16/02/2012
::: El llibru, POL UN PERRO REAL, del autor piloñés, Enrique Carballeira, en formatu Ebook y en castellán, caltiénse nos primeros puestos de les llistes de más vendíos na categoría infantil y xuvenil de la tienda Amazon España, llegando nes últimes selmanes en delles ocasiones, al númberu ún, na categoría de 'Cuentos tradicionales y de fades', tantu n'Ebooks como en llibros emprentaos.
El cuentu espublizáu primero nel añu 2006 en formatu papel y n'asturianu por AsturtOOns, llogró nesta versión ellectrónica asitiase amás, la pasada selmana, nel puestu 125 de ventes totales d'Amazon España, que tien nestos momentos más d'un millón de títulos referenciaos en toles categoríes.
Anque les ventes d'Ebooks entá siguen siendo mui perbaxo de los llibros en papel, polo menos n'España, el caltenimientu d'esti títulu nos puestos cimeros de les llistes d'esta tienda, amuesa les posibilidaes que'l llibru ellectrónicu pue tener pa les pequeñes editoriales, que puen llegar a llograr más visibilidá ente los catálogos d'editoriales con muncha más tradición y potencial.
El llibru cuenta les andances de Pol, el perru d'un castiellu medieval que ye la mascota d'un Rei con mui mal xeniu. El protagonista pon tol enfotu en contentar al monarca, un día que tien que dir a un baille d'antroxu.
En dellos meses saldrá a la venta una nueva aventura de Pol.
La editorial AsturtOOns espublizará nes prósimes selmanes un bon númberu de nuevos títulos, tanto n'asturianu como en castellán, d'autores como Inaciu Galán, Cristina Muñiz, Xavier Frías o Enrique Carballeira.
