21/10/2025
Skolnan ta keda será djamars 21 di oktòber komo medida di prekoushon relashoná ku situashon di wer
Publiká riba 20 Òktober 2025
Willemstad, 20 di oktòber 2025 – Promé Minister Gilmar Pisas, na nòmber di Ministerio di Enseñansa, Siensia, Kultura i Deporte, ta informá ku a tuma e desishon pa sera tur skol na Kòrsou djamars, 21 di oktòber 2025, komo medida di prekoushon relashoná ku e situashon di wer. Despues di konsulta entre Servisio Meteorológiko di Kòrsou (Meteo), e Tim di Kordinashon di Krísis (Rampenbureau), i Minister-Presidènt Gilmar Pisas, i tambe a base di informashon di e National Hurricane Center, a keda determiná ku Kòrsou por ta den e zona di alerta di un sistema meteorológiko ku ta spera pa trese hopi awa i bientu fuerte den e próksimo oranan i dia.
Apesar ku e situashon ta den desaroyo, e desishon a keda tumá pa sera tur skol na Kòrsou djamars, 21 di oktòber 2025, pa motibu di siguridat di alumnonan, mayornan i personal di skol. E medida aki ta tumá komo un paso di prekoupashon, pa evitá situashon insigur den tráfiko òf riba kaminda.
Ta pidi Direktivanan di Skol pa tuma e paso nesesario pa informá su personal, alumnonan i mayornan tokante e desishon aki.
Gobièrnu ta sigui monitoriá e situashon di tempu di aserka, huntu ku Meteo i e Tim di Kordinashon di Krísis. Informashon adishonal tokante otro medidanan òf re-inisio di e aktividatnan eskolar lo keda kompartí via e kanalnan ofisial. Segun pronóstiko ta spera ku skol lo kontinuá pa djárason, 22 di òktober próksimo .
Un yamada ta bai na pueblo pa kuida, evitá salimentu no nesesario riba kaya, i pa sigui medionan di komunikashon di Meteo i Gobièrnu di Kòrsou.
