ناس بكري

Page d'Accueil
Algérie
Algiers
ناس بكري

تراثنا عنوان أصالتنا لا يمكننا العودة إلى الماضي ولكن يمكننا تجديده بالحفاظ عليه
(1)

18/07/2025

#الجيلالي قالي راني تحت الصدمة 😔
قلتلو علاش؟
قال اليوم خلاصلنا اللحم تاع العيد.. 🥲
ـــــــــــــــ
😂😂😂

18/07/2025

حكاية ( #الوصية )
من حكاياتنا السابقة
بسم الله بديت وعلى النبي صليت وبحكاية من حكايات ناس بكري جيت ، " يا بني ما تاكل غير بالعسل، وما تهز فراشك من دار لدار، وما تضرب المرأة حتى تربطها" ... طبعا هذي وصية المرحوم صاحب قصتنا اليوم وندخلو في تفاصيل الحكاية باه نفهمو الوصية...
كان بكري راجل جاب في هذي الدنيا ولد واحد بصح خرجلو جايح والراي تالف وكثرة الدلال تخلي الذرية تسيب، وكيما قالوا ناس زمان "جوع قطك يصيد فارك " وقالوا " شبع كلبك يعرف يعسك"
المهم هذاك الراجل قايم بتجارتو ومالو، و بنو قاعد غير للدلال وأصحاب السوء، و"اللي يعاشر الأخيار يكسب وينال، ويعاونوه إذا حالو مال، واللي يعاشر الأنذال يخسر المكسب وراس المال"، والحديث قياس ....
كبر الشيخ وجا نهار فراقو والموت حق على كل من خلق وما الدايم غير ربي سبحانو، وقبل ما تغمض عينو جاب وليدو عندو ووصاه وصاية الفراق، (الله لا يفرقكم على العزاز), قالوا : يا بني "ما تاكل. غير بالعسل، وما تهز فراشك من دار لدار، وما تضرب المرا حتى تربطها" ... و بعد نهارات مات الراجل، والطفل صلى عليه ودفنو وقال نعمل بوصاية بابا ...
بدا الولد يطبق في وصاية باباه و وقت ما يجي ياكل ما ياكل غير والعسل الحر على طابلة ويشريه باه كان سومو، وكي تزوج من نهار دخل فراشو منع عليهم يخرجوه، لا خرجة لا تبدال ديار، والمرأة مسكينة تصبح بالعصا وتمسي بالعصا كل ليلة كل ما يجبد العصا يربطها ويمتن وتدي مكتوبها من الضرب.. ومطبق كلام باباه ووصاية الوالدين و اللي ما يفهم ويسمع لكلام الكبير يعيا ويطيح في البير، واللي ما رباوه أهلو تربيه الأيام والليالي ..
المهم شوي شوي وبدا المال يضيع وأصحاب السوء ما يخلو شي والمرا كرهت وولات لدار أهلها ، وهذا حال اللي ما يفهم بالتلميح لازم يفهم بالتجريح والدنيا ساعات تجرحك حتى تعلمك... المهم طاحت بيه عاد لا دار لا مرا لا جيب معمر ....
وفتتكم في الحديث، باباه موصيه وصية أخرى قالو إذا طاحت بيك راه عندي صاحبي في بر آخر روح ليه .. مالا هز القش اللي بقالو وراح ليه بلاد تعمر منو وأخرى تخلى، حتى سقسى ووصل ليه ورحب بيه وضيفو وكرمو، وحكالو كلش على ما صار....
قالوا يا بني الحاجة الأولى أنت راك ما فهمت وصاية بوك، والثانية رفقة سوء ما خلات لك .. باباك كي قالك ما تاكل إلا بالعسل معناها ما تاكل حتى تجوع مليح باه تحط النعمة في فمك تتسحلاها وتولي بنتها حلوة كي العسل .. وما تهز فراشك من دار لدار معناها ما تخرج سرك من فلان لفلان وكل سر فات الإثنين شاع .. والثالثة متضربش مرتك حتى تربطها معناها حتى تشدها بالذرية، والذرية تحنن قلبها وتردها للبيت وهذي هي الوصاية ...
وحكايتنا ڨضات وعندكم جات وقلوب حبابي زهات وبالعبرة ضوات ونتلاقاو مع حكاية أخرى إن شاء الله ..

