10/04/2025
Deg-deg: Arimo Xasaasi Ah & Is-mari-waa Ka Soo Kordhay Shirkii Xukuumada & Xeerbeegtida Dhaqanka Ee Awdal
Warar hordhac ah ayaa ka soo baxaya kulankii u dhexeeyay Wafdiga wasiirada ah ee ka socda Xukuumada Somaliland ee uu horkacayay Wasiirka Arimaha Gudaha Somaliland Cabdalle Maxamed Carab oo dhinac ah, iyo dhinaca kale oo ah oday-dhaqameedka iyo xeer beegtida gobolka Awdal.
Kulankan oo ahaa mid la sii saadaalinayay in uu qabsoomo ayaa ka dhacay hotelka Safari ee magaalada Boorama, waxana lagaga wada hadlayay xiisada maalmahan dambe ka taagnayd magaalada Saylac ee lagaga soo horjeeday bandhiga buuga xeerka Ciise iyo saamaynta ka dhalatay ee ah xadhiga ay xukuumadu kula kacday dhalinyaro tiro badan oo bandhigan ka biyo diiday oo laga soo xidhay maalintii shalay magaalada Saylac, haatana ku xidhan magaalada Hargaysa.
Wararka hordhaca ah ayaa waxa ay sheegayaan in wajigii h**e ee kulanku ku dhamaaday guul-daro, kadib markii la isku afgaran waayay qodob muhiim ah oo ahaa dhalinta xidhan, kaas oo ay warar xog ogaal ahi sheegayaan in odaydhaqameedku ay ku adkaysteen in aan shirku furmi karin ilaa inta la keenyo dhalintaas oo xor ah, halka ay xukuumaduna damacsanayd in shirku furmo, kadibna xadiga dhalinto qayb ka noqdo qodobada miiska saaran ee laga wada hadlayo.
Ma cada jihada uu shirku u dhaqaaqi doono, marka laga reebo shirar doceedyo gaar-gaar ah oo dhinac walba dhankiisa u qabsanayo, waxaase suura gal ah in xal laga gaadho qodobkan la isku mari waayay isla caawaba, barina la qabto shirka muhimka ah ee diirada lagu saarayo arimaha amniga iyo saamaynta uu bandhiga buugani ku yeeshay iyo sidii arinta loo soo afjari lahaa.
Wixii warar ah ee soo kordha kala soco bogga RBS TV
