ابي مدين شعيب

09/08/2025

اقطع الراس تيبس العروق
وقص السبول من رقابه
وبلا مال ماتقدر تدخل السوق
و بلا رجال ليلك مايبان عقابه
و عز الرجال يشيعك لفوق
وحارث الخير زرعه ينبت صابه
والشبعان ما ياكل حتى يذوق
والجيعان ياكله بيه بترابه
واللي مايبكي بعبرته مخنوق
واللي يطرق الباب يسمع من وراه جوابه

18/07/2025

هذا الوقت صعيب ماعادش يرحم
ويا ويح لي طاح ورشات حبالو
وتخلط فيها المحـــرم والمجرم
ولا واحد تلڨاه زاهي في حــالو
غير اللي تلڨاه مجـــروح معـدم
متحطم مسكين يشكي بعــلالو
كل النهار يفـــــــوت عنو يــتألم
ضاق عليه الحال ويامو طـــالو
من كثرة لمــحان زاد عليه الهم
تايه في لعلاب لا حــد يســــالو
لا من يعرف حــالتو بها عــــالم
من كثرة لضــرار لا ما يحـــلالو
ويخمم مهموم يتجــرع فالـسم
زاد عليه الهـــــم واكثر تخبالــو
هذ الدنيا ما خــرج منها سالــم
وكل واحد ينال فعلو واعمالـــو

16/07/2025

قالو :
ثلاثة مربوطات بثلاثة
الشهامة مربوطة بالرجال ..الرجال قعدو والشهامة طارت
الحياء مربوط بالنساء... النساء قعدت والحياء طار
المطر مربوطة بالبركة...المطر قعدت والبركة طارت
*-*
ثلاثة ماتاخذهم لوكان ماتوقف عليهم...وثلاثة ماترتاح لو كان ماتتفك منهم... وثلاثة كان وخرتهم غابت طعمتهم
الثلاثة الي ماتاخذهنم لوكان ماتوقف عليهم العسل واللبن والمرأة
والثلاثة الي ماترتاح تفك منهم السوسة والدين ورفيق السوء
والثلاثة الي كان وخرتهم غابت طعمتهم العزومة والتعزية وصلاة المغرب
*-*
ثلاثة يجيرك الله منهم ...وثلاثة راك اترافقهم ...وثلاثة راك تسمع منهم ... وثلاثة خوذ برايهم
الثلاثة اللي يجيرك الله منهم ...ولد الحرام وقطاع الارحام ووكال رزق الايتام
والثلاثة اللي راك ترافقهم ... الهبيل ورفيق السوء وقليل المروءة
والثلاثة اللي راك تسمعها ...الفتان والكذاب وشاهد الزور
والثلاثة لي تأخذ برايهم...صلاي الاوقات وطعّام العيش ورضي الوالدين

13/07/2025

ناس بكري قالوا : ⬇️
●ثلاثة يحمرو الوجه صلاة لفجار وزواج لبكار والوالدين لاكانو فالدار
●ثلاثة يصفرو الوجه الطعام المسوسوالزواج المنحوس والجيب بلا فلوس
●ثلاثة في الهنا - لي يتبع الفرض والسنة- ولي قنع واستغنى-ولي بلحلال كلى وبنا
●ثلاثة يردو الشايب شباب المرا الصالحة بنت الكرم والصواب ومعاونة لخوت ولصحاب وشكارة إذا كانت عامرا بلاحساب
●ثلاثة يجيبو وجيعة الراس
لمرا لي تجيبلك صداع مع ناس وكثرت الرايات بلاقياس والدين ( المديونية) ليا ماصبتلو خلاص
●ثلاثة يقلبو الذهب نحاس لي كان برزقو ورجع خماس ولي باع بلادو ورجع يدور في بلاد الناس ولي قرا حتى عيا ورجع للبالةولفاس....

12/07/2025

ناس بكري قالوا ... 👌
نبكي واحد كان ظني فيه خليل
نفخر بيه نڤول سعدي درت ونيس.
كي_جربتو فالسفر نلڤاه ثڤيل
كي_جربتو فالوعر نلڤاه رخيس.
كي_جربتو فالنڤار ظهر ذليل
كي_جربتو في جماعه موش جليس.
كي_جربتو فالكرم يابس وبخيل
كي_جربتو فالعقل فيه توسويس
كي_جربتو في اسراري واد يسيل
كي_جربتو في اخلاقو فات بليس
إيه يالصحبة الغدارة و ما دير ❤️♥️

17/11/2024

كلنا كالكتب...

28/10/2024

.......

فالجسم القلب سلطان و بالحق العقل وزيرو

اذا عاد القلب ضعيف و عيان الارادة ترجع لغيرو

و اذا عاد العقل ظريف و مزيان يتفاهمو كيفاش يديرو

انا سمعت من بكري و زمان على السلطان و وزيرو

على بعضهم يغيرو و غير بالعقل يسيرو

28/10/2024

27/10/2024

زمان هذا زمان العجايب
ما بقيت تعرف شكون الزين
وشكون الخايب.....
ربي يخرجنا من دار العيب بلا عيب يا
الحبايب..... ياك الزين في العقل... ولي
بغى اللحم راه في البقر... ولي بغى
الطول راه في الشجر...
كاين ناس صحبتهم عجب
وكاين ناس صحبتهم تعب
وكاين ناس صحبتهم جرب
وكاين ناس صحبتهم اغلى من ذهب

20/10/2024

قالوا زمان....

عيب النفس في كثر الخطايا ،
وعيب العين من قلة النوم ،
وعيب العقل في موت الخلايا ،
وعيب القلب دسان الهموم ،
وعيب الروح في خبث النوايا .
..........

الرجال يبانو فالشدة ،
و وجه البارود كان طلع مافيه ردة ،
و الرجلة مش فالزندة ،
والعظم عمرو ما يكون فالكبدة ،
والسفيه يبان بالهدرة ،
والدنيا فانية كيفها كيف الرقدة ،

03/10/2024

تخلطت المشلية صافي وكرفة
والحمير تعلف والخيل مطاولين بكتاف
الذيوبة ياكلو في لحم الخرفان خطفة
والسبوعة تكدد في لعظام وتخاف
والنسا اللي تخدم على كل صفة
ويح المساكين باردين لكتاف