02/01/2026
آج کی تحریر ایک تجربہ ہے۔
بارسلونا کی بھیڑ بھاڑ، تیز رفتار زندگی اور مسلسل شور سے نکل کر میں ایک پرسکون جگہ کی تلاش میں تھا۔
حالانکہ حقیقت یہ ہے کہ بارسلونا اب میرے دل میں گھر کی طرح بس چکا ہے۔ اسے چھوڑنے کا دل نہیں کرتا۔ اس کی گلیاں، اس کی روشنی، اور اس کی زندگی کا شور—سب کچھ اپنا سا لگنے لگا ہے۔
لیکن انسان کو کبھی کبھی سکون کے لیے ایک قدم پیچھے ہٹنا پڑتا ہے۔
آخرکار میں نے بارسلونا سے بالکل منسلک ایک نواحی علاقے کا انتخاب کیا۔ یہ جگہ شہر سے دور نہیں تھی، بلکہ ایک ہی زون میں آتی ہے۔
یوں محسوس ہوا جیسے میں شہر میں بھی ہوں اور شہر سے الگ بھی۔
آخر میں میں وہاں شفٹ ہو گیا۔
گھر نیا تھا، فضا نئی تھی، اور سارا سامان بھی بالکل نیا لایا گیا تھا۔
نیا گھر، نئی ترتیب، نئی سوچ—جیسے زندگی نے ایک نیا صفحہ کھول دیا ہو۔
گھر اچھا تھا، ماحول بھی بہتر تھا،
لیکن ایک چیز کی کمی تھی—اور وہ میں اپنے لیے سب سے زیادہ اہم سمجھتا ہوں۔
میں میز اور کرسی کو محض فرنیچر نہیں سمجھتا، بلکہ انہیں ایک دوست کی حیثیت دیتا ہوں۔
کبھی کبھی رات کے کسی خاموش لمحے میں، جب میں کرسی پر بیٹھتا ہوں اور سامنے میز ہوتی ہے، ہاتھ میں پینسل اور ساتھ میری ڈائری—تو سوچیں خود بخود گہرائی اختیار کر لیتی ہیں۔
وہ کام، وہ فیصلے، وہ خیالات جو دن کی چہل پہل یا مصروف زندگی میں ممکن نہیں ہو پاتے، انہی لمحوں میں مکمل ہو جاتے ہیں۔
اگرچہ گھر نیا تھا، مگر گھر کے معاملات میں وہ ایک مخصوص میز اور کرسی موجود نہیں تھی جو صرف میرے لیے ہو۔
تب میں نے فیصلہ کیا کہ اب وہ ورک پلیس بنانی ہے جس کی میں بہت عرصے سے کوشش کر رہا تھا۔
آخرکار میری اپنی ایک ورک پلیس بن گئی—
ایک میز،
ایک کرسی،
ایک لیپ ٹاپ،
ایک ڈائری،
اور ایک پینسل۔
سب کچھ ترتیب میں آ گیا…
لیکن ایک چیز پھر بھی نہیں تھی۔
وہ چیز لیمپ تھا۔
آج میں اسی لیمپ کے بارے میں اپنا تجربہ آپ لوگوں سے شیئر کرنا چاہتا ہوں۔
میں نے کمرہ مکمل طور پر سیٹ کیا۔
میز، کرسی، ڈائری—سب اپنی جگہ پر تھیں۔
ماحول پرسکون تھا، دل مطمئن تھا۔
میں بیٹھا اور اپنا کام شروع کیا۔
پھر میں نے مناسب سمجھا کہ مین لائٹ بند کر دی جائے اور صرف لیمپ روشن کیا جائے۔
جیسے ہی لیمپ آن ہوا، اس کی ہلکی پیلی روشنی نے مجھے وہ سکون دیا جو میں کبھی بھی فل لائٹ میں محسوس نہیں کر پایا تھا۔
یاد رہے کہ یورپ کے گھروں اور ہوٹلز میں اکثر ایک ہی کمرے میں دو دو طرح کے لمپ بھی میں دیکھے۔
میں ہمیشہ سوچتا تھا کہ آخر ایک الگ لیمپ کی کیا ضرورت ہے، جب عام لائٹ سے بھی کام ہو سکتا ہے۔
لیکن اس دن میرا تجربہ مختلف تھا۔
میں نے لیمپ کی روشنی میں لکھنا شروع کیا۔
