27/03/2026
بزاف من المترشحين راهم نادمين أو في محل شك من اختيارهم للطور المناسب في مسابقة الأساتذة، وذلك راجع للكم الهائل من المترشحين في كل طور، (يعني كل واحد يقول فوتوا معيا بزاااف)، والبعض الآخر، هاز آلة حاسبة ويحسب النقاط 😪
كما أن بعض زملائي الأساتذة والأصدقاء راسلوني وسألوني علاش ما شاركتش فالطور المتوسط اللي راك متعاقد فيه واكتسبت خبرة فيه …
باختصار، كل واحد حر فقراراته، وكل واحد مكتوبلو واش حب ربي
صدقوني… الأمور لا تمشي هكذا وليست بيد العبد،
كل شيء مقدر ومكتوب عند ربي سبحانه ☝️
- إذا ربي كتبلك تخدم في المتوسط… راح تخدم .
- وإذا كتبلك الثانوي… راح توصل للثانوية.
- وإذا كتبلك الابتدائي… راح تروح للإبتدائي وهذا كله خير حتى لو ما فهمناش الحكمة في البداية
بالنسبة لي شاركت فالمتوسط لغة إنجليزية، في
مسابقة كتابية 2016، وراكم عارفين كيف كانت تحاك الأمور
بعدها لم يتم اجراء مسابقة أخرى إلى أن جاء إدماج 2022
من بعدها جاء قرار إدراج اللغة الإنجليزية في الابتدائي و قررت نشارك قلت عندي فرصة مادام عشر سنوات أقدمية، فتفاجئت بمناصب تعد على الأصابع، وأصحاب شهادات في 1990 يعني سنة ميلادي.. ديبلوم كبير عليا 🤣
المهم قلنا فيها خير، المهم كانت شفافية والله مابقا
خاطري كيما اللي قبلها.
الدفعة الثانية، ثاني كيف كيف مناصب منعدمة،
الدفعة الثالثة قلت نلحق 😁 لكن حبست عندي فالابتدائي 😑 وربحت فالمتوسط (حتى واحد ماعلابله بلي شاركت فالمتوسط) ، لكن للأسف، صرالي حادث في كرة القدم، ودرت عملية على يدي بعد أسبوع فقط من النتائج
السنة هاذي شاركت فالابتدائي، بنسبة ٪100
وقلت منسجلش فالمتوسط تعاقد، في آخر يوم قلت علاش مانزيدش متوسط وثانوي ههه
والآااان مع المفاجأة الكبرى
ربحت ابتدائي، لكن غلطولي فبلدية الإقامة(خطأ من الموقع) وربحت فالمتوسط الأول، وربحت في الثانوي الأول 🤣
بقيت بين اثنين متوسط ثانوي، وضغط رهيب، صليت صلاة الاستخارة وقررت نخدم متوسط، والحمد لله متوسطة ما شاء اللّه، مدير ما شاء الله، وزملاء وإدارة وخلية لغة انجليزية اللهم بارك والله تقول 20 عام وأنا نخدم معاهم، مفتش الله يعطيه الصحة، وتلاميذي يحبوني ويحترموني رغم أنهم مشاغبون 🤣 راك شايف المراهقة، حتى هما يحسن عونهم مرة مرة يهبلو.. يعني باختصار ما عندي حتى مشكل..
المشكل الوحيد في المتوسط، تحس أنك ماتقدرش تمد حتى 80٪ من امكانياتك ولن تتطور نظرا للظروف المحيطة بالفئة التي تدرسها. وأنا مالناس اللي كي نخدم خدمة نبغيها تكون كاااملة مكمولة، وراكم تعرفوني.
لذلك قررت فالمسابقة نسجل فالطور الابتدائي عن قناعة بعيدا عن المشقة والمدارس والملحقات وغيرها، المهم نخدم وضميري مرتاح، وتعبي مايروحش باطل.
عزيزي، التعليم والله ما ساهل، وليس مهنة من لا مهنة له، ماشي تجيه على جال العطل، هذا راه تعليم وجيل يليه جيل وكلهم تحت مسؤوليتك. ماراكش غادي تحكم مكتب وتمضي بعض الأوراق.
راح تتعامل مع 40 تلميذ أو طفل أو مراهق في حجرة ضيقة، كل واحد وظروفه، من هو يتيم، من هو فقير، من لديه ظروف عائلية، من له مشاكل صحية، لازم هاذو كامل تعرفهم.. ولازم تعدل بين الجميع،
ولازم تعامل التلاميذ كأنهم أولادك. لذلك أهم حاجة فالتعليم هي الصبر والإخلاص والضمير.
راح تلقى روحك تربي قبل ماتعلم.
أما بالنسبة للدراهم، الدراهم يجيو يجيو والرزق اللي مكتوب يجيك أينما كنت.
نسأل الله أن يوفقنا لما يحبه ويرضاه ❤️
ولن يصيبنا إلا ما كتب الله لنا ❤️
