28/07/2026
राष्ट्रिय बाँस मिसनअन्तर्गत पश्चिम सिक्किमका विभिन्न बाँस प्रशिक्षण केन्द्रहरूको स्थलगत निरीक्षण
गेजिङ, २८ जुलाई २०२६।
राष्ट्रिय बाँस मिसन (National Bamboo Mission) अन्तर्गत सञ्चालन भइरहेका विभिन्न योजनाहरूको प्रभावकारी कार्यान्वयनको समीक्षा गर्ने उद्देश्यले उद्यान तथा नगदेबाली विभागका सचिव श्री टी. टी. भोटियाको नेतृत्वमा पश्चिम सिक्किमको गेजिङ–बर्मिक क्षेत्रका विभिन्न बाँस प्रशिक्षण केन्द्रहरूको स्थलगत निरीक्षण सम्पन्न भयो।
उक्त निरीक्षण कार्यक्रममा अतिरिक्त निर्देशक श्री रबिन गुरुङ, अतिरिक्त निर्देशक (उद्यान) श्री कर्मा शेर्पा, उपनिर्देशक (उद्यान) श्री भानु कुमार क्षेत्री, संयुक्त निर्देशक (उद्यान) श्री ताशी भोटिया, ही गाउँ सिस्को बैंकका प्रबन्धक पाल्मु भोटिया, मिल्क युनियनका अध्यक्ष श्री यम कुमार मिश्र, ओएसडी श्री सनबीर लिम्बू, सीएलसीका प्रतिनिधिहरू, पञ्चायत अध्यक्ष तथा पञ्चायत सदस्यहरूको उपस्थिति रहेको थियो।
निरीक्षण टोलीले सर्वप्रथम बर्थाङस्थित श्री नारदमुनि शर्माको निवासमा रहेको बाँस प्रशिक्षण केन्द्रको अवलोकन गर्यो। त्यसपछि बर्थाङकी लाभार्थी श्रीमती देवीमाया शर्मा तथा डेङ्गो नलेज सेन्टरका डा. टिकाप्रसाद शर्माको केन्द्रमा पुगेर बाँस खेती, उत्पादन, तालिम तथा भविष्यका योजनाहरूबारे विस्तृत छलफल गरियो।
यसै क्रममा टोलीले सम्भक १३ माइलस्थित श्रीमती राधादेवी शर्माको निवासमा रहेको बाँस केन्द्रको समेत स्थलगत भ्रमण गर्यो। साथै श्री बिरहाङ लिम्बूद्वारा सञ्चालन गरिएको बाँस प्रशिक्षण केन्द्र तथा बाँसबाट निर्मित अचार र अन्य मूल्य अभिवृद्धि (Value Added) उत्पादनहरूको अवलोकन गरिएको थियो।
कार्यक्रमलाई सम्बोधन गर्दै उद्यान विभागका सचिव श्री टी. टी. भोटियाले राष्ट्रिय बाँस मिसनअन्तर्गत उपलब्ध योजनाहरूको अधिकतम सदुपयोग गर्न लाभार्थीहरूलाई आग्रह गर्नुभयो। उहाँले बाँसमा आधारित उद्यमशीलता, मूल्य अभिवृद्धि, सीप विकास तथा दिगो जीविकोपार्जनलाई प्रवर्द्धन गर्न सरकार निरन्तर प्रतिबद्ध रहेको बताउँदै आगामी दिनमा पनि विभागबाट आवश्यक सहयोग उपलब्ध गराइने विश्वास व्यक्त गर्नुभयो।
