06/11/2025
लखन थापा मगरको सालिक अनावरण, मोरङ मिक्लाजुङ–३ बोक्रेमा ऐतिहासिक दिवस मनाइयो
मोरङ, मिक्लाजुङ गाउँपालिका–३ बोक्रे।
नेपालका प्रथम सहिद लखन थापा मगरको स्मृतिमा मोरङ मिक्लाजुङ गाउँपालिका–३ बोक्रे टोलमा आज एक ऐतिहासिक कार्यक्रमका बीच लखन थापा मगरको सालिक (मूर्ति) अनावरण गरिएको छ।
राष्ट्रको स्वतन्त्रता, जनताको अधिकार र समानताको लागि आफ्नो जीवन अर्पण गरेका सहिद लखन थापाको योगदानलाई सदैव जीवित राख्ने उद्देश्यले स्थानीय युवाहरू, समाजसेवी र बासिन्दाहरूको संयुक्त पहलमा उक्त सालिक निर्माण गरिएको हो।
कार्यक्रमको उद्घाटन गाउँपालिका उपाध्यक्ष श्री दिनेश पौडेलले पानसमा दियो बालेर गर्नुभयो भने, सालिक अनावरण प्रमुख समाजसेवी सन बहादुर राना मगरज्यूको हातबाट गरियो।
कार्यक्रमको सभाध्यक्ष जय थापा मगर र राम कुमार राई रहनुभयो।
त्यसैगरी मुख्य अतिथि गाउँपालिका उपाध्यक्ष दिनेश पौडेल, विशिष्ट अतिथि वडा नम्बर ३ का अध्यक्ष सन्तोष थापा मगर, अतिथि खगेन्द्र मादेन तथा अन्य स्थानीय समाजसेवी, प्रहरी, राजनीतिक दलका अग्रज, बुद्धिजीवी र अभिभावकहरूको उल्लेखनीय उपस्थिति रहेको थियो।
कार्यक्रममा बोल्दै वडा अध्यक्ष सन्तोष थापा मगरले सालिक निर्माण कार्यमा सहयोग पुर्याउने सबैलाई धन्यवाद ज्ञापन गर्दै, बोक्रे टोललाई ‘लखन थापा मगर चोक’को रूपमा नामकरण गरिएको घोषणा गर्नुभयो। साथै, वडा कार्यालयबाट वरिपरि बार लगाउने कार्यका लागि रु. १ लाख बजेट छुट्याएको पनि जानकारी दिनुभयो।
त्यसैगरी कार्यक्रमका अतिथि पूर्व वडा अध्यक्ष खगेन्द्र मादेनले सालिक निर्माणमा देश तथा विदेशमा रहनुभएका सम्पूर्ण सहयोगी हातहरूलाई हार्दिक धन्यवाद व्यक्त गर्दै, यो कामले बोक्रे टोल मात्र होइन, सम्पूर्ण मिक्लाजुङ क्षेत्रको गौरव बढाएको बताउनुभयो।
सालिक निर्माणमा अहोरात्र खटिएका प्रमुख अभियन्ताहरूमा
१. शेरबहादुर राना मगर
२. सुमन राना मगर
३. भीमबहादुर राना मगर
४. डम्बर श्रेष्ठ
५. सोम राना मगर
रहेका छन्।
त्यस्तै, लखन थापा मगर चोक निर्माण समितिमा
अध्यक्ष: जय थापा मगर
सचिव: राम कुमार राई
कोषाध्यक्ष: लक्ष्मी राना मगर
रहनुभएको छ।
बोक्रे टोलमा मगर समुदायको जनसंख्या करिब १% मात्र भए पनि अन्य जातजातिसँगको सहकार्य र एकताबाट बनेको यो सुन्दर, शान्त बस्ती आजदेखि “लखन थापा मगर चोक”का रूपमा चिनिन थालेको छ।
कार्यक्रमले राष्ट्रिय एकता, सहिदप्रतिको सम्मान र स्थानीय पहिचानलाई बलियो बनाएको स्थानीयवासीहरूले बताएका छन्।
---
