Toplum TV, AZ1000, Baku (2026)

14/09/2026

"Son 15 il ərzində 140-dan çox ölkə Azərbaycanın beynəlxalq yardımından faydalanıb."

Bu sözləri xarici işlər naziri Ceyhun Bayramov Beynəlxalq İnkişafa Yardım Agentliyinin təsis edilməsinin 15-ci ildönümünə həsr olunmuş konfransda deyib.

Onun sözlərinə görə, 2020-ci ildən etibarən Azərbaycanın beynəlxalq yardımları üçün təxminən 400 milyon ABŞ dolları həcmində vəsait ayrılıb.

"COVID-19 pandemiyası dövründə Azərbaycan 88 ölkəyə yardım göstərib. Afrikada əməkdaşlığımız Ebola epidemiyasına qarşı mübarizəyə dəstəyi, eləcə də qarşısı alına bilən korluqla mübarizə təşəbbüsünü əhatə edib. Bu təşəbbüs çərçivəsində 900 mindən çox insan göz müayinəsindən keçirilib, 150 mindən çox katarakta əməliyyatı həyata keçirilib", - o əlavə edib.

Tənqidçilər isə bildirirlər ki, xaricdə səhiyyə layihələrinə maliyyə ayıran Azərbaycan hökuməti ölkə daxilində vətəndaşların əlçatan və keyfiyyətli tibbi xidmətlə təmin olunması problemlərini həll etməyib.

14/09/2026

Sentyabrın 12-13-də Türkiyədə LGBTQ+ fəallarına qarşı kütləvi polis əməliyyatları keçirilib. İstanbul, Ankara, İzmir və Antalyada fəalların evlərində, LGBTQ+ təşkilatlarının ofislərində, eləcə də gecə klublarında axtarışlar aparılıb.

Polisin məlumatına görə, İstanbulda 26, Ankarada isə 20 nəfər saxlanılıb. Ümumilikdə əməliyyatların ölkənin 12 vilayətini əhatə etdiyi bildirilir. LGBTQ+ hüquqlarını müdafiə edən “Kaos GL” assosiasiyası əməkdaşları da daxil olmaqla 50 nəfərin saxlanıldığını açıqlayıb.
Assosiasiyanın məlumatına görə, ofisində və əməkdaşlarının evlərində aparılan axtarışlara təşkilatın saytında və sosial media hesablarında dərc olunan materiallar əsas gətirilib. Prokurorluq həmin materialları “əxlaqa zidd” hesab edib.

Sentyabrın 12-də LGBTQ+ təşkilatlarına və ayrı-ayrı fəallara məxsus bir neçə sayta və sosial media hesabına giriş də məhdudlaşdırılıb. Məhdudiyyətlər elmi araşdırmalarla məşğul olan qurumların, o cümlədən Boğaziçi Universitetinin LGBTQ+ Araşdırmaları Klubunun və Cinsi Təhsil, Araşdırma və Müalicə Assosiasiyasının (CETAD) saytlarını da əhatə edib.

Əməliyyatlar hökumətin “Ailəm təhlükəsizlikdədir” təşəbbüsü çərçivəsində həyata keçirilir. Təşəbbüsün elan olunan məqsədi doğum səviyyəsinin azalmasının qarşısını almaq və uşaqları mənfi təsirlərdən qorumaqdır.

Türkiyənin ədliyyə naziri Akın Gürlek prokurorluğun ölkənin 15 vilayətində istintaq apardığını bildirib. Onun sözlərinə görə, araşdırma 162 şübhəli şəxsi, doqquz ictimai təşkilatı və 13 şirkəti əhatə edir.

Türkiyə İnsan Hüquqları Assosiasiyası hakimiyyətin bu addımlarını pisləyib.
“Bu əməliyyatın əsl adı ‘Ailəm təhlükəsizlikdədir’ deyil. Bu, dövlətin həyata keçirdiyi ayrı-seçkilik, qorxutma siyasəti və vətəndaş cəmiyyətinin dağıdılmasıdır”, - assosiasiyanın “X” hesabında yaydığı açıqlamada bildirilib.

14/09/2026

Azərbaycan Xalq Cəbhəsi Partiyasının (AXCP) sədr müavini Seymur Həzinin Azərbaycandan çıxışına qadağa qoyulub.

