07/13/2025
ອິເລັກໂຕຣມ (Electrom) ບໍລິສັດຈາກແຄນາດາ ເປີດຕົວລົດຖີບໄຟຟ້າທີ່ອ້າງວ່າສາມາດໃຊ້ເດີນທາງໄກໄດ້ສູງສຸດ 200 ກິໂລແມັດ ດ້ວຍຮູບຊົງທີ່ຄ້າຍຄືກັບລົດຈັກ 3 ລໍ້ເອີ້ນວ່າ ເວໂລໂມບິນ (Velomobile) ເຊິ່ງມີຄວາມໂດດເດັ່ນດ້ວຍມີກະຈົກບັງລົມປົກຄຸມຄົນຂັບຈົນຂຶ້ນໄປເທິງສຸດ ແລະ ຍັງມາພ້ອມສ່ວນຫຸ້ມຂາດ້ານໜ້າອີກດ້ວຍ
Electrom ມີຄວາມຍາວ 2.77 ແມັດ ຖານລໍ້ຍາວ 2.13 ແມັດ ສ່ວນຄວາມກວ້າງທີ່ສຸດຂອງລົດແມ່ນຊ່ວງມືຈັບກວ້າງ 66 ຊັງຕີແມັດ ນ້ຳໜັກສູງສຸດ 70 ກິໂລກຣາມ ເມື່ອຕິດຕັ້ງແບັດເຕີຣີສຳລັບການຈ່າຍໄຟ 2 ອັນ. ໂຄງຮ່າງດັດເປັນອັນດຽວກັນ ຫຼື ໂມໂນຄອກ (Monocoque) ເພື່ອຄວາມແຂງແຮງແລະມີນ້ຳໜັກເບົາ ສ່ວນຕົວຖັງເຮັດຈາກວັດສະດຸພໍລີຄາບອນເນດ (Polycarbonate)
ມັນມີ 2 ແບບຈຳລອງ ລຸ່ນທ໋ອບສຸດ ຫຼື ລຸ່ນດີລັກ ຈະໄດ້ມໍເຕີຄູ່ຫນ້າແຮງບິດ 43 ນິວຕັນແມັດ (Nm) ກັບມໍເຕີຄູ່ຫຼັງແຮງບິດ 100 ນິວຕັນແມັດ ແຕ່ບໍ່ໄດ້ບອກວ່າແຮງບິດລວມເປັນເທົ່າໃດ ເລັ່ງສູງສຸດ 65 ກິໂລແມັດຕໍ່ຊົ່ວໂມງ ຕິດຕັ້ງແບັດເຕີຣີຂະໜາດ 22.4 ແອມແຮ (Ah) 2 ອັນ ແລ່ນໄດ້ໄລຍະທາງໄກສຸດ 200 ກິໂລແມັດຕໍ່ຮອບຈາກການຊາກແບັດ
ລົດໃຊ້ລະບົບເກຍແບບດຽວກັນກັບລົດຖີບທົ່ວໄປ ພ້ອມໂສ້ແລະບ່ອນຖີບໃນຕຳແຫນ່ງປາຍຕີນ ບ່ອນນັ່ງເຮັດຈາກຄາບອນໄຟເບີ ເໝາະສົມກັບຄົນທີ່ມີຄວາມສູງລະຫວ່າງ 152 - 198 ເຊັນຕີແມັດ ແລະມີກ່ອງເກັບເຄື່ອງຢູ່ດ້ານຫລັງ (Tailbox) ທີ່ມີຂະໜາດ 100 ລິດ ຫຼື ຈະເພີ່ມເປັນກ່ອງໃຫຍ່ຂຶ້ນໄດ້ເຊິ່ງເປັນອອບຊັນເສີມ
Electrom ຍັງມີຕົວເລືອກສີິສຳລັບຕົວຖັງໃຫ້ເລືອກໄດ້ຫລາຍສີ ເນື່ອງຈາກເປັນການຫຸ້ມຫໍ່ (Wrap) ດ້ວຍຟິມໄວນິນ ຈຶ່ງສະດວກໃນການປ່ຽນສີຕາມຄວາມຕ້ອງການ
ລາຄາ:
ລຸ່ນເລີ່ມຕົ້ນ: 9,890 ໂດລາສະຫະລັດ (ປະມານ 217 ລ້ານກີບ)
ລຸ່ນທ໋ອບສຸດ: 15,500 ໂດລາແຄນາດາ (ປະມານ 256 ລ້ານກີບ)
ລຸ່ນທ໋ອບສຸດຈະຜະລິດໃນແຄນາດາເທົ່ານັ້ນ ແລະສາມາດສັ່ງຊື້ໄດ້ທົ່ວໂລກ ແຕ່ລາຄາຈະຂຶ້ນຢູ່ກັບອັດຕາແລກປ່ຽນສະກຸນເງິນ
#ລົດຖີບ #ລົດຖີບໄຟຟ້າ #ແຄນາດາ #ແບັດເຕີຣີ
