, Ülviyyə Əli (Quliyeva) və Şəmşad Ağanın həbs müddəti daha 3 ay uzadılıb.

🔹 Xatırladaq ki, 2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş, jurnalistlər Ramin Deko, Aysel Umudova, Aytac Tapdıq, Xəyalə Ağayeva, Natiq Cavadlı saxlanılıblar.

Sonradan “Arqument.az” saytının baş redaktoru, "Meydan TV" ilə əməkdaşlıq edən jurnalist Şəmşad Ağayev (Ağa), jurnalistlər Nurlan Libre (Qəhrəmanlı), Fatimə Mövlamlı, Ülviyyə Əli (Quliyeva) və fotoqraf Əhməd Muxtar “Meydan TV işi”nə görə həbs edilib.

Saxlanılan jurnalistlərin heç biri özünü təqsirli bilmir.

Toplum TV

10/09/2025

📢 Apellyasiya Məhkəməsi "Abzas"çılarla bağlı hökmü qüvvədə saxlayıb

🔹 Sentyabrın 9-da Bakı Apellyasiya Məhkəməsində "Abzas Media işi" üzrə məhkəmə prosesi keçirilib.

Hakim Zəfər Əhmədovun sədrliyi ilə keçirilən prosesdə qərar elan olunub.

Qərara əsasən, "Abzas"çıların əvvəlki instansiya məhkəməsinin qərarından verdikləri apellyasiya şikayəti təmin edilməyib və hökm qüvvədə saxlanılıb.

🔹 Xatırladaq ki, iyunun 20-də Bakı Ağır Cinayətlər Məhkəməsində baş tutan iclasda “Abzas Media işi” üzrə təqsirləndirilən şəxslərə hökm oxunub.

Hakimin qərarı ilə “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və “Azadlıq Radiosu"nun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media"nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər. Lakin jurnalistlər və müdafiəçiləri istintaqın ortaya tutarlı sübutlar qoymadığını bildirib.

Toplum TV

09/09/2025

📢 Rüfət Səfərovun növbəti məhkəmə prosesi keçirilib

🔹 Sentyabrın 8-də Bakı Ağır Cinayətlər Məhkəməsində hüquq müdafiəçisi, “Müdafiə Xətti” insan haqları təşkilatının icraçı direktoru Rüfət Səfərovun məhkəmə prosesi keçirilib.

Hakim Aygün Qurbanovanın sədrliyi ilə baş tutan iclasda onun vəkillərinin yanında əyləşdirilməsi məsələsi yenidən müzakirə mövzusu olub.

“Azadlıq Radiosu”nun yazdığına görə, hakimin əvvəlki qərarına baxmayaraq, konvoy əməkdaşları buna icazə verməyib. Mübahisələrdən sonra Səfərovun vəkillərinin yanında oturmasına şərait yaradılıb.

Daha sonra prokurorun suallarını cavablandıran Rüfət Səfərov bildirib ki, ittihamda göstərildiyi kimi, telefonunun zərərçəkmiş Natiq İmamverdiyevlə eyni anten dairəsində olması pul aldığına dəlil sayıla bilməz. O, həmin ərazidə dostları ilə tez-tez görüşdüyünü vurğulayıb.

İttihama əsasən, Səfərov İmamverdiyevi 6 sot torpaq sahəsi satmaq adı ilə aldadaraq 60 min manat pulunu alıb, sonradan isə qarajda döyərək xəsarət yetirib. Hüquq müdafiəçisi isə bunu təkzib edir: “Qaraja girən kimi o mənə hücum etdi. Təsadüfən orada olan polislər isə iddia etdilər ki, mən vurmuşam. Əgər mən onu qan içində qoymuşamsa, niyə hadisə yerində qan izləri yoxdur? Kamera görüntülərini niyə göstərmirlər?”.

Ətraflı 👇

03/09/2025

📢 ‘QHT işi’ üzrə təqsirləndirilənlərin ittihamları ağırlaşdırılır

🔹 Baş Prokurorluqda istintaqı gedən yerli və beynəlxalq qeyri-hökumət təşkilatları (QHT) ilə bağlı cinayət işi üzrə təqsirləndirilən vətəndaş cəmiyyəti fəallarına verilən ittihamlar ağırlaşdırılır.

AzadlıqRadiosunun məlumatına görə, təqsirləndirilən şəxslərdən bəzilərinə yeni ittihamlar verilib:

“Bəzilərinin ittihamı ağırlaşdırılıb. Digər təqsirləndirilən şəxslərə münasibətdə də bu prosesin davam edəcəyi gözlənilir. Bu, həm həbsdə olanlara aiddir, həm də barəsində alternativ qətimkan tədbiri seçilənlərə”.

Vətəndaş Hüquqları İnstitutunun rəhbəri Bəşir Süleymanlının vəkili Fariz Namazlı AzadlıqRadiosuna məlumatı təsdiqləyib. Vəkil bildirib ki, müvəkkilinə əlavə ittihamlar verilib, ancaq “QHT işi” üzrə təqsirləndirilən digər şəxslərin durumundan xəbəri yoxdur.

Bəşir Süleymanlı 2025-ci il martın 14-də həbs ediləndə ona Cinayət Məcəlləsinin 193-1.3.2-ci (cinayət yolu ilə əldə edilmiş xeyli miqdarda əmlakı leqallaşdırma), 308.2-ci (vəzifə səlahiyyətlərindən sui-istifadə etmə, ağır nəticələrə səbəb olduqda) və 313-cü (vəzifə saxtakarlığı) maddələriylə ittiham verilmişdi. Ona CM-in 193-1.2.2 və 193-1.2.3 (cinayət yolu ilə əldə edilmiş əmlakı təkrar və qulluq mövqeyindən istifadə etmək leqallaşdırma) maddələriylə əlavə ittiham elan edilib. Eyni zamanda, vəzifə səlahiyyətlərindən sui-istifadə ilə bağlı ittiham nisbətən yüngülləşdirilərək 308.1 maddəsinə tövsif olunub. Bu maddələrin sanksiyasında 12 ilədək həbs cəzası nəzərdə tutulub.

Vəkili bildirib ki, Bəşir Süleymanlı ittihamların heç birini qəbul etmir: “Özünü təqsirli bilmir, hüquq müdafiəçisi kimi fəaliyyətinə görə həbs olunduğunu deyir”.

Ətraflı 👇

Gözətçi

30/09/2025

30/09/2025

27/09/2025

26/09/2025

23/09/2025

23/09/2025

22/09/2025

18/09/2025

17/09/2025

10/09/2025

09/09/2025

03/09/2025

Address

Website

Alerts

Contact The Business

Shortcuts

Share

Category

Avropa Məhkəməsinin hüquqşünasların şikayəti ilə bağlı qərarı