24/02/2025
Shkatërrimi Ekonomik i Preshevës nga Koalicioni APN-LR dhe Hipokrizia e tyre në opozitë
Nga M.I.
Presheva dikur ishte një vend me potencial për zhvillim ekonomik, me mundësi për investime dhe një rini të gatshme për të ndërtuar të ardhmen këtu.
Por çfarë ndodhi në tetë vite qeverisje të koalicionit APN-LR? Shkatërrim, stagnim dhe dështim total! Për dy mandate rresht, ata menaxhuan këtë komunë si një pronë private, duke e zhytur në papunësi, mungesë investimesh dhe largimin masiv të të rinjve.
Sot, këta të njëjtët që shkatërruan Preshevën, kanë paturpësinë të dalin si opozitë dhe të kundërshtojnë çdo iniciativë që mund të ndihmojë qytetin tonë të rimëkëmbet.
Kur ishin në pushtet, nuk u kujtuan për interesat e qytetarëve, ndërsa tani, për çdo vendim pozitiv, bëjnë zhurmë dhe kundërshtojnë pa asnjë argument të arsyeshëm.
Gjatë dy mandateve të tyre, ata nuk arritën të sjellin asnjë investim serioz në komunë.
Projektet infrastrukturore mbetën vetëm premtime në fushata, ndërsa bizneset u përballën me vështirësi të shumta, pa mbështetje institucionale.
Papunësia u rrit ndjeshëm, duke bërë që të rinjtë të shohin emigrimin si të vetmen zgjidhje.
Sot, pas gjithë këtij shkatërrimi, koalicioni që na la në këtë gjendje të mjerueshme del e luan rolin e “opozitës konstruktive”, ndërkohë që realiteti është krejt ndryshe: ata kundërshtojnë çdo projekt zhvillimor vetëm sepse nuk janë më në pushtet.
Është për turp të shohësh njerëz që dikur kishin në dorë fatin e qytetit dhe e lanë në gjendje të mjerueshme, të dalin sot dhe të flasin për përgjegjësi e transparencë.
Ne, qytetarët e Preshevës, nuk duhet të kemi kujtesë të shkurtër.
Nuk mund të harrojmë se kush e solli këtë situatë dhe kush tani po përpiqet ta pengojë daljen nga kriza.
Është koha për të mbështetur ata që vërtet duan të punojnë për zhvillimin e Preshevës dhe për të mos lejuar që ata që e shkatërruan të bëhen pengesë edhe për përmirësimin e saj.