Bu barədə siyasətçinin özü sosial media hesabında məlumat verib. Onun sözlərinə görə, çıxışına məhdudiyyət qoyulduğunu sentyabrın 12-i səhər saatlarında Heydər Əliyev adına Beynəlxalq Hava Limanında öyrənib.

"Bildiyiniz kimi mən 2016-cı ildə “Azad Media" mükafatına layiq görülmüşdüm. Mükafatı verən təşkilat bu ilin 17-19 sentyabr tarixlərində keçirəcəyi tədbirə məni də dəvət etmişdi. Belə planladım ki, tədbirdən bir neçə gün qabaq Gürcüstana gedim, oradakı qohumlara baş çəkim, sonra tədbirə qatılmaq üçün Vilnüsə gedim", - o qeyd edib.

S.Həziyə çıxışına Daxili İşlər Nazirliyi tərəfindən qadağa qoyulduğu deyilsə də, səbəbi izah edilməyib. O, məhdudiyyəti "qanunsuz" adlandırıb və səbəbi aydınlaşdırmağa çalışdığını bildirib.

Azərbaycanda son vaxtlarda müxalif siyasətçilər və vətəndaş cəmiyyəti üzvlərinin ölkədən çıxışına məhdudiyyətlər qoyulur.

Onlar qadağanı siyasi motivli hesab etsələr də, rəsmilər bu iddianı əsassız sayır.

11/09/2026

8 il yarım müddətinə həbs cəzası alan Kamal İsayev kimdir?

11/09/2026

Avropa Şurası Parlament Assambleyası (AŞPA) Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədlinin 13 il həbsə məhkum edilməsi barədə bəyanat yayıb.

AŞPA-nın siyasi məhbuslar üzrə baş məruzəçisi Azadeh Rojhan yaydığı açıqlamada Anar Məmmədliyə verilən 13 illik həbs cəzasının siyasi motivli göründüyünü və ədalətli məhkəmə təminatlarının olmadığını bildirib.

“İctimai fəal, jurnalist və eyni iş üzrə təqsirləndirilən Anar Abdullayevə verilən 12 illik həbs cəzası ilə birlikdə elan olunan bu özbaşına hökmdən şoka düşmüşəm”, - A. Rojhan bildirib.

Rojhanın sözlərinə görə, Anar Məmmədliyə verilən hökm AŞPA-nın onun məhkəməyəqədər həbsi və təqibinin siyasi motivli olması barədə əvvəlki qənaətini daha da gücləndirir:

“Assambleya bu yaxınlarda qəbul etdiyi qətnamədə cənab Məmmədlinin məhkəməyəqədər həbsinin və təqibinin sırf siyasi səbəblərdən tətbiq edildiyini hesab etdi. Bu da onun Assambleyanın siyasi məhbus tərifinə düşdüyünü göstərir. Sentyabrın 7-də verilən hökm bu qənaəti daha da gücləndirir və Azərbaycanda onsuz da ağır olan insan haqları vəziyyətini daha da pisləşdirir”.

Baş məruzəçi Anar Məmmədlinin məhkum edilməsinin Azərbaycanın beynəlxalq öhdəlikləri ilə ziddiyyət təşkil etdiyini də vurğulayıb.

Ətraflı oxumaq üçün şərhdəki linkə keçid edin.

11/09/2026

“Qazax Regional İnkişaf Resursları” İctimai Birliyinin sədri, tarixçi Məhərrəm Göyüşoğluna 4 il sınaq müddəti olmaqla 8 il şərti həbs cəzası verilib.

“Abzas Media”nın xəbərinə görə, hökm sentyabrın 4-də Gəncə Ağır Cinayətlər Məhkəməsində hakim Elşən Vəliyevin sədrliyi ilə keçirilən prosesdə elan olunub.

Məhərrəm Göyüşoğlu Cinayət Məcəlləsinin 193-1.2.2, 193-1.2.3, 193-1.3.2, 308.1 və 313-cü maddələri ilə təqsirli bilinib. Məhkəmə ona 3 il qeyri-hökumət təşkilatlarında müəyyən fəaliyyətlə məşğul olmaq hüququndan da məhrum edib.

Məlumata görə, məhkəmə Göyüşoğlunun üç övladının olmasını, onlardan birinin azyaşlı olmasını, həmçinin II qrup əlilliyini cəzanı yüngülləşdirən hallar kimi nəzərə alıb.

