23/08/2026
Bu gün Bakıxanov qəsəbəsində şəxsən üzləşdiyim və sürücülərin iflic vəziyyətində qaldığı bir absurdluğu diqqətinizə çatdırmaq istəyirəm. Ərazidə aparılan yol bağlanması və hərəkətin müvəqqəti təşkili nəinki nəqliyyatın axınını tənzimləyir, əksinə, sürücüləri açıq-aşkar tələyə salaraq ciddi xaos yaradır.
Hadisə yerindən çəkdiyim kadrlardan da göründüyü kimi, yolun girişində "Giriş qadağandır" nişanı qoyulub və hərəkət məcburi olaraq sağa yönləndirilir. Sağa döndükdən sonra növbəti yol ayrıcında "Məcburi sola dön" nişanı var. Lakin sola dönən yol da beton maneələrlə bağlanıb və orada da "Giriş qadağandır" nişanı quraşdırılıb. Sola dönə bilmədiyin üçün məcburən sağa yönəlirsən və avtomatik olaraq axının əksinə hərəkət etmək məcburiyyətində qalırsan. Hətta geriyə dönmək istədikdə belə, gəldiyin yol bir tərəfli olduğu üçün yenə də qarşıdan gələn nəqliyyat axınına qarşı hərəkət etməyə məcbur qalırsan.
"Yol hərəkəti haqqında" Azərbaycan Respublikasının Qanununa əsasən, yol hərəkətinin təşkili təhlükəsiz, məntiqi və maneəsiz olmalıdır. Sürücünü hər bir addımda qayda pozmağa sövq edən, hər iki tərəfdən çıxılmaz vəziyyət yaradan bu cür təşkilatçılıq idarəçilikdə ciddi naşılıq və məsuliyyətsizlikdir. Bu yanaşma süni sıxlığa və ağır qəza şəraitinin yaranmasına birbaşa zəmin yaradır.
"Qanunazidd" səhifəsinin rəhbəri və bir sürücü olaraq bildirirəm ki, yol hərəkətinin bu formada, heç bir məntiqə və hüquqi çərçivəyə sığmayan şəkildə təşkili tamamilə QƏBULOLUNMAZDIR!
Ərazidə hərəkətin təşkilində bu cür ziddiyyətli sxemin tətbiqinə yol verən və tənzimləməyə lazımi nəzarəti təmin etməyən aidiyyəti qurumların (AYNA, DYP, AAYDA və s.) məsul şəxslərinin məsələyə diqqəti cəlb olunmalı, yol verilmiş səhlənkarlıq araşdırılaraq müvafiq intizam tədbirləri görülməlidir...
Hörmətlə...