میرا کام کرنے کا طریقہ تین چیزوں پر منحصر ہوتا ہے:
اوّل، وہ کام جو میں اس وقت کر رہا ہوتا ہوں۔
دوم، نئی چیزیں جنہیں میں تلاش کرنا چاہتا ہوں—میں سیکھتا ہوں، لوگوں کو دیکھتا ہوں، ان کے کام کو سمجھتا ہوں۔
سوم، مینجمنٹ اور اسٹریٹیجی سے متعلق سوچ۔
اسی دن میں نے تقریباً دس کلومیٹر پیدل سفر کیا تھا۔
کافی عرصے سے میں زیادہ نہیں چل پا رہا تھا، لیکن اس بار میں نے میٹرو یا کسی اور سواری کے بجائے پیدل چلنا بہتر سمجھا۔
یقیناً میں تھکا ہوا تھا۔
لیکن جیسے ہی میں کرسی پر بیٹھا—
کمرے کی مکمل روشنی بند تھی، چاروں طرف اندھیرا تھا۔
اندھیرے میں مجھے کچھ نظر نہیں آ رہا تھا،
مگر لیمپ کی روشنی میں میرے ساتھ بس وہی دائرہ تھا جہاں تک روشنی پہنچ رہی تھی۔
اس دائرے کے باہر کی دنیا میرے لیے موجود ہی نہیں تھی۔
میں اس لیمپ کی روشنی میں اس قدر محو ہو گیا کہ میری کتابیں، میری ڈائری، میری پینسل اور میں—سب ایک ہو گئے۔
میں لکھتا چلا گیا، کام کرتا چلا گیا،
یوں محسوس ہوا جیسے میں کسی اور ہی دنیا میں بند ہو گیا ہوں،
جہاں کوئی چیز مجھے ڈسٹرب نہیں کر سکتی تھی۔
شاید یہ سال کا پہلا دن تھا۔
اور مجھے یقین ہے کہ اسی ایک سیٹ اپ کی وجہ سے ان شاء اللہ آنے والے دنوں میں میں ایسے کام کر پاؤں گا جن سے لوگوں کو فائدہ پہنچے گا۔
اس تحریر کو لکھنے کا مقصد صرف یہ ہے کہ
کبھی کبھی ہماری زندگی میں موجود چند سادہ چیزیں—اگر درست طریقے سے استعمال کی جائیں—تو وہ ہمیں بہتر سے بہتر منصوبہ بندی کی طرف لے جاتی ہیں۔
مجھے لگتا ہے کہ کسی بھی کام کے لیے پلاننگ سب سے زیادہ ضروری ہے۔
آج میں اپنے ایک دوست کے پاس گیا، ہم نے بزنس اور اسٹریٹیجیز پر بات کی۔
یہ بات واضح ہوئی کہ سب کچھ ڈیزائن اور فارمیلٹیز نہیں ہوتیں—
اصل چیز آپ کی اسٹریٹیجی ہوتی ہے۔
اگر آپ کی اسٹریٹیجی مضبوط ہو، تو آپ کچھ بھی کر سکتے ہیں۔
اور اچھی اسٹریٹیجی بنانے کے لیے ایک پرسکون جگہ ضروری ہوتی ہے—
وہ جگہ میں نے بنا لی ہے۔
اس کا فائدہ یہ ہوا کہ اب دل چاہتا ہے کہ بستر سے اٹھوں اور سیدھا میز پر آ کر بیٹھ جاؤں،
کرسی سنبھالوں اور لکھنا شروع کر دوں۔
لیپ ٹاپ—جسے میں آج کے دور کا ایک بہترین دوست سمجھتا ہوں—
موبائل سے ہٹ کر ایک ایسی دنیا ہے جہاں انسان سیکھتا ہے، سوچتا ہے، اور خود کو بہتر بناتا ہے۔
میں لکھتا جاتا ہوں،
اور وہ اسٹریٹیجیز تعمیر کر پاتا ہوں جو آخرکار کامیابی کی بنیاد بنتی ہیں۔
اس لیے اگر آپ واقعی کچھ نیا بنانا چاہتے ہیں،
تو ایک بار ضرور رکیں،
دنیا کی مصروف زندگی سے تھوڑا دور ہو جائیں،
اور لیمپ کی روشنی میں آ جائیں۔
وہیں سے
آپ کی نئی جہت جنم لے گی۔ ان شاءاللہ✨
ایم صدیقی کے قلم سے
