Արցախի հանրային ռադիո / Artsakh Public Radio

18/07/2024

Карине Айрапетян-ն Արցախ Լրատվական-ի հնչյունային ռեժիսորն էր: Ռադիոյում աշխատել է 16 տարեկանից: Կարինեն 2020 թվականի պատերազմի ժամանակ իր անչափահաս երեխաներին ուղարկել է Հայաստան, իսկ ինքը շարունակել ռադիոյի աշխատանքը:

Ի դեպ, պատերազմական օրերին, Արցախի հանրային ռադիոն երբեք չի լռել...

2023թ. բռնի տեղահանումից հետո, Կարինեն որոշել է Մասիս քաղաքում բացել հացաբուլկեղենի արտադրամաս:
Այս ոլորտում հաջողություններ կունենա՞. Կարինեն այդ մասին չի մտածում...
«Միակ ցանկությունս այն է, որ նորից հնչի Արցախի հանրային ռադիոյի ձայնը»,-ասում է:

29/02/2024

«Արցախ» լրատվականն ու Анна Григорян-ը,Татев Мирзоян-ն ու Авет Бадалян-ը

18/11/2023

Գրում է ֆիզարձակուրդից այդպես էլ չվերադարձած տնօրենը:

Տուն

֊Անն, կգա՞ս գնանք նվեր առնելու։
֊ Գնացինք։
֊ Տաթ, գուցե էդ հարցով գնանք ԱԱԾ։
֊Գնացինք։
֊ Անն, արի իջնենք, կոմպը պետքա ստուգել։
֊ Գնացինք։
֊Տաթ, երգերի մեջ ուզում եմ X կատարողի երգացանկից ավելացնեմ։
֊ Դավայ։
֊ Անն, արի 2 օրում 24֊ժամյա եթերացանկը 180°֊ով փոխենք։
֊ Կանենք։
֊ Տաթ, փոդքասթ ձայնագրե՞նք։
֊ Կանենք։

Շարքը կարող եմ անվերջ ավելացնել. իրար անընդհատ առաջարկներ էինք անում ու երբեք իրար չէինք մերժում։

Աննային ճանաչում եմ վաղուց։ Նույն տարում` մի քանի ամսվա տարբերությամբ, տեղափոխվել ենք Արեշ թաղամաս։ Ես դպրոցական էի, ինքը` նորաթուխ մայրիկ։

Տարիներ անց, երբ արդեն ես էի նորաթուխ մայրիկ, իր ավագ դուստրը` դպրոցական, բախտի բերմամբ, թե պատահմամբ, մի քանի օրվա տարբերությամբ դիմել ենք աշխատելու միևնույն կառույցում։

Ռադիոն մեզ իրար ավելի լավ ճանաչելու հնարավորություն տվեց։ Ամեն ինչ փոխադարձ է, չէ՞, այս աշխարհում։ Մեզ միավորած ռադիոյի շուրջ կենտրոնացրինք եռանդը։ Սխալվել ենք, ուղղվել, հաջողել, անընդհատ փորձել ու նորությունից երբեք չվախեցել։

Եթե չգիտեք` պատմեմ։ Աննան Երևանից էր եկել Ստեփանակերտ` ընտանիք կազմելու։ Դպրոցական տարիներիս, երբ անցնում էի Աննայենց տան մոտով, նկատում էի` ինչպես օրեցօր կառուցվում էր այն, ինչպես էին կյանքով լցվում տան պատերը, ինչպես է երիտասարդ ընտանիքը իր արմատները գցում այդ հողում։

Արցախը լքելուց մի օր առաջ Աննայի մուշմուլայի ծառի շվաքի ներքո խոսում էինք վերջին օրերին մեզ հետ կատարվածի մասին, նայում էինք` ինչպես մեր աղջիկները վազվզում էին բակում, խոր ցավ ապրում գիտակցումից, որ, երևի, վերջին անգամ, իրար հարցնում ապագա պլանների մասին, նայում մեկս մյուսի աչքերի մեջ ու լռում։ Գլուխը բարձրացրեց վեր, ասաց, որ մենակ էս ծառի տնկիները հետը կտանի իր սիրով ու հավատով կառուցած ու միշտ հյուրընկալ եղած տնից։

