08/24/2026
கனடா மற்றும் அமெரிக்காவுக்கு இடையிலான வர்த்தக பேச்சுவார்த்தைகள் முறிவடைந்த நிலையில், அமெரிக்க ஜனாதிபதி டொனால்ட் டிரம்ப் ஞாயிற்றுக்கிழமை அதிகாலை தனது “கனடா அமெரிக்காவின் 51வது மாநிலமாக வேண்டும்” என்ற கருத்தை மீண்டும் முன்வைத்தார்.
தனது சமூக ஊடக தளமான *Truth Social*-இல் வெளியிட்ட பதிவில், “கனடா ஒரு மாநிலமாக இல்லாமல், ஒரு மாநிலத்திற்கு கிடைக்கும் நன்மைகளை விரும்புகிறது. பல ஆண்டுகளாக அவர்கள் எங்கள் விவசாயிகளிடம் மிக அதிக அளவிலான சுங்க வரிகளை விதித்துள்ளனர். இனி அது நடக்காது,” என்று டிரம்ப் தெரிவித்தார்.
இதற்கு முன்னர் வெள்ளிக்கிழமை, பேச்சுவார்த்தைக்காக நிர்ணயிக்கப்பட்டிருந்த சனிக்கிழமை காலக்கெடுவிற்கு முன்பாக இரு நாடுகளும் ஒரு உடன்பாட்டை எட்டும் என்ற நம்பிக்கையை டிரம்ப் வெளியிட்டிருந்தார்.
ஆனால் சில மணி நேரங்களுக்குப் பிறகு, பிரதமர் மார்க் கார்னி, வாஷிங்டனில் பேச்சுவார்த்தையில் ஈடுபட்டிருந்த கனடிய குழுவை திரும்ப அழைத்ததுடன், எஃகு மற்றும் பால் உற்பத்தி போன்ற துறைகளில் அமெரிக்கா விதித்துள்ள 50 சதவீத சுங்க வரிகளுக்கு “டொலருக்கு டொலர்” என்ற அடிப்படையில் பதிலடி சுங்க வரிகளை விதிப்பதாக அறிவித்தார்.
“அவர்கள் வழங்கியதை நாங்கள் ஏற்க முடியாது; அவர்கள் கேட்டதை நாங்கள் வழங்கவும் மாட்டோம்,” என்று கார்னி தெரிவித்தார்.
பிரதமர் அலுவலகம் வெளியிட்ட தகவலின்படி, கனடாவின் பதிலடி சுங்க வரிகள் தொழிலாளர் தினத்திற்குப் பிறகு வரும் செப்டம்பர் 8 ஆம் தேதி முதல் அமலுக்கு வரும்.
பேச்சுவார்த்தையின் இறுதி கட்டத்தில் இரு தரப்பும் என்ன கோரிக்கைகள் வைத்தன அல்லது என்ன சலுகைகள் வழங்கின என்பதற்கான விவரங்கள் முழுமையாக வெளியிடப்படவில்லை. இருப்பினும், சனிக்கிழமை கார்னி, பேச்சுவார்த்தை முறிவுக்கு காரணமான மூன்று முக்கிய அம்சங்களை சுட்டிக்காட்டினார்.
அவரின் கூற்றுப்படி, கார் இறக்குமதி வரிகள் தொடர்பாக முன்னேற்றம் ஏற்பட்டிருந்தாலும், நடுத்தர மற்றும் கனரக வாகனங்களான லாரிகள் அந்த ஒப்பந்தத்தில் சேர்க்கப்படவில்லை. அமெரிக்கா கார்கள் தொடர்பான ஒப்பந்தத்திற்கே சம்மதம் தெரிவித்ததாகவும், பெரிய வாகனங்களுக்கு அதை விரிவுபடுத்த மறுத்ததாகவும் அவர் கூறினார். இது ஓக்வில்லில் உள்ள Ford Motor தொழிற்சாலைகள் போன்றவற்றுக்கு பாதிப்பை ஏற்படுத்தும் என அவர் எச்சரித்தார்.
பேச்சுவார்த்தைகள் குறித்து நேரடி தகவல் கொண்ட ஒரு வட்டாரம், அமெரிக்கா எஃகு மற்றும் அலுமினிய சுங்க வரிகளை 50 சதவீதத்திலிருந்து 25 சதவீதமாகவும், வாகனங்களுக்கான சுங்க வரியை 25 சதவீதத்திலிருந்து 15 சதவீதமாகவும் குறைக்க முன்வந்ததாக தெரிவித்தது. மேலும், மென்மர (softwood lumber) வர்த்தகமும் விவாதிக்கப்பட்டதாக இரண்டு வட்டாரங்கள் தெரிவித்தன.
கார்னி பேச்சுவார்த்தை மேசையிலிருந்து விலகியதற்கான மற்றொரு முக்கிய காரணம், கனடா எதிர்காலத்தில் பிற நாடுகளுடன் மேற்கொள்ளும் வர்த்தக ஒப்பந்தங்களுக்கு கட்டுப்பாடுகளை விதிக்கும் விதிமுறைகளை அமெரிக்கா சேர்க்க விரும்பியதாகும்.
இந்த நிலையில், இரு நாடுகளுக்கும் இடையிலான வர்த்தக உறவுகள் மீண்டும் பதற்றமான கட்டத்தை எட்டியுள்ளன.
Image & Editorial Content Adaptation © 2026 Thaalam FM