Göyüşoğlu məhkəmədə ona verilən ittihamlar üzrə özünü qismən təqsirli bilib. Məhkəmə isə onun ifadəsinin məsuliyyətini yüngülləşdirməyə yönəldiyi qənaətinə gəlib və ittihamların digər sübutlarla təsdiqləndiyini bildirib.

Bir neçə il öncə xitam verilmiş "QHT işi" 2025-ci ilin martında yenidən açılıb. İş çərçivəsində bir sıra vətəndaş cəmiyyəti fəalları həbs olunub, digərləri isə polis nəzarətinə verilib və ya barələrində axtarış elan olunub.

Təqsirləndirilən şəxslər bir qayda olaraq ittihamları rədd edirlər, hakimiyyətin sifarişi ilə təqib olunduqlarını deyirlər.

11/09/2026

Həbsdə olan iqtisadçı-alim Fazil Qasımov Avropa Komissiyasının prezidenti Ursula von der Leyenə və ABŞ-nin vitse-prezidenti Cey Di Vensə müraciət edərək azadlığa buraxılması və təhlükəsizliyinin təmin olunması üçün yardım istəyib.

Fazil Qasımovun ailə üzvlərinin “Toplum TV” ilə paylaşdığı müraciətlərdə iqtisadçı avqustun 18-də Ursula von der Leyenə, avqustun 31-də isə Cey Di Vensə yazaraq Azərbaycanda siyasi təqibə məruz qaldığını bildirib.

“3 ildir qanunsuz olaraq saxlanıldığım Azərbaycan həbsxanasında girovluqdan azad olunmağım üçün köməklik göstərəcəyinizə ümid edirəm”, - Qasımov von der Leyenə müraciətində yazıb.

Alim ona qarşı irəli sürülən saxta pul dövriyyəsi ittihamını qəbul etmədiyini bildirib. O, həbsini iqtisadçı Qubad İbadoğlu ilə birlikdə Londonda Azərbaycan Gənclərinin Təhsil Fondunu (AYEF) yaratması ilə əlaqələndirib.

Qasımovun fikrincə, bu təşəbbüs Azərbaycan hakimiyyətinin narazılığına səbəb olub.
O, istintaq zamanı zorakılığa və psixotrop maddələrlə zəhərlənməyə məruz qaldığını iddia edir. Müraciətlərdə həmçinin istintaq və məhkəmə prosesində müdafiə tərəfinin maddi sübutlarla tanış olmasının məhdudlaşdırıldığı, bəzi video materialların məhv edildiyi bildirilir. Qasımov saxlanıldığı müəssisələrdə qeyri-insani rəftar, zorakılıq və həyatına sui-qəsd cəhdi ilə üzləşdiyini də yazır.

Vensə müraciətində Qasımov fevralın 9-da daha dörd siyasi məhbus sayılan şəxslə birlikdə Siyasi Məhbusların Müdafiə Komitəsinin təşəbbüs qrupu adından ona məktub göndərdiyini xatırladıb.
“Azərbaycanda mövcud olan siyasi məhbus probleminə və onun ABŞ-Azərbaycan münasibətləri üçün yarada biləcəyi risklərə diqqətinizi çəkmişdim”, - Qasımov yazıb.

Ətraflı oxumaq üçün şərhdəki linkə keçid edin.

11/09/2026

Azərbaycanda 2025-ci ildə əmək qabiliyyətli yaşda olan 19,977 nəfər vəfat edib.

Bu barədə Dövlət Statistika Komitəsi (DSK) məlumat yayıb.

Bu rəqəm 2024-cü illə müqayisədə 3471 nəfər çoxdur.

Bu il iyulun 1-dən etibarən Azərbaycanda qadınların əmək pensiyası almaq yaşı 65 olub. Bununla da, qadınların və kişilərin pensiya yaşı bərabərləşib.

"Əmək pensiyası haqqında" qanuna əsasən, kişilərdə bu yaş ən son 2020-ci il iyulun 1-də 65-ə çatıb və o vaxtdan sabit saxlanılıb. Qadınlarda isə artım hər il 6 ay olmaqla davam edib və bu il 65-ə çatıb.

11/09/2026

Sentyabrın 10-da Xəzər Rayon Məhkəməsində Müsəlman Birliyi Hərəkatının sədri, ilahiyyatçı Taleh Bağırzadənin övladlarının işi üzrə ilk məhkəmə iclası keçirilib.

