موروثنا

26/12/2025

رواية عيشتو ..طبعة ثانية في مكتبة المغيلي قرب جامع اڨوجيل ادرار..

26/12/2025

ريحة لبلاد...🇩🇿🇩🇿

25/12/2025

شي واحد مع الصباح ...

24/12/2025

من واحات تيميمون الزينة...

23/12/2025

10- لڨصابي وبن طلحة وغابة مولاي علي

ومازالنا في تسابيت وجينا لڨصر لڨصابي و بن طلحة و غابة مولاي علي وتما جهد الرحابي ، وخيرت بهم كاملين اياك هوما اخوتي و احبابي 😍😍😍😍

ڨاوك في ڨصر لڨصابي تما الدخلة للدار ضيف ولا مول الدار لازم تفرح الثركة الي يڨولو ليها ليشير بالحلاوة ، ودخلنا عليكم بالخير والخمير يا ثرايك لڨصابي من لكبير للصغير ، وڨاع يعطيكم تالمير ، وزيارتهم مع الهبلة مكان فيها لا زهو ولا ماكلة من غير الفاتحة عند سيدي بوزيان و تما يطلبو التيسير ، ويڨولو كسيكسو و لا تبلبال ما يسمعو غرايب الخبر كي يتزربع بحاير 🤣🤣 ...

لڨصابي يالاخوان جات السمية من كثرة الڨصبات عنهم ،و المشهورة تماك ڨصبة السي محمد بن مولاي سالم بن علي مازال على ديدانها بجامعها تنسم وڨصبة السي محمد بلحوسين باسوارها تنغم ، ناس الڨصابي اشحال مالحين و ضريفين و شحال كاثرة فيهم كلمة ياحبيبة مولانا وكلمة الله يحفظك ياودي وعندهم خير النعم ....

لڨصابي زينين وفيهم جهد المحبة وعندهم خيار الائمة والطلبة ، كانو يسڨو من فڨارة بوصلاح وماتت الفڨارة بلا سبة 😭😭😭😭، والفاتحة نتاع مولاي علي بن بوبكر تبدا من لقصابي و تمشي للهبلة تكمل عند مول القبة ....
_____

وجينا لبن طالحة و يا لالة مريم يالخالدية شايلاه يا مولاة السر المتمم ، عندهم زيارة لالة مريم وتما الحبايب وامالين لڨصر تلتم ، فيها الطبل والحضرة بالطارة تبغم ، وجهد المديح على سيدنا رسول الله ينسم ، وتما لازم الڨبضة الا بالكناوي الي عمرك ما سمعتهم في حياتك، وغير حشاها البكم 🤣🤣

فيها ساڨية لالة مريم ولڨصبة مابقات ومشات من الزمان في السڨم ، واشحال يفرحو بالضيف وعليه الخير يتلم ، وخيري بيهم كاملين امالين الشمل والسر في الخاتم ، يبغو الشكير والكلام الي يصڨل الخاطر للودن ينعم ...

____

وفي غابة مولاي علي وتما المبات عند شرفتنا اولاد النبي ، اياك هي كانت الا خلا وكي سكنها مولاي يوسف بيه بخديمو سماوها غابة مولاي علي على ولدو مولاي علي ومكان الاه نحكو ونجبدو السر المخبي ✌️✌️✌️ ، لغابة بعيدة على الهبلة وناسها شرفاء يبغو الضيف ويفرحو بيه فرحة الصبي ، امالين الشان وعندهم البرهان الشافي وخيري بيهم كاملين ويعطيهم ربي ڨد نيتهم اياك هو العاطي ✌️✌️✌️✌️✌️

---------

ومطراسين لام العوينات لڨصر سبع وتما الخير ينكب علينا من النبع اياك هوما وخيرت بيهم بكلمتهم وما فيهم الي يتبع.

22/12/2025

شوي من داك الشي....

21/12/2025

9 _ قصر الهبلة:

و مازلنا في تسابيت ونزلنا ضياف في( ڨصر الهبلة ) يا حضار ، خيار الناس والشرفا تما فهار ويا ويلو بالقضا الي يغلط معهم ما يركوه بالحجار من غير دعوة زينة يولي في خطر ، هوما ناس الاخيار ، من نجمة بلهادي للنهار القهار، و ما يبغو الناس الفجار، ويبغو الضيافين ويدخلوهم بالكرم للديار ....