Աննայի հետ վերջին երեք տարում զրուցել եմ գրեթե ամեն օր, բայց միայն փոդքասթ ձայնագրելու ընթացքում եմ իմացել, որ երբ առաջին անգամ տեսավ , չկարողացավ զսպել արցունքներն ու զգացմունքները։ Արցախյան մեր վերջին օրը Աննան նույնպես լացում էր։

Հ. Գ. ֊ Անն, արի գնանք Արեշ:

06/11/2023

Գրում է ֆիզարձակուրդից այդպես էլ չվերադարձած տնօրենը:

Հասցրած հրաժեշտ

-Բորյինում օզում,- մի բաժակ գինուց հետո անկեղծացավ Սրբուհին:
Մենք էլ, ինչ մեղքներս թաքցնեմ, սկսեցինք քահ-քահ ծիծաղել (դե գինին հո մենակ չէր խմում):

Շրջափակումը Սրբուհու ընտանիքը հավասար մասերի բաժանեց: Երկու դուստրերին` մեկական ծնող: Ամուսինը մնաց ուսանող աղջկա հետ Երևանում ( նրա մնալը նաև անվտանգային հարցերով էր պայմանավորված):

Սրբուհին թեկուզ երբեմն խոստովանում էր, որ հոգնում է, բայց տղամարդկային արժանապատվությամբ ու իրեն հատուկ հումորով հաղթահարում էր շրջափակման բոլոր դժվարությունները:

Կրկժանից ոտքով էր գալիս աշխատանքի, հոգնած հետ դառնում, խնամում հիվանդ սկեսուրին ու իր մեջ նաև ուժ ու ցանկություն գտնում` զբաղվելու այլ` «թաքուն» գործով: «Մին թաքուն տեղ» բրենդը նրա ստեղծագործական ներուժն այլ անկյունից բացահայտելու հնարավորություն էր: Յուրահատուկ գրիչ ունեցող լրագրողը պարզվեց նաև, որ իրեն հատուկ վրձին ունի: Հումորով համեմում էր պատկերներն ու տպագրում տարբեր գործվածքների վրա: Նրա մտքի մի փայլատակումից հետո այլևս անզոր եմ վերհիշել Աղայանի բանաստեղծության բնօրինակը: Բույն շինող ծիծեռնակը, Սրբուհու մատուցմամբ, ամեն մի ճյուղ կպցնելիս քանդողի մորն էր հիշում: Ասեք, որ ակտուալ է:

Վերջին տարիներին Սրբուհու սկեսուրի առողջությունը մի քանի անգամ կտրուկ վատացել էր, բայց ամեն անգամ Սրբուհին ու ամուսինը ձեռքները մեկնում էին բազմաչարչար կնոջն ու օգնում դուրս գալ այդ իրավիճակից: Այս անգամ Սրբուհին մենակ էր: Չկային գազն ու էլեկտրականությունը, չկար նորմալ սնունդ, իրենց մոտ չէր տան տղամարդը, բայց էլի ձգում էր: Թույլ չէր տա, որ առանց որդուն հրաժեշտ տալու հեռանար:

Երկրորդ ձայնային հաղորդագրությունը, որից ցնցվեցի կամուրջն անցնելուց հետո, ուղարկել էր Սրբուհին. երկրորդ անգամ գաղթի ճանապարհ բռնած սկեսուրը (առաջին անգամ Բաքվից էին եկել) չդիմացավ այլևս: Ճանապարհին զգացին արդեն, որ մահամերձ է: Հակարիի կամուրջն անցավ, վերջին անգամ բռնեց որդու ձեռքն ու փակեց աչքերը: Իրականությունն այլևս անտանելի էր ապրելու համար:

Հ. Գ. քիչ իրեր եմ կարողացել հետս բերել Երևան, բայց գործընկերներիս նվերը ֆիզարձակուրդ գնալուց առաջ, որ պատրաստել է Սրբուհին, այստեղ է:

02/11/2023

Գրում է ֆիզարձակուրդից այդպես էլ չվերադարձած տնօրենը:

Հաղորդագրության ցավը

«Դմփ». սկզբում մտածեցի ամուսնուս ու եղբորս մասին: «Դմփ». նայեցի ժամացույցին: 13- ն անց էր` ամփոփ թողարկման ժամն էր: Տեսնես` ով է լուրերի մեկնաբանը, ով կար աշխատանքի տեղը: «Դմփ». մտածելու ժամանակ էլ չկար: Շաբաթներ անց արդեն փորձեցի ճշտել, մտա մեր ֆեյսբուքյան էջ ու դիտեցի մեր վերջին ուղիղ եթերը: Տաղավարում աշխատում էր Նինա Հայրապետյանը: Նրա մոլորված հայացքը, հուզված ձայներանգն ու եղանակի տեսությունը կարդալու որոշումն ինձ հուշեցին, որ երևի ձայնամեկուսացված տաղավարում դեռ լիովին չէր պատկերացնում` ինչ է կատարվում, կռահում եմ, որ ապակե պատուհանից այն կողմ տեսնում էր միայն սարսափած գործընկերներին:

Նինայի հետ այդպես էլ չհասցրի աշխատել: Նրան վաղուց եմ ճանաչել, երբ երկուսս էլ դեռ դպրոցական էինք. դասընկերուհուս կրտեր քույրն է:
Ֆիզարձակուրդի ժամանակ, երբ խմբագիր Անին հարցրեց, թե ում կարելի է հրավիրել որպես մեկնաբան, հիշեցի Նինայի հետ ունեցած մեր զրույցը: Ֆեյսբուքյան չատերի հոգեբանության «գուռուս» էկրանին հայտնվող հաղորդագրություններից էի ենթադրել, որ Նինան ու ռադիոն հավանել էին իրար, մերվել իրար հետ:

Թե ինչ է արել սեպտեմբերի 19-ի ամփոփ թողարկումից հետո Նինան, ես չգիտեմ: Գիտեմ միայն, որ նրա սիրտը մի պահ կանգ առավ սեպտեմբերի 25-ին, երբ մեկ այլ դմփոց լսվեց Ստեփանակերտում: Ես այդ պահին արդեն ճանապարհվել էի ու կապի ոչ մի հասանելի միջոց ձեռքիս տակ չունեի: Հաջորդ օրն արդեն, երբ հասա Տեղ գյուղ, միացրեցի լրատվականի չատը, որ երբեք չի լռում` հասկանալու, թե ինչ է կատարվում: Նինան ձայնային հաղորդագրություն էր ուղարկել. ամուսինն էլ է վառվել, հիմա հիվանդանոցում են: Դժոխային պատկերը, որին ականատես էր Նինան, ինձ փոխանցվեց իր ձայներանգով: Ես, որ միշտ կարողանում եմ զսպել իմ էմոցիաները ու որ միշտ հաջողությամբ ձևացնում եմ պինդ լինելս, զգացի` ինչպես է կոտրվում հոգիս, ինչպես այլևս անզոր եմ դիմադրելու հույզերի այդ հեղեղին: Ես, որ կիլոմետրերով արդեն հեռու էի իմ ծննդավայրից, Նինայի ձայնից զգացի ողբերգության մասշտաբը: Տողերը գրելուց ուզում էի միացնել, որ բառացիորեն վերարտադրեմ այդ հաղորդագրությունը. չկարողացա, չուզեցի:

Նինայի ամուսինը հիմա կազդուրվում է, փառք Աստծո:

Նինայի ձայնն այլևս հավետ իմ ականջներում է:

03/10/2023

ԱՀ դեմ իրականացված ագրեսիայի հետևանքով սեպտեմբերի 24-ին և դրանից հետո բռնի տեղահանված բոլոր անձինք ՀՀ կառավարության որոշմամբ կստանան 100 հազար դրամ միանվագ աջակցություն՝ առաջնային կարիքների ծախսերի ապահովման համար։