16/07/2025

اللهُم إنّا نسألُك جبراً للقلوب ، وتيسيراً للأمور ، وبُعداً عن كل خذلان ، وحمايةً مِن كل أذى ، و تدبيراً مِنك لكل أمورنا.♥️

14/07/2025

قالو ناس بكري ...
كل غلطة تورّيك ساسك من راسك
وكل طيحة تقوّيك وتعرف بيها ناسك

14/07/2025

نفسي عزيزة وما نرخس روحي _ لوكان في الدنيا نعيش بروحي
___.__.___

13/07/2025

قالوا ناس بكري ...
ولد السبــع ما يجي #مشحاح و الدفلة ما تجيب #التفــاح
شعر كـلاب ما يجي منو #برنوس و متصاحبش #لمنحوس
كبير العرش #طيعـو وكبير الراس والكرش بالرخس #بيعو
عرة الفـــــاكية #البرقوق وعرة النســاء لي طيب #وتذوق
و إذا كنـــــــــت #شيـــــــــن أستـــــــر #فضـــــــــــايحـک
و إذا كــــــنت #زيـــــن أستـــــر روحــــــك مــــن #العيـن
و الخيمة الكبيرة بابها #محلول و دنيا كـامل فانية #تزول.

13/07/2025

ﻧﺎﺱ ﺗﻌﻮﻡ ﻭ ﻧﺎﺱ ﻏﺎﺭﻗﺔ في اﻟﻬﻤﻮﻡ، ناس تحسب في الملايين، وناس تحسب في النجوم، ناس ترقد في النهار، وناس من الفجاري تقوم ...
ناس تعذر، وناس تلوم، ناس قلوبها فل، وناس كلامها مسموم، ناس تبيع في كرامتها، وناس تبيع في المشموم
ناس شاقية في دوارها، وناس هربت لبلاد الروم ...
ﻧﺎﺱ ﺗﻌﻮﻡ ﻭ ﻧﺎﺱ ﻏﺎﺭﻗﺔ في اﻟﻬﻤﻮﻡ .. 💔💔. ﻫﺎﺩﻱ ﻫﻲ ﺍﻟﺪﻧﻴﺎ❤️‍🩹

09/07/2025

قالوا ناس بكري ...
اللي نساك نساه لوکان جا فيه الخير راه تفكر لمليح اللي عملتو معاه، و اللي يحوس عليك يعرف المرسم وین راه...

09/07/2025

قالوا ناس بكري ...
لي ما يسال عليك ما تسال عليه ما تكثر عليه ملامة، إذا جا مرحبا بيه و إذا راح بالسلامة 🤌👋

22/05/2025

قالو جدودنا
ياولـيدي التعلام يجي بالقرايا والقلم✏️ يبغي الدوايا
والصياد يبغي السعايا🌻 والمشطة تبغي المرايا
والعمامة تطبعها العبايا 💐 والخير يبغي النوايا
والسر يبغي الوصايا 🌷 والعهد يبغي الوفايا

22/05/2025

خالِطوا الناس مخالطةً إن مُتّم معها بكوا عليكم
وإن عِشتم حنّوا إليكم ... 👌❤️

12/05/2025

قالوا ناس بكري ...
الميت ما يقوم والصاحب ما يدوم
وقليل الأصل ما عليه لوم
حط في بالك حتى حاجه ما دوم ...
كيما مشات الضحكة ... تمشي الهموم .

Adresse

ساحة أول ماي
Algiers

Site Web

http://www.Algeria.com/

Notifications

Soyez le premier à savoir et laissez-nous vous envoyer un courriel lorsque ناس بكري publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.