11/08/2025
Azərbaycanədə demoqrafik vəziyyət
Azərbaycanə Respublika Devlətə Statistika Komitə məlumat doəşe ki, ımsornə sıftənə 6 manqədə Respublikadə tosə 63 həzo korpə bə dınyo omə, ımən bə ponə sori nisbətədə 1337 nəfər, bə pionə sori nisbətədə isə 2416 nəfər kame.
Im vaxtədə mardə odəmon miğdar isə vey bıə. Yəni əqər 2023-minə sori yanvar-iyun manqonədə mardə odəmon miğdar 30 həzo 750, 2020-minə sori 30 həzo 360 nəfər bəbu, 2025-minə sori sıftənə 6 manqədə bə 40 həzo 140 nəfər rəsə. Jıqo statistik rəğəmonku oşko bedə ki, Respublikadə orəxnə soronədə zandemoni temp bə kam, mardemonı temp isə ziyod bedə. Çimiən əsasə səbəb Əliyev hokuməti bardə bərbodə sosialə siyasəte.
İğtisadşunas Revşən Ağayev “Azadlıq.info”ədə nıvıştedə ki, Avropa İttifaği devlətonədə mardəkəson 18% tosə 65 sinni jimon kardəkəson bedənbu, Azərbaycanə Respublikadə bə 2019-minə sori rəğəmon əsasən mardəkəson 41% çe 65 sinnisən kam bəkəson bıən. Merdon arədə ım rəğəm hətto bə 50% rəsedə.
Boku hokuməti tərəfo 2006-minə soriku bə əğılon manqə muavinətə pulon nıdoyən bə əhali quzəroni mənfi təsir nişon doə əlomətonədəy. Həmonə soriku bə dınyo omə har korpə qorə ailə 200 mənoti məbləğədə ikərəynə komək sedə. Imən cəmi bə 118 dollari bərobəre. Bo muğayisə ro vote lozime ki, əğıli bə dınyo ome qorə ikərəynə muavinəti məbləğ hamsuə Ermənistonədə 563 dollar, Ukraynadə 1 həzo 500 dollar, Rusiyadə 6 həzo 320 dollare. Bı devlətonədə hokuməti bo əğlinə xeyzonon hələ co sosialə qozəştonən təyin kardəşe. Boku hokumət bə zandemoni qorə bə jenon doə məzuniyyəti muddətədən co keşvəronsə dumoədə mandedə. Respublikadə ım muddət 18 həftə, Estoniyadə 20, Çexiyadə 28, Norveç və İronədə 39 həftə təşkil kardedə.
Telegramədə bə TolishMedia kanali abunə bıbən! 👇https://t.me/TolishMedia
