20/11/2025
【中山寧徽園開幕前 村民拉橫額控官商勾結】
中山文旅呢兩日宣布總投資達15億人民幣嘅中山小欖寧徽園將於今年11月28日開園迎客。開業前夕，有被租用土地嘅永寧社區村民嚟到園區内拉起橫額，控訴「官商勾結、土地賤賣賤租」，矛頭指向「駱某華」。
2024年12月10日寧徽園文教旅綜合體項目喺中山小欖簽約，選址小欖永寧社區，規劃用地約480畝。据中山文旅及小欖政府介紹，該項目以本土 「欖商」欖菊集團為核心，聯同深圳華創文、北京浮古、中山崇德教育等多間企業共同投資營運。項目橫跨學校、博物館、徽派建築、蘇州園林，甚至航天科普等多個領域，計劃吸引由深中通道同大灣區一體化帶嚟嘅旅客。原定今年年頭動工，9月底就局部開業，但一直推遲到11月底。留意到官方宣傳開業嘅文章，係用效果圖做配圖，見唔到實際園區景象。11月17日有街坊入去一探究竟，畫面見到園内好多地方仲整緊，到處係泥地。仲有個幾禮拜，唔知到時有幾成開放？
項目核心欖菊集團董事長駱建華表示，項目源於幾個「欖商」想為家鄉打造優質學校。寧徽園項目一開始係深圳華創文發起，但幾個「欖商」提出一定要喺小欖搞，然後各級政府好支持噉令項目快速落實。
離開業仲有十幾日，一班永寧社區嘅村民嚟到寧徽園景區内拉橫額維權，錄影片段見有園區工人駐足圍觀，有保安馬路對面監視。其中一名維權女士身上圍著印有「剝奪農村土地承包經營權，歸還集體組織成員身份」控訴嘅紅布，路邊兩條白色橫額寫著「打倒官商勾結駱某華，打倒貪官腐敗賤賣賤租，強搶強佔土地！還我永寧炎黃子孫生存土地！」暫時未清楚村民同項目方之間土地糾紛詳情。
見到「駱某華」，小編諗住查下會唔會有其他似名嘅人，點知留意到2023年8月小欖聘用駱建華長兄、中山書法家協會主席駱培華為永寧社區嘅「文化村長」。雖然寧徽園都係文化項目，橫額中矛頭指向嘅「駱某華」估計係指項目核心欖菊集團董事長駱建華？應該唔會順便指埋駐扎當地要「以文化興村」嘅駱培華啩？
後續：20日夜晚，永寧社區黨群服務中心喺微信公眾號發出《致廣大居民群眾的一封信》解釋租金等問題。
資料來源：
中山文旅
中山市小欖鎮人民政府政務網
南都中山
中山網
欖菊集團網站
微信視頻號 Li航拍
#中山 #欖菊 #寧徽園 #宁徽园 #維權 #土地問題
