01/01/2026
Siyaasiyiin ka tirsan baarlamaanka labada aqal oo gebi ahaantood kasoo jeeda maamulka gooni goosadka ee somaliland ayaa maanta warbaahinta magaalada muqdisho u aqriyey bayaan ay ku taageerayaan maamulka somaliland ayagoo iska dhigaya iney mar walba u taagan yihiin ka shaqeynta midnimada somaliya hadalkaas oo ah kalaam faaruq.
Hadaad dhegeysateen hordhaca hadalkooda wexey ku sheegeen in somaliland oo Dal ah ay kusoo biireen somaliya oo Dal ah, Taasoo beenta koowaad ah waxa isku biirey ma ahayn Laba Dall ee wexey ahaayeen Laba Gobolood, Gobolada Waqooyin oo markasi gumeysanayey British iyo Gobolada koonfureed oo markaasi gumeysnayey Talyaaniga.
Wexey kaloo sheegeen in dhamaan dowladihii la dhisey isku biirista gobolada waqooyi iyo gobolada koonfureed kadib ay xukunkii oo dhan wada qaateen siyasiyiintii kasoo jeeday Gobolada Koonfureed halka siyaasiyiintii kasoo jeedey Gobolada Waqooyi aan waxba la siin, taasoo ayadana ah been kale halka dowlada kacaanka bilow ilaa iyo dhamaad ka tirsanaayeen, waxaana 25kii golaha sare ee kacaanka ugu jirey Gaanshaanle sare Ismaciil Cali abukar iyo Axmed Saleebaan Dafle iyo qaar kaloo badan.
Wexey kaloo ka hadleen in xukumadii siyaad bare ay dhibaato badan u geysatey Gobolada Waqooyi dad badana lagu xasuuqay, Taasoo ayadana ah marin habaanin kale ama beentii loo sheegayey shacabka Reer Somaliland oo la rabo in la dhabeeyo, Maamulka Siyaad bare ma jirin reer uu gooni u beegsadey balse wuxuu beegsanaayey jabhado lidi ku ahaa xukuumadiisa taasina waa wax ay sameeyaan dhamaan madaxda dowlado badan.
Siyaasiyiintan aan ka war heyn waxey ku hadlayaan amaba aan daraasaad badan kusoo sameyn doodooda ayaa waxaa kaloo noo sheegeen in xiligii carte ilaa iyo maanta in siyaasada dalka ay hogaanka u hayaan siyaasiyiinta kasoo jeeda Gobolada Koonfureed taasoo ayadana been kale ah, Xiligii carte ilaa iyo maanta siyaasiyiinta kasoo jeeda waqooyiga k**a marneyn siyaasada dalka, Waa laga yaabaa in kooxdii mataleysay waqooyiga ineysan aheyn dad mug ku leh siyaasada shacabka waqooyiga laakiin ayagaba dhowrkii sano ee lasoo dhaafay matalayey welina u taagan iney Matelaan hadeysan ayaga is aaminsaneyd xilka ha iska casileen.
Ugu dambeyn kooxdani wexey soo saareen bayaan ka kooban dhowr qodob oo ay ugu yeereen talo balse aan talo eheyn oo dhinac u janjeera markastana wexey gardarada saarayeen dowlada federaanka somaliya iyaga oo aan marnaba ka hadlin qaladaadkii kala duwanaa ee ay galeen siyaasiyiinta la magac baxay somaliland iyo weliba kan hadal heynta badan dheliyey.
Isku soo wada duub aniga talo ahaan waxaan kusoo jeedin lahaa kooxdan magalada muqdisho usoo shaqo doonatey in dib loogu musaafuriyo deeganada ay sheeganayaan markaasi kadib in wadahadal sax ah lala galo kooxda ay ka go,an tahay in lagala xaajoodo arimaha somaliland, Kuwan iyo weliba kuwo kaloo badan yaan waqtiga lagu lumin, dad dhor iyo labaadan sano siyaasad ay kusoo jireen mushaar iyo xilana kasoo qabtey kana been sheegaaya in ay ku weyn tahay qadiyada somalinimo anagoo arkeyna iney ku weyn tahay mida reerkooda ma garan karo waxa loo heysto.
Somaliya soomaali baa leh, Shaqsi walba oo Qaran qabiil ka doorbida yaan lagu dhexheyn siyaasada dalka sababtoo ah waa qof xanuunsan qof xanuunsana danta guud laguma aamini karo.
Somaliya mar walba Guul.
