01/17/2024
Sou deklarasyon Tafa Mi-Soleil la :
Kòman nou ye ?
Gen yon teyori nan sosyoloji ak syans politik, filozòf Elizabeth Neumann fòmile ki rele "Spirale du silence". M te aprann sa nan men Pwofesè Romel nan Fakilte Syans Moun.
Li pati konsa :
Moun, nan yon gwoup, souvan pè eksprime
opinyon enpopilè (oubyen vle eksprime
opinyon ki popilè) pou yo ka entegre yo pi
fasilman epi evite izòlman sosyal.
Pou m pi klè, pandan m ap al pi lwen: pafwa yon eleman ka antre nan yon gwoup gang (padon pou move egzanp sa), epi sa rive li difisil pou l entegre l. Poukisa ? Paske lòt manm gwoup la pa twouve l ase kredib. Yo ka wè l sanble yon ti pastè, yon toutè. Pou l montre li vo plas li nan gwoup la, pou l montre apatenans, li konn komèt zak ki etone menm lòt kriminèl ki gen plis eksperyans nan gwoup la.
Sa pa vle di, pou otan, moun nan pa eksprime pwòp konviksyon l vre non. Men, li fè l pafwa avèk eksè. Gustave Le Bon ta di pito, enpilsivite. Yon moun ka toujou di sa l panse. Men lè l di l nan yon gwoup ki pwobableman omojèn, se pa yon move lide si w remete degre konviksyon moun nan nan sa l di a an kesyon. Men m si nan ka pa li a, m pa gen dout sou konviksyon an. Men tou, mwen te vle di, se pa paske yon moun eksprime yon opinyon pèsonèl ou pa ka atake validite l.
Pou rezime, se pa la deba ye non, men mwen panse li kwè nan sa l di a. Li pa di l paske l ap chèche kache sa l panse pou gwoup la. Li di l paske se sa l panse tou. Men m kwè li fè yon eksè pou chèche apwobasyon gwoup li te ye a (paske l petèt panse yo poko fin aksepte l). Sou fondman sa l di a, mwen panse, menm si se yon opinyon li montre ki konsène l pèsonèlman; moun gen dwa atake validite afimasyon li an.
Mwen gen lide pa m sou sa l di a, men m kite rès deba sou validite opinyon an pou etnològ ak sosyològ yo. Mèsi.
JL
