16/07/2025
Kosova nuk ka luksin të presë pafund një opozitë që nuk di të bëhet opozitë
Në natyrë, kur mbretëresha i mungon një kosherjeje, bletët hyjnë në krizë. Ato humbasin orientimin, ndjekin impulset e çrregullta, përplasen mes vete dhe në fund e gjithë struktura organizative shpërbëhet. Nuk është mungesa e fuqisë që i rrënon, por mungesa e udhëheqjes se boshtit rreth të cilit ngrihet rendi dhe qëndrueshmëria.
I njëjti mekanizëm mund të vërehet edhe në jetën politike veçanërisht në atë që sot quhet opozitë në Kosovë. Kur një trup politik nuk ka një lider të pranuar, të qartë në vizion dhe të aftë për të mobilizuar, atëherë shfaqet një gjendje e ngjashme me një kosherë të zbrazët me konfuzion, përplasje egojesh, iniciativa të shpërndara dhe, në fund, humbje totale e besimit publik.
Opozita pa lider nuk është opozitë është një zhurmë e pakoordinuar zërash që flasin njëkohësisht, por nuk dëgjohen nga askush. Në vend që të krijojnë alternativën, ata përçojnë mjegull. Në vend që të ofrojnë shpresë, zhbëjnë besimin. Në vend që të sfidojnë pushtetin, përfundojnë duke sfiduar njëri-tjetrin, ndërkohë që pushteti i vetëkënaqur dhe pa kundërshtar serioz i vëzhgon i qetë.
Në një sistem demokratik, udhëheqja nuk është luks por është domosdoshmëri. Pa të, edhe idealet më të pastra mbesin të pashprehura, edhe zemërimi qytetar tretet në heshtje, edhe thirrja për ndryshim kthehet në jehonë të zbrazët. Kjo është, në thelb, tragjedia e opozitës së sotme në Kosovë: mungesa e figurës që bashkon, mungesa e udhëzimit që kanalizon revoltën në veprim, mungesa e lidershipit që e shndërron kritikën në projekt dhe pakënaqësinë në alternativë.
Dikur këtë e tha Albin Kurti, sot e sheh i gjithë populli së opozita në Kosovë ka vdekur. Jo sepse mungojnë partitë, por sepse mungon fryma jo sepse mungon kritika, por sepse mungon kuptimi i misionit të saj. Gjykata Kushtetuese nuk e sjell opozitën në pushtet e sjellin idetë, angazhimi dhe veprimi politik i përgjegjshëm qoftë dhe protestat në rrugë. Nëse opozita nuk reagon, nuk del në terren, nuk artikulon një narrativë të fuqishme përballë pushtetit, atëherë ajo është thjesht një zbrazëti parlamentare.
E vërteta është e thjeshtë së i vdekuri nuk mund të ndryshojë gjendje. Dhe Kosova nuk ka më luksin të presë pafund një opozitë që nuk di të bëhet opozitë.
Astrit Gashi
