02/07/2025
ആൽബർട്ടയിൽ വൈദ്യുത വാഹനങ്ങൾക്കുള്ള 200 ഡോളർ നികുതി ഫെബ്രുവരി 13 വ്യാഴാഴ്ച ആരംഭിക്കുമെന്ന് പ്രവിശ്യ ധനമന്ത്രി നേറ്റ് ഹോർണർ. എന്നാൽ, ഹൈബ്രിഡ് വാഹനങ്ങളെ ഈ നികുതിയിൽ നിന്ന് ഒഴിവാക്കിയിട്ടുണ്ടെന്ന് മന്ത്രി അറിയിച്ചു. ഇനി മുതൽ പ്രവിശ്യയിൽ ഒരു ഇലക്ട്രിക് വാഹനം രജിസ്റ്റർ ചെയ്യുമ്പോൾ സാധാരണ രജിസ്ട്രേഷൻ ഫീസിനൊപ്പം 200 ഡോളർ നികുതിയും അടയ്‌ക്കേണ്ടി വരും.
പ്രവിശ്യാ ഹൈവേകൾ പരിപാലിക്കാൻ ഉപയോഗിക്കുന്ന ഇന്ധന നികുതി ഇലക്ട്രിക് വാഹന ഉടമകൾ അടയ്ക്കുന്നില്ലെന്ന് ആരോപിച്ചാണ് 200 ഡോളർ അധിക നികുതി ചുമത്താനുള്ള പ്രവിശ്യ സർക്കാരിന്റെ തീരുമാനം. പ്രവിശ്യ സർക്കാരിന്റെ തീരുമാനത്തിനെതിരെ ആൽബർട്ട ഇലക്ട്രിക്കൽ വെഹിക്കിൾ അസോസിയേഷൻ രംഗത്ത് എത്തി. അധിക നികുതി ചെറിയ ഇലക്ട്രിക് വാഹന ഉടമകളെ സാരമായി ബാധിക്കുമെന്ന് അസോസിയേഷൻ പ്രസിഡൻ്റ് വില്യം യോർക്ക് പറഞ്ഞു.