Աջակցության ծրագրից օգտվելու համար անհրաժեշտ է հետևել ՀՀ աշխատանքի և սոցիալական հարցերի նախարարության կողմից տրված ցուցումներին։⤵️

https://www.facebook.com/100064854781936/posts/705880931583727/?mibextid=cr9u03

Ինչպե՞ս կարող են ԼՂ-ից տեղահանված անձինք ստանալ կառավարության կողմից հատկացվող 100 հազար դրամ միանվագ աջակցությունը

ԼՂ դեմ իրականացված ագրեսիայի հետևանքով սեպտեմբերի 24-ին և դրանից հետո բռնի տեղահանված բոլոր անձինք ՀՀ կառավարության որոշմամբ կստանան 100 հազար դրամ միանվագ աջակցություն՝ առաջնային կարիքների ծախսերի ապահովման համար։

Աջակցության ծրագրից օգտվելու համար անհրաժեշտ է հետևել նշված քայլերին՝

✅ Քայլ 1. Աջակցությունից օգտվելու համար պարտադիր է, որ անձը հաշվառված լինի ՆԳՆ Միգրացիայի և քաղաքացիության ծառայության տվյալների բազայում։ Նրանք, ովքեր Հայաստան մուտք գործելիս հաշվառում չեն անցել, պետք է մոտենան Հայաստանի 60-ից ավել համայնքներում ստեղծված տարածքային հումանիտար կենտրոններ (հասցեները՝ https://irazekum.am/nkc) կամ Փարաքարի Միասնական սոցիալական ծառայության կայան (հասցե՝ Նաիրի 40):

✅ Քայլ 2. Հաշվառում անցած տեղահանված այն անձինք, ովքեր չունեն բանկային քարտեր, պետք է դիմեն նախընտրելի բանկ՝ անվճար քարտ ստանալու համար, որին կփոխանցվի աջակցության գումարը*։ Քարտի թողարկման դիմումը ներկայացնելուց հետո Կենտրոնական բանկը նոր քարտատիրոջ քարտի համարը կուղարկի Միասնական սոցիալական ծառայությանը՝ դրամական աջակցությունը քարտին փոխանցելու համար։

ℹ️ Ընդ որում՝

📌 Տեղահանված այն անձինք, ովքեր ունեն բանկային քարտեր (այդ թվում՝ կենսաթոշակի), որևէ տեղ դիմելու, նոր քարտ ձեռք բերելու անհրաժեշտություն չունեն։ 100 հազար դրամ միանվագ աջակցությունը առաջիկա օրերի ընթացքում կփոխանցվի նրանց քարտերին։

📌 75 տարին լրացած, ինչպես նաև 1-ին կամ 2-րդ խմբի հաշմանդամություն ունեցող անձինք, ովքեր չունեն բանկային քարտ, աջակցությունը կարող են ստանալ կանխիկ եղանակով՝ Հայփոստից (ըստ անհրաժեշտության՝ փոստատարի միջոցով)՝ անձը հաստատող փաստաթղթի հիման վրա։

ℹ️ Կարևոր դիտարկումներ.

📌 Յուրաքանչյուր չափահաս անձ պետք է ունենա սեփական քարտային հաշիվ, որին կփոխանցվի աջակցության գումարը։

📌 Անչափահաս երեխաներին հասանելիք աջակցության գումարը կստանա նրանց մայրը կամ օրինական ներկայացուցիչը՝ առցանց հարթակում դիմում ներկայացնելով (հարթակի գործարկման մասին կտեղեկացնենք Կառավարության կողմից կարգը հաստատելուց հետո) կամ Միասնական սոցիալական ծառայություն մոտենալով։

📌 Այն անձինք, ովքեր չունեն անձը հաստատող փաստաթուղթ, պետք է նախապես մոտենան ՆԳՆ Միգրացիայի և քաղաքացիության ծառայություն (անձնագրային բաժանմունք), որտեղ իրենց անձը նույնականացնելուց հետո կտրվի տեղեկանք, որի հիման վրա հնարավոր կլինի բանկում բացել քարտային հաշիվ և ստանալ աջակցության գումարը։

