21/06/2025
Biyetenan di Banko di NAf 100 falsu den sirkulashon
Públiko ta urgi pa stòp di aseptá biyetenan di NAf 100
WILLEMSTAD/PHILIPSBURG- Centrale Bank van Curaçao en Sint Maarten (CBCS) ta atvertí públiko tokante un oumento signifikante di biyetenan falsu di NAf 100 ku ta sirkulá aktualmente na Kòrsou.
Komo medida di prekoushon, CBCS ta konsehá públiko pa stòp di aseptá biyetenan di NAf 100 pa pagonan mesora i pa e restu di e periodo di ko-sirkulashon (te ku 1 di yüli 2025) pa evitá e plamamentu mas aleu di biyetenan falsu.
E biyetenan falsu ta birando mas i mas difísil pa distinguí for di esnan genuino. Den e kaso aki, biyetenan di Naf 100 ta wòrdu presentá ku randnan kòrtá. Esnan ku ta ofresé nan ta pretendé ku nan a wòrdu daña pa kandela. Sinembargo, ora a inspektá mas di aserka, a resultá ku e anotashonnan aki ta
no ta kuadra.
E sirkulashon di biyetenan falsu na kantidat grandi ta un fenómeno konosí durante transishonnan di moneda. CBCS a komuniká e riesgo aki na públiko na vários okashon den e último lunanan. Falsifikadónan ta usa e periodo di ko-sirkulashon pa deskargá nan stòk di moneda falsifiká. Mirando e oumento fuerte aktual di kasonan asina, CBCS ta konsiderá nesesario pa emití e konseho aki.
CBCS ta urgi kualke hende ku ta den poseshon di biyetenan di 100 florin pa laga nan wòrdu saminá pa outentisidat mas pronto posibel. Esaki por wòrdu hasí na ofisina di CBCS na Scharloo, di djaluna pa djabièrnè di 8:00 a.m. pa 12:00 p.m., basta presentá identifikashon bálido.
CBCS ta trahando estrechamente ku outoridatnan polisial i hudisial pa rastreá e fuente di e biyetenan falsifiká i pa prevení mas distribushon. Como un recordatorio, tene cuenta cu ta estrictamente prohibi pa cualkier persona of institucion acepta of pasa biyetenan falso. Si bo ta kere ku bo por ta den poseshon di un biyete falsu, ta konsehá encarecidamente pa bo tuma kontakto ku polis mesora.
Falsifiká òf usa plaka falsifiká konsientemente ta
kastigabel ku un máksimo di nuebe aña di prizòn.
Willemstad, 20 di yüni 2025
CENTRALE BANK VAN CURAÇAO EN SINT MAARTEN
