02/03/2022
ICUC a nombra Prof. Gilbert Cijntje Rector Magnificus
Inter-Continental University of the Caribbean (ICUC) yegando kasi 30 aña di eksperensia vasto den programanan di edukashon riba nivel di Bachelor, Master’s i Doctorate. E éksito di ICUC ta e introdukshon di programanan na nivel profeshonal den aliansa ku universidatnan Merikano i Oropeo. Asina ICUC a bira e promé i úniko instituto di edukashon di Kòrsou ku ta ofresé programanan akreditá:
• Bachelor den Business Administration (BBA) full I part-time
o General Management
o Public Communication and Marketing
o Human Resources and Labor Marketing
o International Business and Management
o Hospitality and Tourism Management
• Master den Business Administration (MBA) part-time
o General Management
Durante un agasaho ‘sorpresa’ pa e rector nobo, ku a tuma lugá resientemente den e patio di e universidat den sentro di siudat, a duna Prof. Cijntje e honor máksimo aki. Esaki a tuma lugá den presensia di e direktiva di e universidat, famia i amigunan mas yega di Prof. Cijntje.
E ròl di un rector magnificus ta sumamente importante, konsiderando ku ta e rector ta karga e vishon i duna guia na tur di e universidat. ICUC a keda fundá pa Curaçao Institute for Social & Economic Studies (CURISES) na 1994 i na 2009 gobièrnu di Kòrsou a rekonose ICUC, ku entretantu a logra e akreditashon di Accreditation Council for Business Schools and Programs (ACBSP).
E vishon di ICUC ta pa sigui krea un komunidat di lidernan ku konosementu akadémiko, maneho i abilidatnan sosial. E mishon di ICUC ta pa organisá aktividatnan di edukashon i investigashon pa sostené e proseso di desaroyo integral di Korsou. For di 2021 ICUC a prepará pa nombra un rector magnificus, pero Covid-19 a pone ku esaki tambe mester a keda posponé, sinembargo awor ku mundu i Kòrsou a habri bèk pa siña biba ku e pandemia di Corona esei a krea e oportunidat di nobo pa ICUC sigui riba e trayekto pa nombra nan rector magnificus.
Algun orado a hiba palabra durante di e agasaho menshoná. Na promé lugá Prof. Paul Jansen a deskribí Cijntje komo tio grandi, sabio, hopi embolbi ku su komunidat. Eks premier di Antia na vários okashon Maria Liberia-Peters a hasi e komparashon ku dr. Frumencio da Costa Gomez, Doktor, manera hopi a yam’e komo lider di Partido Nashonal. Meskos ku Doktor a yega Kòrsou na 1935 i a kuminsá ku esfuersonan pa eduká e masa den su pueblo, meskos ta e kaso ku e hòmber chikitu prof. Gilbert Cijntje ku a funda i ta sigui pone hopi esfuerso pa logra hasi nos hendenan tambe sabio. ‘Si tin un hende ta tene e legado di Doktor na bida anto esei ta Gilbert Cijntje. Meskos ku Doktor Cijntje ta buska lidernan natural i e ta konvensé komunidat ku hende pretu tambe tin sesu.”
Sidney ‘Bicho’ Justiana MBA su énfasis ta ku un universidat no ta kaminda di tira pará. Un universidat ta un kashi di konosementu. ICUC ta kue e materia i tradusí esaki na un manera semper, pero bou di niun sirkunstansia no ta baha e nivel. Na opinion di Justiana, den e pais aki no mester elimina nada, pero keda pone e kosnan den konteksto. Prof. Philip Wagner na un forma chistoso, igualitu na Gilbert CIjntje, a splika ku prof. Cijntje ta un ‘show master’. E atenshon pa e generashon nobo ta importante teniendo kuenta ku e generashon nobo ta un ‘portafolio’. Importante den e totalidat ta inklushon i despues diversidat.
Prof. Dr. Gilbert Cijntje a yama danki pa e honor. Na su forma humorístiko manera semper el a indiká ku ‘na momentu ku nombra un hende rector magnificus ta pasobra e sobránan tin e deseo pa e bai kas pa kaba i stòp di pulushá. Pero mi tei pa ratu mas”. E palabranan aki a kousa hilaridat atrobe serka tur presente.
ICUC rumbo pa 30 aña di ekselensia ku atenshon speshal pa e yu di Kòrsou progresá.
