27/04/2025
Gudoomiyaha Xisbiga Kaah Maxamuud Xaashi oo cambaareeyay fal ka dhacay degmada Ceel-afwayn waxaanu diray fariintan;
"Waxaan cambaaraynayaa falka nabadgelyodarrida ah ee lagu dhaawacay Maxamed Dhoolayare, xilli loo fadhiyey magaalada Ceel-afweyn gunnaanadkii nabaddaynta beelaha walaalaha ah ee dhiig-talaalkoodu socday muddada dheer.
Ugu horreyn, Xukuumadda waxa ku waajib ah in cidda falkaa geysatay ay gacan bir ah ku soo qabato. Maxamed Dhoolayare, oo ah dhaawac, waxa aan ku booqday cisbitaalka lafaha ee Dr. Ismaaciil oo aan xaaladdiisa ugu kuurgalay.
Dhab ahaan, waxa aan si weyn ugu mahadcelinayaa dhakhaatiirtii iyo kaaliyeyaashii ka hawlgalayey dhakhtarkaas oo si dedaal iyo daacadnimo leh ugu addeegay Maxamed iyo dhamaan dadweynaha kale ba si guud. Waxa aan si gaar ah u bogaadinayaa Dr Ismaaciil oo askumay cisbitaalkan, oo runtii koobsaday aqoon, adeeg fiican iyo agab casri ah, intaba.
Maxamed waxa iiga muuqday niyad wanaagsan iyo dareen bogsasho oo u baahan baanasho iyo baxnaano joogto ah.
Ugu dambeyntii, dardaaran waa inta la nool yahay e, waxa aan bulshada reer Ceel afweyn ku boorinayaa adkaynta nabadda, iyo in ay dhinac uga soo wada jeestaan cid kasta oo u horseedaysa dhagar iyo dhiig daata mar danbe.
Reer Ceel-afweyn ammintan lagama eegayo amaamud iyo ololos colaaddeed, balse waxa laga eegayaa isku duubni, iskaashi, is-cafis, iyo in ay xalay-dhalay ka noqdaan wixii dhacay. Reer Ceel-afweyn waxa la gudboon in aanay isku habsaamin, balse ay ku habsaamaan sidii ay ugula tartami lahaayeen qayrkood horumarka iyo halganka qadhaadh ee nolosha."