ياناس، الهبلة راها قبلة ومنها تفرع الخير في توات بالدالة ، زمان كانو يحلو للخصوم المسالة ، والدار مفتوحة للي عندو والي ماعندو نعالة ، وما يبغو متقلب الحالة من غير ياكل ويشرب ويلبسوه خيار الحوالى ويسرحوه اهل النية للطريڨ المعلومة قبالة ...

ڨصر الهبلة اسسو سيدي مولاي علي بن بوبكر ، ومنو كل شيء تفجر ، فيها ڨصبة وڨصبات تحضر ، أولاد سيدي بلغيث المنصور وڨصبة سيد الهامل ولڨصابي وبن طلحة وڨصبة مولاي علي بن بوبكر الي في زيارتو غارتو تحضر ، و يامولاي علي بن بوبكر لوح الساروت فأفكر وفي تضراي ينڨال من المنصور لغابة مولاي علي مول النية يحضر 😍😍

الهبلة ناسها لي جابو الله يحطوه للضيف و مايصبرو على الزرود وعلى كرشهم يلتڨط السيف 🤣🤣🤣، يبغو اللحم و يبغو الديسير و يبغو الطياب الزين وعلى كل شي يسخفو ويجييهم الخريف 🤣🤣🤣🤣

يقولو شورتها و عطرها و اسمو و سيري تلفي لهيه و كي يفرحو بيك يڨولو ليك يعطيك تلمير ،و سير نسيفطك باش نعطيك و نكافيك بالخير ، وعندهم واحد عيش الشعير تاكل منو مغرفات بالبنة فمك يحير و غير يجعل ليهم التسيير ويعطيهم ربي ڨد نيتهم خير وخمير ، ويڨولو لكل حاجة ڨولها و ديلها و جيب لها و سيفطها و يموت على حرف الهاء وما فيهم كلام الرول والتدهشير، الي كان ينڨال ليك ومكان غير فرش الحصير تدي الي كتب ليك الله من التيسير 🤣🤣

كل قبيلة بقصبتها و كل قصبة بجامعها، و رجالتهم اشحال معمرين بالغرايب ومكان غير يا داخلها ويا خارجها ، فالصيف عشاهم ياكلوه الا على برا والي جا فايت يضيفوه بخير اماليها ، خدامين و متعاونين و البرانية فيسع تولي معزوزة و محبوبة عندهم و كل وحدة تفتخر بلي فلانة البرانية صاحبتها و غير خيري بكلها 🤣🤣🤣🤣🤣، و محططين و زينيين و فيهم القرايين ، و يخرجو لجنانات بخواليط و يبغو يشدوها بشي وحدة معلوقة حتى يخرجو ليها عقلها 🤣🤣🤣

وڨلوبهم صافين حليب وخاطيهم العيب الا علاه يجرو بيك الحصيرة بالضحكة في الغيب 🤣🤣🤣 مو قلة صواب ولا دق الناب من غير يضحكو ويتونسو بالحباب ، و العروس البرانية النهار الأول بالكلام تتبلع عليها لباب ، وايلا صبرت عليهم بعد سبع ايام تولي خيرة الاصحاب ، والي بغاتو يخرج ليها لكان من تحت صڨيع الارض والتراب 🤣🤣

عندهم واحد الزيارة خيار الزيارات ، فيها ربع ايام خيورات ، النهار الاول يسموه الميز ، والثاني الطحين، والثالث بطبلو زاهر والرابع ببارودو يعمر ، وكل شي ميسر والضيف مرخوف مزنطر ياكل من الطوعمة والكسرة حتى يتخنطر 🤣🤣🤣

