28/07/2026
: Mu ntumbero yo gushira mu ngiro umugambi wa Leta wo gukuraho burundu ubukene bw'intebe Ku bana b**a bicaye hasi, kuri uyu wa mbere, igenekerezo rya 27 Mukakaro 2026, Musitanteri wa Komine Kiremba, Habiyakare Pascal, yakiriye intebe 1.011 zagenewe amashure yo muri iyo komine, kugira zishikirizwe abarongoye ibigo vy'amashure.
Izo ntebe zakozwe mu mazone ya Gakere, Musasa, Bugina na Kiremba, biciye mu mugambi wa Leta ushirwa mu ngiro n'Ibiro vy'Umushikiranganji wa Mbere, ugamije gukuraho burundu ikibazo c'ubukene bw'intebe Ku banyeshure b**a bicaye hasi.
Mu majambo yashikirije, Musitanteri wa Komine Kiremba yasavye abarongoye igisata c'indero kwihutira gushikiriza izo ntebe ibigo vy'amashure, bahereye ku bifise ikibazo gikomeye kurusha ibindi. Yabibukije kandi ko zikwiye kubungabungwa, narirya zatwaye uburyo bwinshi bw'Igihugu n'ubw'abenegihugu.
Ku ruhande rwiwe, Umukuru w'Igisata c'Indero muri Komine Kiremba, Irakiza Gratien, yasavye abazohabwa izo ntebe kuzifata neza, anibutsa ko zavuye mu ntererano n'utwigoro tw'abenegihugu. Yamenyesheje kandi ko hagiye gushingwa amakomite ku mashure yose azoba ajejwe gukurikirana, kubungabunga no gusanura hakiri kare intebe zose zoshobora kwononekara.
Ico gikorwa ni intambwe ikomeye mu gukomeza Igisata c'indero no guteza imbere imibereho myiza y'abanyeshure, hisunzwe ihangiro rya Leta ryo kuronsa bose inyigisho zibereye kandi z'akanovera.
