27/04/2025
2007/2008 يامات الشتا و البرد ، بعدما خرجت من المسيد على ربعة تاع لعشية ، تروح لدار تلقا يماك موجدتلك قهوة حليب مع لمسمن ، تستقهوة تشبع موراه تطلع فوق دالة دور البرابول لـ satellite Thor و خوك يطل من تاقة هاو جاااا هااو راااح بلعقل بلعقل خلييييه خليييييه راه سينيال 75% ، و نت من الفرحة تهبط تجري ، تهبط تمونطي فيها ديكودور تاعك لي فلاشيتو ب 20 الف ، تضرب طلة تلقى السينيال تاعو واصل 800 ، هنا طير بالفرحة بيسك عارف بلي راح تتفرج الماتش بلاما يتقطع ، بعدها تروح تقرا جريدة الهداف الدولي لي جابها باباك لعشية كي رجع من الخدمة ، كي تقرب 18:30 تروح تشعل Tv و تخبط فيها الجزيرة الرياضية +1 باش تتفرج ماتش دوري الابطال بين ليون و ريال مع خاوتك لي راح ترقدو قاع في شومبرا وحدة ، دار دافية و تسمع غير المعلق و صوت الشتا برا ، تلحق 18:45 تبدا الغنية تاع دوري الابطال لي تزيد النص فالماتش ، يبدا الماتش تتفرج حتى يخلاص الميطو الاول تعيطكم يماك " راه وجد العشا لي حب يتعشا يجي و لي ماحبش ولله مانزيد نعيطلو " تروح تلقها دارتلكم المحاجب بقرعة قازوز كودري ، تضرب 2 حبات محاجب مع كاس قازوز و ترجع تجري لفراشك باش تكمل الشوط الثاني ، تكمل تتفرج الماتش كي يخلص تتغالب شوية مع خاوتك على الماتش حتى تلحق العشر تاع الليل طفى التيليفيزوو و تعطيها برقدة حتى لصباح 💔