“Azadlıq Radiosu”nun məlumatına görə, iclasda məlum olub ki, yeniyetmələr təqsirləndirilən şəxs qismində məhkəmə qarşısına çıxarılsalar da, ittiham aktı indiyədək nə onların qanuni nümayəndəsi olan anaları Leyla İsmayılzadəyə, nə də vəkillərinə təqdim edilib. Bu səbəbdən tərəflər məhkəmə prosesinə hazırlaşa bilməyiblər.

Hakim Vüqar Məhərrəmov ittiham aktını vəkilə və yeniyetmələrin anasına təqdim edib. Tərəflərə sənədlə tanış olmaları üçün sentyabrın 17-dək vaxt verilib.

Taleh Bağırzadənin övladları oxuduqları Buzovna qəsəbəsindəki 26 saylı orta məktəbdə yeniyetmələr arasında baş verən dava ilə əlaqədar cinayət məsuliyyətinə cəlb olunublar. Leyla İsmayılzadə daha əvvəl cinayət işini “təxribat” adlandırıb. Onun sözlərinə görə, oğlu mübahisə zamanı yalnız özünü müdafiə edib.

Qardaşlardan Məhəmmədhəsən Bağırzadəyə Cinayət Məcəlləsinin 127.2.3-cü (xuliqanlıq niyyəti ilə və ya ümumi təhlükəli üsulla qəsdən sağlamlığa az ağır zərər vurma) və 221.2.1-ci (bir qrup şəxs tərəfindən xuliqanlıq) maddələri ilə ittiham irəli sürülüb. Digər qardaş Məhəmmədhüseyn Bağırzadə isə yalnız 221.2.1-ci maddə ilə təqsirləndirilir.

CM-nin 127.2.3-cü maddəsi üzrə 3 ilədək azadlığın məhdudlaşdırılması və ya 5 ilədək azadlıqdan məhrumetmə cəzası nəzərdə tutulur. 221.2.1-ci maddə üzrə isə islah işləri və azadlığın məhdudlaşdırılması ilə yanaşı, 3 ilədək həbs cəzası da tətbiq oluna bilər.

Ətralfı oxumaq üçün şərhdəki linkə keçid edin.

11/09/2026

Müxalif "Güclü Ermənistan" ittifaqının lideri və biznesmen Samvel Karapetyan baş nazir Nikol Paşinyana qarşı məhkəməyə müraciət edib.

OC Media yazır ki, o, seçkiqabağı kampaniya zamanı təhqir olunduğunu bildirərək Paşinyandan ictimai formada üzr istəməsini və 3 milyon dram (8 300 dollar) təzminat ödəməsini tələb edir.
İddia Paşinyanın mayın 29-da seçki kampaniyası zamanı Karapetyan barədə söylədiyi bildirilən fikirlərlə bağlıdır. Karapetyan məhkəmədən tələb edib ki, Paşinyan həmin gün ictimai çıxışı zamanı onun barəsində “təhqiredici ifadələr işlətməsinə” görə rəsmi “Facebook” səhifəsində canlı yayım vasitəsilə üzr istəsin.

Lakin Ermənistanın məhkəmə informasiya sistemində yerləşdirilən iddia ərizəsində söhbətin konkret hansı ifadədən getdiyi göstərilmir. Seçkiqabağı kampaniya boyunca Paşinyan, Karapetyan və digər aparıcı müxalifət nümayəndələri bir-birlərinin ünvanına tez-tez sərt ittihamlar və təhqiramiz ifadələr səsləndiriblər.

Məsələn, Paşinyan müxalifəti “müharibə tərəfdarı olan üçbaşlı casus partiyası” adlandırıb.
Müxalifət isə dəfələrlə Paşinyanın “300 min azərbaycanlının” Ermənistanda məskunlaşmasına imkan verəcəyini iddia edib.
Paşinyan da may ayından bəri Karapetyana qarşı iki iddia qaldırıb. Onlardan birincisi Karapetyanın Paşinyanın ictimai çıxışlarından əvvəl Çindən gətirilən hallüsinogen göbələklər qəbul etdiyi barədə iddiası ilə bağlı olub.

Ətraflı oxumaq üçün şərhdəki linkə keçid edin.

Toplum TV

14/09/2026

14/09/2026

14/09/2026

11/09/2026

11/09/2026

11/09/2026

11/09/2026

11/09/2026

11/09/2026

11/09/2026

Address

Telephone

Website

Alerts

Contact The Business

Shortcuts

Share

Category

Listing takedown request