Couture Bŷ DaL

16/09/2026

#رسائلكم
راجلي في 1999 دخل للحـ.ـبس بقالو شهر ويخـ.ـرج حبيت انعرف اذا مزالني حلا.ل عليه انا من هذاك الوقت مشفتوش و عندي معاه ولد

16/09/2026

#رسائلكم
سلام عليكم ورحمة الله وبركاته ختي انا عشت في طفولة مسعفة وحاب نحكي حكايتي اذا ممكن حابها تكون عبرة لناس وفي الأخير، حابة نقول لكل واحد راه يعيش وجع يشبه وجعي، لكل طفل حاس روحو وحدو، ولكل إنسان نام وهو مكسور وقام وهو يحاول يبتسم: ما تفقدش الأمل.
نعرف بلي كاين أيام تحس فيها الدنيا قاسية، وتحس بلي ما كاش حتى واحد فاهم واش راه صاري في قلبك… بصح صدقني، ربي كان يشوف دموعك حتى كي ما شافهم حتى واحد، وكان يسمع دعواتك حتى كي ما سمعك حتى إنسان.
أنا ما كانش عندي حضن نرجع له، ولا يد تمسحلي دموعي، بصح كان عندي ربي… وكل مرة كنت نظن بلي خلاص، كنت نلقى فيه القوة باش نكمل.
اليوم، كي نرجع بذاكرتي لكل واش عشت، ما نحبش نشوف روحي كضحية… نحب نشوف روحي كإنسان ربي علّمو الصبر، وقواه بالوجع، وعلّمو بلي بعد كل عسر كاين يسر.
لهذا، إذا كنت اليوم تعاني، ما تستعجلش نهاية قصتك. يمكن الصفحة اللي راك تعيشها اليوم مؤلمة، بصح ماشي معناها أن القصة كاملة راح تكون حزينة.
خلي قلبك متعلق بربي، وخلي في قلبك مكان صغير للأمل… حتى لو كان الأمل مجرد دعوة تقولها قبل ما ترقد.
ويومًا ما، راح تلتفت للوراء وتقول:
«الحمد لله أني صبرت… الحمد لله أني ما استسلمتش.»
ربي يعوض كل قلب موجوع، ويدفي كل قلب حاس بالوحدة، ويفتح لكل إنسان بابًا من حيث لا يحتسب.
وإذا ما لقيتش اليوم يدًا تمسك يدك، خلي يدك ممدودة للسماء… ربي ما يردش قلبًا لجأ إليه. ❤️
والحمد لله على كل شيء… فقد تكون قصتك بدأت بالألم، لكن بإذن الله نهايتها ستكون طمأنينة وفرحًا وعوضًا جميلًا

15/09/2026

14/09/2026

#رسائلكم
توفات عجوزتي عندها 5ايام وجا لعندي شيخي وانا كنت ناكل في العنب حتى قالي روحي تخطبيلي ويا خياتي من الخلعة سرطت حبة مامضغتهاش قريب خرجت عمري انا نلقف وهو يقولي شكونها بنت فلان واخت فلان ووليدي يعيط حسبتلو مت وهو مزال يهدر ويفسر كي رجعت النفس قالي وقيلا حصلتلك عنبة هزيت راسي قاتلو ايه قالي خلي نكمل شكون مواليها

14/09/2026

#رسائلكم
راجلي قالي نروح عند خويا نجيب واحد الاوراق نسحقهم، ايا انا قلت في راسي هادي هي الفرصة نروح نطيح على مرت خوه هي جابدة روحها و زعمة تجي غير فالمناسبات و تجي لابسة و معدلة جامي شفناها ماشي مكوافية شعرها ولا ماشي لابسة لبسة متحوفة، ايا كي يقعدو يحكو عليها شحال كلاس انا نقول في قلبي باينة بلي كي تجي جايا عند دار شيخها تعدل و تسقم بصح فالصح تكون كيما حنا نورمال شعرها مشنشف و لاهية بالقضيان و بولدها، ايا قتله نجي معاك بصح متقولش راني جاية معاك، رحنا حل علينا خوه الباب و مبعد كي شافني مع راجلي عيط لمرته، و ياااااا كون غير معيطلهاش، لابسة غوب الله الله و طالقة شعرها و حمرة من خدودها و لابسة صابو، و لابسة سيغتات كانت بزااااف كيوت، دخلت انا وياها للكوزينة حطت جي و مكسرات و جات قاعدة داخلة معاهم فالحديث تاع الخدمة مثقفة و انا قاعدة نبل ريقي لي نشف بشوفتها بهاداك جي، ما فاهمة والو واش راهم يحكو و ولدي يخرب فالصوالح و نجري موراه هي كانت رقدت ولدها من السبعة تاع عشية ياو ندمت لي جيت معاه كون راه قاع ما شافهاش، ملي خرجنا و هو يعطيني فالملاحظات، عودي رقدي ولدك بكري، اتهلاي في روحك، بدلي لبستك تحسب راني مع صاحبي ماشي مرتي 😭😭😭 وياااا واش دااااني

