15/08/2026
୮୦ ତମ ସ୍ୱାଧୀନତା ଦିବସ ଅବସରରେ ହୁଙ୍କାର ଓଡ଼ିଆଙ୍କର ଓ ମହିଳା କଲ୍ୟାଣ ସମିତିର ମିଳିତ ଆନୁକୂଲ୍ୟରେ ଏକ ସ୍ୱତନ୍ତ୍ର ସାମାଜିକ କାର୍ଯ୍ୟକ୍ରମ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି।
ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଲେଖିକା ଶ୍ରୀମତୀ ବେବିଲତା ଶତପଥୀ ଯୋଗଦେଇ ନିଜର ମୂଲ୍ୟବାନ ବାର୍ତ୍ତା ପ୍ରଦାନ କରିଥିଲେ। ସେ ତାଙ୍କ ବକ୍ତବ୍ୟରେ ଶିକ୍ଷା, ସ୍ୱାସ୍ଥ୍ୟ ଓ ନାରୀମାନଙ୍କ ସାମୂହିକ ବିକାଶ ଉପରେ ବିଶେଷ ଗୁରୁତ୍ୱ ଦେଇଥିଲେ। ଏକ ସୁସ୍ଥ, ଶିକ୍ଷିତ, ସମୃଦ୍ଧ ଓ ସଶକ୍ତ ସମାଜ ଗଠନ ପାଇଁ ନାରୀମାନଙ୍କୁ ସମାଜର ମୁଖ୍ୟସ୍ରୋତକୁ ଆଣିବା ସହିତ ସମସ୍ତଙ୍କ ସାମୂହିକ ପ୍ରୟାସ ଆବଶ୍ୟକ ବୋଲି ସେ ମତ ପ୍ରକାଶ କରିଥିଲେ।
ଏହି ଅବସରରେ ୧୫ ଜଣ ଦୃଷ୍ଟିହୀନ ମହିଳା ଓ ପୁରୁଷ ଭାଇ-ଭଉଣୀଙ୍କୁ ମୁଖ୍ୟ ଅତିଥିଙ୍କ ଦ୍ୱାରା ବସ୍ତ୍ର ପ୍ରଦାନ କରାଯାଇଥିଲା। ଏହି ମାନବିକ ପଦକ୍ଷେପ ମାଧ୍ୟମରେ ସମାଜର ଅବହେଳିତ ଓ ଆବଶ୍ୟକତାବୋଧ କରୁଥିବା ବର୍ଗଙ୍କ ପ୍ରତି ସହଯୋଗ ଓ ସମ୍ମାନର ବାର୍ତ୍ତା ଦିଆଯାଇଥିଲା।
କାର୍ଯ୍ୟକ୍ରମରେ ଦୃଷ୍ଟିହୀନ ଭାଇ ସୁବାସ ବେହେରା ଦେଶାତ୍ମବୋଧକ ଗୀତ ପରିବେଷଣ କରିଥିଲେ। ଏଥିସହ ଅନୁଷ୍ଠାନ ପକ୍ଷରୁ ଭଉଣୀ ସ୍ୱଦାମିନୀ ମିଶ୍ର ଓ ଭାଇ ସଞ୍ଜୟ କୁମାର ରାଉତ ଦେଶାତ୍ମବୋଧକ ସଙ୍ଗୀତ ପରିବେଷଣ କରି ଉପସ୍ଥିତ ସମସ୍ତଙ୍କ ମନରେ ଦେଶପ୍ରେମର ଭାବନା ଜାଗ୍ରତ କରିଥିଲେ।
ଏହି କାର୍ଯ୍ୟକ୍ରମରେ ହୁଙ୍କାର ଓଡ଼ିଆଙ୍କର ଅଧ୍ୟକ୍ଷ ଶ୍ରୀ ଶିଶିର କୁମାର ମହାନ୍ତି, ଶ୍ରୀ ଦେବାଶିଷ ନାୟକଙ୍କ ସମେତ ଅନୁଷ୍ଠାନର ବହୁ ସଦସ୍ୟ ଉପସ୍ଥିତ ଥିଲେ। ସେହିପରି ମହିଳା କଲ୍ୟାଣ ସମିତିର ଅଧ୍ୟକ୍ଷା ଶ୍ରୀମତୀ ପଦ୍ମିନୀ ପରିଡ଼ା, ପଦ୍ମପ୍ରୀୟା ବେହେରା, ଯୌତ୍ରୀମୟୀ ରାଉତ, ଦୀପାଞ୍ଜଳି ଦାସ, ସୁଚିତ୍ରା ରାଉତରାଏ, ଶୁଭଶ୍ରୀ, ବନିତା, ଜୟଶ୍ରୀ, ପ୍ରୀତିମାଙ୍କ ସମେତ ସମସ୍ତ ସଦସ୍ୟା ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ।
ସମଗ୍ର କାର୍ଯ୍ୟକ୍ରମରେ ଦେଶପ୍ରେମ, ସାମାଜିକ ସେବା, ନାରୀ ସଶକ୍ତିକରଣ ଓ ମାନବିକତାର ଏକ ସୁନ୍ଦର ସମନ୍ୱୟ ପରିଲକ୍ଷିତ ହୋଇଥିଲା। ଶିକ୍ଷା, ସ୍ୱାସ୍ଥ୍ୟ, ନାରୀଙ୍କ ସାମୂହିକ ବିକାଶ ଏବଂ ସମାଜର ଦୁର୍ବଳ ବର୍ଗଙ୍କ ସହାୟତା ମାଧ୍ୟମରେ ଏକ ସୁସ୍ଥ ଓ ସଶକ୍ତ ସମାଜ ଗଠନ କରିବାର ସଂକଳ୍ପ ସହ କାର୍ଯ୍ୟକ୍ରମଟି ସମାପ୍ତ ହୋଇଥିଲା।
