29/10/2025
🚫كفاية نبكي على الفاشر ✋🏾
كلنا يا صديقي شايفين الوجع الحاصل في الفاشر،شايفين القهر والظلم، الحزن الساكن في العيون، والوجع الواقف في الحناجر💔
الناس الماتت والبتموت لسه،الناس الاضطرت تسيب بيوتها وتمشي،نزوح وتشريد وتعب، صدمة وتشتت، حيرة وضياع، وهن وضعف 💔
*لكن تعالوا نسأل نفسنا بصدق يا أصدقاء:*
حنقيف نتفرج؟ ولا نتحرك؟
هل البكاء برجع الغايبين؟
ولا القعاد بيأكل الجعانين؟
الدموع ما بتشبع جعان،ولا بتدفّي يتيم،ولا بتضمد جرح ✋🏾
قال تعالي: {إِنَّ اللَّهَ لا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ} – الرعد: 11
يا صديقي ربنا جل وعلا ما بغيّر حال الناس إلا بإقبالهم على الله بتوبتهم بتركهم للذنوب والمعاصي مابغير حال الناس إلا لمن هم يسعوا ويروا الله صدقهم وعزمهم،فالدين ما دعانا للبُكاء، دعانا للعمل والسعي.
وقال النبي ﷺ: "إن قامت الساعة وفي يد أحدكم فسيلة، فإن استطاع ألا تقوم حتى يغرسها فليغرسها."
حتى لو الدنيا قربت تنتهي ماتيأس، وأزرع الخير.
الإسلام دا دين حركة، دين سعي، دين عمل ما دين قعاد وبكاء💪🏾
وربنا بحب الزول القوي، الساعي، البسوي العليه،
ما البقيف عاجز ولا مكتوف الإيدين،كما قال النبي ﷺ:
"المؤمنُ القويُّ خيرٌ وأحبُّ إلى الله من المؤمنِ الضعيفِ، وفي كلٍّ خيرٌ، احرِصْ على ما ينفعُك، واستعن بالله ولا تعجزْ." – رواه مسلم .
ومن هنا يا صديقي يا جميل السريرة بدت الحكاية...بدل ما نقعد ننوح ونتفرج على وجع اهلنا، قررنا نقيف ونشتغل، نمد إيدينا ونساعد، نعمل العلينا بصدق.
من الفكرة دي، اتجمعت القلوب قبل الأيادي، واتأسست ( تنسيقية إغاثة الفاشر - تآخي ) وهي تنسيقية سودانية موحدة بتضم مجموعة من المبادرات والمنظمات الخيرية السودانية،شغالة يد بيد عشان نغيث أهلنا في الفاشر.
عشان تكون حجة علينا ولينا،وعشان كل زول في قلبه خير وماعارف يبدأ من وين، ما يسأل تاني:
*“أنا أقدر أقدم شنو؟ أنا كيف ممكن أساعد؟”*
الطريق اتفتح، والنية موجودة، والباقي عمل وهمّة.
*نشاطاتنا الحالية:*
حالياً بنقيم تكايا لإطعام النازحين في مدينة طويلة،المدينة اللمّت آلاف النازحين من الفاشر،وبنقدم مساعدات مختلفة من دواءومستلزمات نسائية .
أيادي الخير محتاجة ليك،تقدر تكون جزء من العطاء دا.
أرقام التبرعات مرفقة في الصورة أسفل المنشور،
أو أرسل دعمك عبر المبادرات الشريكة ضمن تنسيقية إغاثة الفاشر.
*وتذكر وعد ربنا يا صديقي يا جميل السريرة ❤️
{إِن تُقْرِضُوا اللَّهَ قَرْضًا حَسَنًا يُضَاعِفْهُ لَكُمْ وَيَغْفِرْ لَكُمْ} – التغابن: 17
وبس كدا والله ❤️
