17/05/2026
حنا رايحين نلعبو ضد بير بوحوش و السعيد حموش مدايرلهم حصة تطبيقية تاع مباراة جوفنتيس ضد أتلتيكو مدريد علاه تحلموا بزاف يا الشيخ علاه ؟
لعبت ضد الفوبور ما قدرتش تلم معلومات عليه كيفاه يلعب في سطادو و ماتولهتش بلي قوة تاعو يسجل في الأشواط الثانية و سجل فيها 3 كاملة ضد الصاعد و 2 هدفين ضد عين فكرون و بالأخطاء تاعك و القراءة الغالطة زادو سجلوا علينا 2 هدفين خلاف ، علاه رايح لجوفنتيس و أتلتيكو .
زيد لوخر أنت عندك وسط ميدان تاع البارصا كل ماتش دخل ثلاثة و تخلي ثلاثة يرتحو ؟ كيفاه في ماتش بير بوحوش صانع الألعاب دقيقة ما يشارك فيها أسبوع وراها ضد شبيبة سكيكدة دخلوا أساسي ؟ أنت كنت درب و لا كنت تربي و تبربر فيهم ؟ .
18 دقيقة يسجلوا علينا زوج ؟ الأخطاء الفردية كيفاه جات ماجاتش وحدها ، جات بالدخلة الغالطة تاعك و بالتحضير الغالط تاعك و بالقراءة الغالطة تاعك ، الغلطة تاع طواهري في ماتش الفوبور رحت عاودتها مع سكيكدة في الشوط الأول كيفاه مالا حاب دير بيه كثافة هجومية في 15 دقيقة الأولى يخي قبل ما يبدا الماتش هم عندهم أفضلية تاع هدفان ما كنتش علابالك بلي باينة خلاه رايح يكونو طايحين شوية اللوراء و أنت حاب دير كثافة هجومية بلاعبين القوة تعهم ديما تكون في الجانب الدفاعي ؟
خاسر بهدفين ، تروح تزيد تخرج مهاجم بمهاجم و وسط ميدان بوسط ميدان ، يا راجل راك كنت خاسر ب 4 واش كنت حاب دير ، و مباعد وسط ميدان بوسط ميدان و مباعد مهاجم بمهاجم ، هادو راهو ماتش قسم ثالث فقط ضد مدرب يخاف أكثر منك واش داك لجوفنتيس ضد أتلتيكو ؟ 18 دقيقة يسجلوا علينا 2 صاحبك بوكواسة و مافهم فيها والو .
