01/08/2025
「MaskPark」事件背後究竟係咪關東莞公司事？
近日Telegram上一個有過十萬名組員、名為 「MaskPark 樹洞論壇」嘅群組（後文簡稱為「群組」）被揭露，分享大量在公共場所利用針孔相機對女性嘅偷拍、或非知情下拍攝女性朋友、家人等嘅私密影片，被網民稱為中國版「N 號房」事件。話題曾一度登上微博熱搜卻好快遭屏蔽。群組內不止有偷拍影片，仲有專門嘅偷拍教學。
有唔少受害者經朋友提醒，喺群組見到自己被偷拍或私密照片被分享，更有用AI合成嘅不雅影片。群組被曝光之後，該群組管理員喺群組內「警告」一啲譴責該群組嘅女性，直接公開放出其中一部份人嘅身份資訊並要脅話可能會搵到佢哋嘅私密影片。
有網友查出，曾有一間東莞公司推出同名社交軟件「面具公園 Mask Park」，經查證該公司法人為麥梓豪，同時亦係「蘇格Sugar」社交軟件嘅創始人。兩個社交產品被網友指都曾因涉及傳播色情內容被下架，所以懷疑麥梓豪及公司其他管理層同背後偷拍黑色產業鏈相關。有網民搵到佢以前網上發表嘅言論，包括「成功男人背後都有一個女人，但多數女人都是成功的絆腳石」。有名稱為「Maskpark潮牌店」用戶喺群組表示「你（麥梓豪）的無辜我們也看不去了」，同時已經查清所有喺小紅書提到麥梓豪同Maskpark嘅博主個人資訊隨時可以提供作提告證據。
7月27日，麥梓豪喺微博發表聲明澄清自己及公司都與群組並冇關聯，指群組係冒用同樣名字，已報警處理。本人微博現時已清空，但仍有網友傳播係可以搵到麥梓豪2011年創辦嘅送餐平台微博「B仔外賣」仲未關閉。目前尚無直接證據顯示兩間公司仲有其負責人與被爆出嘅群組有聯繫。但有唔少網民認為收集嘅證據充分合理，已經通過官方渠道舉報東莞面具網絡科技公司，但相關部門至此並無回應。
民民評論：過咗十年，點解今年突然東莞又變返「性都」？不過今次「性都」同之前好唔同：年初喺英國留學嘅變態強姦犯、而家年中又爆出疑似同東莞公司相關嘅大型偷拍平台，唔通年末仲有更大件事？東莞政府前排話要刺激夜經濟，而家連咁多人舉報間公司都冇出一個官方通報，唔通係刺激緊呢啲黑色經濟？人哋間公司同事件有關或者無關，都要需要查清畀大家一個結果。
有關，就嚴格處理。無關，就澄清畀返人哋清白。
