21/04/2024
I kečč a Muhend Azwaw d tezyiwin-ik. Adlis-a, ad ak-d-yefk yiwen n wudem n tmusni, ad ak-d-yeqqim d tigejdit, ad ak-d-yettales ayen gan d wayen nnan yimezwura-inek. Mi ara t-walin medden ammar ad ilin wid ara d-ak-yinin :
– Tigi d tiḥkayin n zik-nni, d timucuha n teryel i yess ssedhuyen arrac, i wacu ara d aɣ-nefɛent tmucuha n zik, i nekni s at tura ? Eǧǧ timucuha n zik i yat zik ; nekni d arraw n wass-a, ass-a irgazen ulin s aggur, rsen deg-s, ass-a isufag ssemliliyen tamurt ɣer tmurt, ass-a deg yiwet n takurt tezmer ad tzebbel tamdint tameqrant deg usmenɣer n tiṭ.
– Tamusni tekka nnig n teswiɛin. Ur ttilit ara ay imedhac d arrac yessedhac uclawa, yesmenyafen arelluc aberreqmuc i yitij ireqqen neɣ i uwraɣ yuli uɣebbar.
Ini-asen :
– Awraɣ yif arelluc, ulac akk taqrint gar-asen : awraɣ kkes-as aɣebbar ad yirriq, arelluc cwit ma icellef-it d aclaf ad yeddegdeg d ticeqfatin tizraraqin.
Ini-asen :
– Awer tedru yid-wen ay at tura am useklu iwumi gezmen yiẓuran : di tazwara, zegzaw yifer-is, di teswiɛt sellaw, ider. Ttejra mebla iẓuran leqrar-is d tamettant. Awer tilim ay at tura d isekla war yiẓuran.
Ini-asen :
-Tamacahut d ajlal n tmusni, kkes ajlal iwakken ad d-tedher temsirt yellan ddaw-as, acku…
Acku tamusni, ɣas tettabaɛ lewqat, ur teqqin ara ɣer-sen s umrar ur gezzmen lemqes. Si tallit ɣer tayeḍ tettbeddil tussna, tamusni ur tettbeddil ara. Si tallit ɣer tayeḍ i yettbeddilen di tmusni d ssifa n sufella, mačči d ixf n daxel.
Maca, taɣawsa tis-snat, ay Azwaw, tamusni mačči d lwert kan, mačči d agni iwumi d-zzin leswar. Awan n tmusni d antag, d tikli ɣer zdat. Ma tgid-as algam, tenɣid-tt.
Ay Azwaw, ur as-tegg ara algam i tmusni. Anida ara tt-yessiwed lǧehd n ufud-is, tawid-tt, ma s aggur, eǧǧ tamusni ad tali s aggur, ma s itran egg-as abrid s itran, ma awan-is d asemhelleq i ddunit d wayen yellan, anef i tmusni ad tessemhilleq i ddunit.
Taɣawsa tis krad, tamusni ay Azwaw, d asafu. D asafu n tafat : eǧǧ asafu ad ifu, yessuzef tillas.
Tamusni d asafu n wurɣu : eǧǧ asafu ad isserɣ ayen yerkan, d wayen yeblan, d wayen ur nesɛi iẓuran. Egg-as asaber ɣef wayen yelhan, ɣef wayen yelhan deg yiberdan d amsebrid mačči d amentran.
Tamusni d asafu : wa yettak-it i wa, iwakken ad d-yezg dayem yeɛla, urǧin yettendella neɣ yulwa neɣ yeqqim am uɣerrus di tesga.
Hedreɣ yemmut umɣar aneggaru i d-yettawin abrid n tmusni : Newwi tafekka-s ɣer uéekka ideg ara yentel. Mi nerra akal fell-as, nuɣal-d, nettmesmuqal am win iserɛen la d-yettaki. Yendel usafu gar-aneɣ iseg d-nettagem tafat.
Assen, ay Azwaw, i k-id-mmektiɣ, i as-nniɣ : Ay imɛazzan n yiwwas, ɣurwat ad tuɣalem d inehyaf n kullas si tmusni d tmuɣli taɣezfant, d tulya n wul d leɛqel. Mmektiɣ-k-id, mmektiɣ-d akk tisutwin ara d-yemlen. Amusnaw aneggaru nemdel-it, daɣ nemdel yid-s tamusni ? Ulac tijmuyaɛ d yigrawen ideg ara thefdem tamusni akken i tt-hefden yimezwura nwen. Tura, tamusni tuɣal s idlisen. Degmi i uriɣ adlis-a i kečč, ay Azwaw, d tezyiwin-ik ad ak-d-teqqim d tagejdit i usenned, d tagejdit i lebni.
Mulud At Mɛemmer.
Poèmes kabyles anciens,
Maspero,1980 .