13/09/2026

#رسائلكم
#بنتي في عمرها 22 سنة كملت ليسانس متحبش تخدملي الشغل تنوضلي على 10 تخمل صالون و شمبرتي و تكنس لرض و تمسح الغبرة و تمسح لرض عندي f3 و لعشيا تغسل مواعن الفطور و القهوة مع بعض و منين داك دير القاطو للقهوة و منين داك طيب لعشا عندي زوج خاوتها فدار كبار و هي و انا راني عمري 58 كفاه نديرلها تولي تخدم كلش

10/09/2026

أثناء استقبال والد الطفل الجزائري الفقيد "أيوب" من طرف ولاية البيض والإعلان عن التكفل ببناء منزل مجهز بالكامل له، وإهدائه وزوجته رحلتي عمرة، روى أحد أقارب الطفل قصة مؤثرة أمام الحاضرين، إذ ذكر أن أيوب كان يمتلك بطة صغيرة ويرعاها بانتظام حتى كبرت

وبعد وفــ اة أيوب ، بدأت البطة تبحث عنه في كل مكان حول المنزل، إلى أن اتجهت مباشرة نحو البئر التي سقط فيها وتــ وفي، وظلت تتفقد المكان وكأن إحساسًا غريزيًا هداها إلى أن صاحبها الصغير قد فارق الحياة داخل تلك البئر 💔🤲

09/09/2026

#رسائلكم
سلام لبنات ..انا تزوجت براجل مطلق وعندو بنت كي خطبني قالي بلي بنتو قاعدة مع يماها وبلي تبقا عندها دايما . تزوجنا كانت علاقتنا عادي جبت زوج دراري ..وراجلي كان مرة على مرة يجيب بنتو فالويكاند تجي الصباح تروح لعشيا جامي تبات ..وزوجي كان مرة يعطيها النفقة مرة لا ..خاطر الشهرية على قد الحال واصلا ام الطفلة تخدم وهي اللي تصرف على بنتها وحتى خوال الطفلة بخير عليهم..
العام في بداية العام هادا ماتت طليقة راجلي ..ماتت فجأة قالو سكتة قلبية من هاداك النهار راجلي تقلب ..من لي ماتت وهو يبكي عليها حزن عليها تقول يماه اللي ماتت وعاد رايح جاي عند بنتو اللي قعدت عند خوالها ..صباح وعشيا وبالليل يبات فاتح الكاميرا ويحكي معاها ..خطرا على ال1 تاع الليل عيطت جدات الطفلة وقالتلو راهي بالحمة راح يجري كي المهبول ..مع انه ماعندوش طاكسي وخوال الطفلة عايشين معاها عندهم الطاكسيات يعني لوكان داوها للطبيب علاه حتى يعيطولو انا حسيتهم يديرو فيها زكارة فيا ...وكي نجي نهدر مع راجلي يقولي مادخليش روحك في بنتي
بعد يامات قالي نجيب بنتي تعيش معانا انا قلتلو محال نقبلها في داري.هو قالي هادي داري وانا حر فيها وانت اللي يخرج عليك ديريه .
اصلا الدار فيها بيت ليا وبيت لاولادي والصالون..خرج ولادي من البيت وقالهم انتوما ترقدو فالصالون .والبيت لختكم لكبيرة هي طفلة لازم البيت وحدها ..وراح صبغ البيت بنفسجي كي قلتلو على بالك انا نكره اللون هادا قالي بنتي تحبو ..وراح شرا شوبرا جديدة بالسرير لخزانة الطابلة كلش جديد ..وانا اولادي قداه وانا نقولو بدلهم لمطارح وهو يقولي ماعنديش..
وزاد جاب خال الطفلة ونعتلو البيت ونسمع فيه يقولو لازم تتهلى فيها الطفلة طول عمرها متفوقة ..وراجلي يقولو ماتكسرش راسك كل يوم كي نرجع من الخدمة انا نقريها ..مع انه اولادي عمرو لا قراهم ولا شاف حتى في كتاباتهم ..
انا درك حاسا روحي رايحة نهبل ..حاسا بلي ضرتي سرقتلي حياتي وهي ميتة ..حطتلي بنتها اللي هي تشبهلها تقول هي وحاسا بلي راجلي يشوف في مرتو اللولة في بنتو ..ودرك راهو جابد عليا خلاص ..حتى عينو مايحطهاش في عيني..
سقسيت كاش مانلقى حل قانوني باش نمنع الطفلة تعيش في داري مالقيتش

08/09/2026

#رسائلكم
معليش خياتي سبوني عايروني عادي عندي بنتي لكبيرة نكرها الله غالب من ربي نكرها ماعييت نحنن في قلبي عليها يشهد الله عليا اني حاولت نحنن قلبي حاولت نحبها الله غالب سبحان الله غالب القلب لحمة دوكا منقدرش نحكيلكم وش دارت فيا من نهار ل ولدتها ليومنا هدا منيش حابة نبررلكم لكن الله غالب منحملهاش ماعييت نحوس على حلول ماعييت نساعف فيها حاولت أمام ربي حاولت الله غالب دوكا نتمنى من ربي يجيبلها مكتوب شباب هدا وش نتمنالها صدقوني كون تتزوج بعيد ومنشوفهاش عشر سنين عاااااادي لعكس نفرح لاني منحملهاش الله غالب