02/10/2024
أي نعم ما اشتغلنا كتيير عشان نقدم نصائح ولّا نرشد زول، لكن قدر العشناه بنقدر نقول فيه بعض النصائح العملية.
- مهما حصل ليك ما تخلي زول يعرف دخلك الشهري كم حتى لو كان أقرب الأقربين ليك الحسد كتير في الدنيا دي.
-أعرف إنو عندك حياتين في إنسان واحد، فحاول عيش حياة الشغل وحياتك الشخصية بدون ما تفقد زول، ما تخلي الشغل يشيل منك ناسك و أصحابك.
-أي نعم القرش مهم والزول لازم يكون حكيم في قروشهُ، لكن ما تهمل نفسك على حساب زول، دلع نفسك ومتعها لإنو ما ح تعيش كتير يا صحبي..
-أفصل شريحة الشغل من شريحتك الشخصية، وأفصل مجتمع الشغل عن حياتك الشخصية برضو.
-عاوز تنجز حاجة وما واثق في روحك ما تتراجع، ورّط نفسك فيها، الورطة بتحل نفسها.
-حياتك المادية في التعامل مع الديون، يا تدي زول قروش لله في الله، يا ما تدي، عشان لو أديت دين لي زول ممكن تخسرهُ بسببهُ وخصوصًا لو كان قريب ليك.
-إياك وتدخل حياتك العاطفية مع العملية، إياك إياك، عشان زملاءك في الشغل لو عرفو مشكلة ولو ما عرفو مشكلة، فخليك واعي.
-أعمل أي حاجة بدون م تكون داير مقابل عليها، ولو مضغوط اعتذر، وحاجة ما تخصصك قول دا ما شغلي عديل واعتذر، بدل تشتغلها وتتسمبك وتاني تبقى ليك في رقبتك.
-خليك زول لطيف وصارم في نفس الوقت، عشان ما يكرهوك أو تفقد هيبتك، خلي ليك موقف مميز في وظيفتك.
-ما تهين نفسك عشان قرش في الشغل مهما كان، حسيت بي إهانة لوّح ليهم بالاستقالة في وشهم واتخارج.
-ما تشتغل مجان، ما تشتغل مجان، ما تشتغل مجان..
لإنو البتعود المِلح ما بكوس السكر، وخشمك إنتَ ببقى ملح ملح.
-أول يوم ليك في الشغل بحدد بقية أيامك وطريقة تعامل الناس معاك ح تكون كيف، فخليك حكيم عشان ما تبقى حَمَل المكتب الوديع.
-الاتفاق والوضوح في الشغل أهم من الشغل.
-التوفير قبل الصرف، ما بعد تصرف البقضيك حتى تفكر توفر، لا العكس لإنو آخر الشهر ح تكون فلست دا كما كنت مديون.
-التوفير خلي بالدولار، في فترة بسيطة بتنجز، لكن بالجنيه ما ح تلم حاجة.
-قروشك المحتاج ليها وعايزها لموضوع ما تخليها في بنكك، لإنو إعلان تسويق ناجح واحد ممكن يوديك وراء الشمس.
-الشغل الما بضيف ليك إتخارج منو، والشغل البأثر على حالتك النفسية اتخارج منه.
-بيئة الشغل أهم من الشغل نفسه، فخليك واعي عشان القِرش بمش وبجي بس نفسيتك لو فاتت مرات م بتجي.
-أي وظيف خلي نهايتها تكون فكرة مشروع في خطتك، لإنو الوظيفة عمرها ما خلت زول غني.
-آخر حاجة خلي عندك صدقة، أو جزء من المال أديه لمسكين كل شهر بنية الغناء والبركة، ربنا ح يبارك ليك في أموالك بطريقة ما ح تتوقعها.
من الصديق امين عبد الماجد