وعند سيدي بولغيت فالقصبة تخرج ليه لفزوع نهار الزيارة ، ونلحقو الولي سيدي مولاي علي بن بوبكر تندار زيارتو في ماي وتما الغارة ، عندهم العقلاء والمجاديب امالين السر الرباني وايلا غددتهم رحت فيها غبرة ، ناس كرما ونيتهم واصلة طاهرة ، بلاد المجاهدين وساهمو في الثورة ، وتما مكان الا بالكنوة تحضر ، و لسان فمك بالڨبضة ينحصر باش ينعرف لمن لڨط الطارة 🤣🤣🤣🤣 واشحال زينين وفكاهيين ايلا دارو عليك الدارة بالضحكة تولي تحبى وتتفهر وتولي كي رڨصة صارة 🤣🤣🤣🤣

عندهم شي من الفڨاڨير والڨلب عامر خير ،منهم فڨارة قصر الهبلة و موسى بن امحمد و البلغيتية وتاقجمت وقرتمة و بوتيني والمنصور ، و الهبلة هيا الضاوية في خط تسابيت
يا داخله سلم و تما لمبيت وغارة سيادنا وشرفتنا تحضر...

فات ڨال فيها مولاي عبد الله ولد مولاي العربي عوبيدي
" هاد القول لعبد الله ، تقلو على المولى
ولد العربي من الهبلة، ر بي تشوف حالو "
وقال فيها سيدي حمو ولد مولاي عبد الله الهبلاوي
" حمو والهبلة بلادنا يحكم لبلا
والبو عبد الله الله يرحم مماتو. "

وخيري بيهم من الڨماطة للعكاز ويعطهم تالمين ، وما نبغي حد يدخل بينتهم ، اياك هوما امالين الخير ، وغير الله يكون لينا وليكم وليهم عوين، ڨولو امين ✌️✌️✌️✌️....

ومخرطين للڨصابي و بن طلحة وغابة مولاي علي ، و لام العوينات ڨصر سبع ، وتما نشربو من عند احبابنا من النبع ، ومكان غير الطاعة والسمع 🤣🤣🤣🤣

21/12/2025

19/12/2025

جمعة مباركة

18/12/2025

8 _ قصر المعيز

وجينا ل( ڨصر المعيز ) وتما الناس كي اللويز ، وڨال العياشي في رحلتو زمان كان يسموها المايز ، مافيهم زعاف ولا اكريز ، ناس خدامة وهمنبارة يكون لينا وليهم عوين وعندهم المال ويبغو الكنيز 🤣🤣🤣🤣

لمعيز ڨاوك جات على خاطر يعزو الضيف معزة وناسهم شانهم شان وعزهم عز، خطيهم الهز وما يڨولو احكز ، بلادهم بلاد التمرة عندهم تيلمسو ونخلة تاقربوش تنهز هز، عندهم سبع فڨاڨير السايبة وعبد الله بن يدو وڨرينج و اوراغ وعبو وڨرموغرام وبنيعلو بمائها توزوز وز 😍😍😍

عندهم واحد الخبز بنين والمردف تشبع منو كي تاكل ڨطعتين ، والكسرة مغوجرة سخونة تتكل في الحين ، واشحال يفرحو بالضيافين ، وديما شرهانين يفرحهم بحوض النبي ويحفظهم للقران المبين ...

في قصر المعيز كاين الڨصبة الڨديمة والڨصبة الجديدة ، عندهم النخوة والكلمة وامالين الرجلة ، عندهم الڨصر وڨصر المرابطين وڨصر يحي وباب الحمايد والرحبة ، وغير الله يدوم المحبة ، ومسلمين لسيدي بلحاج عومر مول القبة المشيدة ..

و في لهجتهم يڨولو أشي و ڨمط بمعنى احمل ولا ارفد، وحتى هوما عندهم عطرو وحيتي وايلا زعفو يڨولو رڨادت اياماك ويحفر ليك اجدر ، وكي يمشو للجنان يڨولو مهود . و عندهم علي وعلال ويوطاو على الدال ، و مكان الا سيدي وديدي يالاخوال 😍😍😍

_____

ومخرطين لاحبابنا وناسنا وشرفتنا في الهبلة وتما بالمدح دوك تتلف ليا القبلة ، على خاطر هوما كلامين بالصح الڨلب ابيض كي الدللة 🤣🤣🤣🤣🤣