ℹ️ * Քարտային հաշիվ հնարավոր է բացել Հայաստանում գործող բոլոր բանկերում, բացի «Մելլաթ Բանկ» ՓԲԸ և «Ֆասթ բանկ» ՓԲԸ բանկերից, որոնք այս պահի դրությամբ ֆիզիկական անձանց քարտային հաշիվներ չեն սպասարկում:

☎️ Հարցերի դեպքում խնդրում ենք զանգահարել Թեժ գիծ՝ 114 հեռախոսահամարով։

03/10/2023

ԼՂ-ից բռնի տեղահանված 2784 երեխա ընդգրկվել է հայաստանյան կրթական հաստատություններում։

02/10/2023

Հոկտեմբերի 2-ին սնունդ տեղափոխող մեքենայի ուղղությամբ Ադրբեջանի ԶՈՒ կրակի հետևանքով հայկական կողմն ունի 1 զոհ և 2 վիրավոր. ՀՀ ՊՆ

Ադրբեջանի ԶՈՒ ստորաբաժանումները թիրախավորած են եղել նաև շտապօգնության մեքենան, ինչը միջազգային մարդասիրական իրավունքի նորմերի կոպտագույն խախտում է։

Զոհված զինծառայողն է ՀՀ ՊՆ N զորամասի զինծառայող Արամ Տիգրանի Քոչարյանը:

Հայաստանի Հանրապետության պաշտպանության նախարարությունը վշտակցում և զորակցություն է հայտնում զինծառայողի ընտանիքի անդամներին, հարազատներին և ծառայակիցներին:

Վիրավոր 2 զինծառայողների կյանքին այս պահին վտանգ չի սպառնում, տեղափոխվել են զինվորական հոսպիտալ:

02/10/2023

Հայկական դիրքերի անձնակազմի համար սնունդ տեղափոխող մեքենայի ուղղությամբ Ադրբեջանի ԶՈՒ կրակի հետևանքով հայկական կողմում կան տուժածներ. պաշտպանության նախարարությունը տեղեկություններ կտրամադրի ավելի ուշ:
Ժամը 16:00-ի դրությամբ իրադրությունն առաջնագծում հարաբերականորեն կայուն է:

ՀՀ ՊՆ

02/10/2023

Հոկտեմբերի 2-ին՝ ժամը 14:25-ի սահմաններում, Ադրբեջանի ԶՈՒ ստորաբաժանումները հրաձգային զենքերից կրակ են բացել Կութի հատվածում տեղակայված հայկական դիրքերի անձնակազմի համար սնունդ տեղափոխող մեքենայի ուղղությամբ:

ՀՀ ՊՆ

01/10/2023

ԱՀ նախագահը մի խումբ պատասխանատու անձանց հետ դեռևս կմնա Ստեփանակերտում

Արցախի Հանրապետության նախագահ Սամվել Շահրամանյանը մի խումբ պատասխանատուների հետ կմնա Ստեփանակերտում այնքան ժամանակ, մինչև չավարտվեն սեպտեմբերի 19-ից 20-ը տեղի ունեցած ռազմական գործողությունների և սեպտեմբերի 25-ին Ասկերանի շրջանում վառելիքի պահեստի պայթյունի հետևանքով զոհվածների աճյունների ու անհետ կորածների որոնողափրկարարական աշխատանքները։
Արցախի տեղեկատվական շտաբը տեղեկացնում է նաև, որ կառավարությունը շարունակում է ուշադրության կենտրոնում պահել ՀՀ տեղափոխվել ցանկացող այն քաղաքացիների հարցը, ովքեր տարբեր պատճառներով հնարավոր է, որ գտնվելիս լինեն Հանրապետության տարածքում։

Արցախի տեղեկատվական շտաբ

01/10/2023

Այս պահի դրությամբ Արցախից բռնի տեղահանված 100․514 անձ է ժամանել Հայաստան: