¿Qué es el sitio web?

DZ Dixital, Lalín (2026)

25/08/2023

🇫🇷 🇮🇹 Chegaron a Silleda as delegacións de Canéjan e Poggio Mirteto

ℹO grupo, formado por 16 persoas de Canéjan (Francia) e 11 de Poggio Mirteto (Italia), chegou a pasada tarde e estará por terras silledenses ata o 31 de agosto visitando diferentes lugares patrimoniais e desfrutando da gastronomía.

🔷Este intercambio cultural está organizado polo Comité de Xestión de Proxectos Europeos de Silleda integrado por colectivos do municipio, en colaboración co Concello.

▶A programación de actividades deste intercambio cultural baséase en dar a coñecer o patrimonio histórico e natural e a gastronomía de Silleda. Tamén se farán roteiros tendo o medioambiente e o rural como protagonistas.

24/08/2023

🏃‍♀️🏃‍♂️Presentación oficial do IV Trail da Carixa

ℹMembros da organización, xunto con patrocinadores, autoridades e directiva da proba, fixeron en Vila de Cruces a presentación oficial do Trail Da Carixa.

👉Dende o GTR-Galaico Trail Run anuncian sorpresas que so se verán o mesmo día da proba.

📌Salientan o elevado ritmo de inscricións no peque-trail, "unha proba con solvencia e que agrada aos máis pequenos". Empezará ás 11:00 da mañana do sábado, 9 de setembro e terá distancias esquío, corzo e xabarín, de 200m, 500m e 3000m, respectivamente.

📌O domingo haberá a xa mítica proba de 20qm con 1000 positivos. Terá saída na praia fluvial da Carixa, transcurrirá pola Fervenza do Toxa e dará paso ao mirador da Carixa.

📸Haberá premio de unha comida para dúas persoas á foto mais orixinal que se faga dende este punto.

📌 O percorrido continuará a carón do castro e ata a praia fluvial pasando pola aldea de Merza.

📌Despois irase polo sendeiro antigo que levaba ao mosteiro de Carboeiro. O chegar a el haberá parte da proba que transcorrerá polo seu interior, antes de realizar o ascenso ao cumio do monte preto da Peneda de Espiñeira con posterior baixada ata cruzar o río Deza.

📌Haberá outra das míticas subidas ata o poboado mineiro, onde se iniciarán os últimos 4 quilómetros a meta de pura baixada, rodeados de soutos e carballeiras ata a chegada de volta a Carixa.

😋Na post-carreira haberá empanada, tortillas, callos, queixos con marmelo, cervexa, auga...

➡A organización agradece aos patrocinadores a súa colaboración. Son Profecon-Profecar, Queixos Anzuxao, Casa Don-Din, Restaurante Esgalla, Bar Galicia, Suministros Pampín, Panadería Altamira, Panadería Mazas, Panadería González, Panaderia Leveda, supermercados Más, Bar Rufino, Bar Refuxio, Librería Susana, Grúas forte, Hitraf, Rg-Bike, Fisioterapia Heia, Restaurante a Robleda, Casa Samartín, Artes Gráficas Pegatinas e Arlit artes Gráficas.

▶️Tamén agradecen ao numeroso batallón de voluntarios "que fan que sexa unha gran fin de semana".

23/08/2023

🌀ADEGA urxe a colaboración cidadá para frear dous parques eólicos en Lalín e O Irixo

ℹ️A asociación ecoloxista ADEGA fai unha chamada urxente á poboación a doar ás campañas de recadación colectivas para recorrer no Tribunal Superior de Xustiza de Galiza os parques eólicos Pico Seco e Valdepereira, proxectados en Lalín e O Irixo.

👉Ambos desafíos teñen por diante tan só unha semana para reunir os fondos necesarios e precisan da colaboración cidadá para acadalos.

💶Para poder contribuír a estes desafíos , ADEGA fixo públicas as seguintes plataformas de crowfunding:
https://tipodesparalos.helpbysc.com/picoseco https://tipodesparalos.helpbysc.com/valdepereira

▶Segundo Adega, os parques Valdepereira e Pico Seco conforman en realidade un único macropolígono eólico fragmentado artificialmente e promovido pola empresa Aerogeneración Galicia, S.L. nos concellos de Lalín e O Irixo. Conxuntamente, os proxectos suman máis de 50 MW de potencia eólica e 13 aeroxeradores que acadan os 180 metros de altura.

➡Inciden en que a envergadura deste macroproxecto eólico e a súa localización supoñen unha especial ameaza para espazos naturais protexidos que están situados ao seu carón, como é o caso da Zona de Especial Conservación (ZEC) Serra do Candán. Ademais, as instalacións racharían abruptamente a conectividade ecolóxica entre varios espazos protexidos próximos, como son tres áreas prioritarias para a protección da avifauna, ou as zonas de Rede Natura Serra do Candán, Serra do Cando, Pena Veidosa, Monte Faro ou Brañas do Xestoso.

🚩Os 13 aeroxeradores impactarían seriamente na avifauna ameazada e protexida incluída no Catálogo Galego de Especies Ameazadas, especialmente na tartaraña cincenta; e tamén na calidade paisaxística de toda a contorna, con efectos sobre varias devesas maduras de alto valor ecolóxico e cultural.

⚠️Por todos estes motivos, a asociación ecoloxista ADEGA procura reunir un total de 6.500 euros por cada un dos parques eólicos para poder interpoñer contra eles recurso contencioso-administrativo no Tribunal Superior de Xustiza de Galiza e solicitar a súa paralización cautelar. Pide para iso un último empurrón co que acadar o obxectivo económico final.

📌Logros da campaña
Nos case tres meses que leva activa, a campaña recadou máis de 127.000 euros, e catro parques eólicos veñen de acadar os fondos necesarios para interpoñer contra eles recurso contencioso-administrativo. Estes logros evidencian o gran rexeitamento social ao modelo eólico impulsado pola Xunta de Galiza e o Goberno español, depredador co territorio e inxusto socialmente. Esta campaña, pola contra, defende unha transición enerxética sustentábel e verdadeiramente xusta.

📲Todos e cada un dos desafíos de ADEGA que están actualmente activos, así como a información de cada un deles sobre a súa evolución na recadación solidaria, poden ser consultados na páxina web principal da campaña : https://tipodesparalos.helpbysc.com/inicio

ADEGA tamén ofrece a posibilidade de destinar as doazóns da campaña “Ti podes paralos!” a un fondo común non adscrito a ningún proxecto eólico en particular, e que servirá de apoio ao conxunto dos desafíos impulsados por ADEGA: https://tipodesparalos.helpbysc.com/fondocomun

Todas as doazóns que se efectúen á campaña “Ti podes paralos!” poderán desgravar até o 80% na declaración da renda.

23/08/2023

✅O Concello de Silleda agradece a solidaridade durante a Festa da Empanada 👏👏👏

▶Dende o Concello de Silleda agradecen a todas as persoas que altruistamente doaron alimentos non perecedoiros durante os festivais de música da Festa da Empanada de Bandeira.

➡Tamén á Asociación Cultural Amigos da Empanada por levar a cabo esta acción solidaria.

👉Membros da directiva entregaron hoxe á concelleira de Benestar, Ángela Troitiño, os alimentos non perecedeiros que se recolleron nos concertos solidarios de Bandeirock e Esmorga Folk, e que se destinarán ao banco de alimentos do programa municipal Silleda Solidaria.

21/08/2023

▶ A Garda Civil detén a catro persoas por roubos en naves industriais en Lalín

👉Detidos 4 homes como supostos autores de 8 delitos de roubos en naves industriais na comarca do Deza.

👉 No grupo identifícase a tres individuos chegados desde Xaén, con vínculos familiares con outro residente no Deza.

👉 O valor dos efectos subtraídos, en especial o cable de cobre, así como os danos producidos poden exceder os 800 000€.

O Equipo de Policía Xudicial da Garda Civil de Lalín inicia o pasado xullo unha investigación debido a varios roubos en naves industriais na comarca do Deza. Analizados os feitos delituosos, así como o “modus operandi” levado a cabo polos supostos responsables, céntrase a investigación nun grupo organizado que se dedica a roubar en naves industriais e anexos.

O obxecto do delito é facerse con cable de cobre, aceiro, aluminio, baterías e mesmo obxectos de pouco valor, utilizando medios rudimentarios ou forza física para romper paredes, portas ou xanelas para entrar ás naves.

No grupo identifícase a tres individuos chegados desde Xaén, con vínculos familiares con outro residente no Deza. Despois de entrar nas naves almacenaban os efectos nun lugar exterior próximo ás mesmas, para despois recollelos, por se eran sorprendidos polas forzas e corpos de seguridade alegaban que era chatarra que atoparon.

O pasado día 14, foron sorprendidos infraganti dous deles mentres roubaban e foron detidos. A través da investigación púidose concretar a súa forma de actuar e identificar aos outros dous compoñentes do grupo.

Todos eles teñen múltiples antecedentes penais por feitos similares, e as súas idades entre os 20 e os 39 anos.

O valor dos efectos subtraídos, en especial o cable de cobre, así como os danos producidos poden exceder os 800 000€.

As dilixencias instruídas foron entregadas no Xulgado de Instrución 1 de Lalín, xunto cos detidos, ingresando dous deles en prisión e os outros dous quedaron en liberdade con cargos.

19/08/2023

📣O campamento de verán da Escola da Banda de Lalín terá lugar do 4 ao 6 de setembro

📲A matrícula pódese formalizar na web da Banda de Lalín ata o 31 de agosto

👉Está aberto a todas as idades e non fai falla experiencia musical

💶 É gratuíto para membros das Bandas ou da Escola, custa 10 euros para fillos e fillas de socios e 15 para persoas alleas á Asociación

19/08/2023

🔴Forno esixe a reapertura inmediata do parque canino e mostra o seu apoio aos donos das mascotas afectados polo peche

ℹA voceira munipal do PSOE, Alba Forno, esixe a reapertura inmediata do parque canino situado nas proximidades da estación de autobuses e traslada o malestar de ducias de usuarios donos de mascotas afectados por un peche que considera "inmoral e inxustificable".

📍A socialista visitou o espazo xunto co concelleiro, Mario López, sinalando que a instalación permanece cerrada desde hai máis dun mes "cando o goberno de Crespo, con nocturnidade e sen dar ningún tipo de explicación, decidiu poñer un candado na porta e quitarlle este servizo á veciñanza".

➡Forno anuncia que "de non rectificarse esta medida, levaremos a situación ao Pleno e iniciaremos novas accións de presión ao goberno do PP". A socialista lementou a "utilización política e demagóxica que o PP fixo deste parque antepoñendo sempre os intereses partidistas aos dos cidadáns".

👉Sinala que se trata dunha "infraestrutura con moito uso que o PP pecha por puro rancor e por pagarlle o favor a unha ducia de veciños que na precampaña de 2019 protestaban polo parque e despois acabaron indo na lista electoral de Crespo". Para o PSOE tamén é inxustificable "pechar un parque que custou máis de 12.000 euros no seu momento para despilfarrar máis de 20.500 nun novo que é máis pequeno e permanece nunhas pésimas condicións".

▶Forno acusou a Crespo de "cinismo" e de "facer o ridículo tomando por parvos aos veciños, xa que xustificou o traslado asegurando que o parque da estación de autobuses, con 1.000 metros cadrados non chegaba e que se precisaba outro máis grande, pero despois un máis pequeno, de 800 metros cadrados". Ademais, explica que a ubicación do Pontiñas "é moito peor que a actual, porque non está céntrica, a xente pola noite non se atreve a ir e as persoas que baixan coas súas mascotas a un espazo verde como o Pontiñas non van coa intención de meter o seu can nun parque, senón que normalmente van coa intención de pasear e darlle un paseo".

🐶Forno insiste en que o PP fai "unha utilización perversa dunha instalación que no seu día se puxo en marcha por iniciativa socialista para dar resposta a unha demanda social" e acusa ao goberno de Crespo de ter "nula sensibilidade cos animais". "Uns defendemos os animais, o seu benestar e a posta en marcha de medidas en favor dos donos das mascotas. Outros presentan mocións contra a Lei de Benestar Animal e defenden que se poida ter un can preso toda a vida, como fixo Avelino Souto no mandato anterior".

18/08/2023

🇦🇷O alcalde de Silleda recibe a José González Costa, vicepresidente do Centro Lalín Agolada Silleda en Bos Aires

ℹO alcalde de Silleda, Manuel Cuiña, recibiu no consistorio a José González Costa, vicepresidente do Centro Lalín Silleda Agolada en Bos Aires, que está a pasar uns días na comarca.

🗣“Para min é todo un motivo de satisfacción recibir a visita dos nosos emigrantes “, indica o alcalde que reiterou o seu agradecemento pola gran acollida que recibiu a delegación silledense que viaxou a Bos Aires en 2017.

▶Tamén José González Costa amosou o seu agradecemento en nome do Centro ao alcalde silledense, que trasladou un agarimoso saúdo aos veciños e veciñas de Silleda residentes na capital arxentina a través do seu vicepresidente, natural do veciño municipio de Lalín.

18/08/2023

🔵O BNG de Lalín demanda a creación dunha ludoteca municipal

ℹ️O Bloque Nacionalista Galego presenta unha moción ao vindeiro pleno para pedir a creación dunha ludoteca municipal.

➡Para o BNG de Lalín "é moi importante a posta en marcha dende o goberno local logo das dunha ludoteca municipal, operativa e equipada con todos os servizos, persoal e dotacións para atender dunha vez por todas as necesidades dos pais e nais de Lalín durante todo o ano de contar cun servizo público de calidade para os seus fillos e fillas". "Non pode pasar un día máis sin que un concello coma Lalín conte con este servizo básico de conciliación", din.

▶️O BNG de Lalín ten defendido a necesidade de que exista en Lalín este servizo municipal dende hai moitos anos e en numerosas ocasións. Consideran que os sucesivos gobernos do PP no concello “teñen esquecido as infraestruturas e actividades para a poboación infantil”. Por iso dende o BNG apostan por un espazo municipal que cubra todas estas carencias e se convirta nun servizo aos pais e nais pero tamén nun ámbito municipal de xogos, aprendizaxe e convivencia dos máis pequenos e pequenas todo o ano, e especialmente nos meses de inverno.

📌Dotada de xogos, obradoiros de distinta temática, área de entretemento educativo, sería un espazo que é perfectamente asumible dende o punto de vista municipal. "Un goberno que gastou máis de máis de 150 millóns de euros no anterior mandato e non sabe dicirnos en qué, malo será que o concello non conte cos recursos precisos para unha ludoteca municipal", din.

🔸Para o BNG "todas as promesas e parches varios que ata o de agora fixo ao respecto deste servizo o goberno de Crespo deixan claro que a PP non lle interesa que Lalín teña unha ludoteca municipal". Pola contra, para o BNG lalinense este é un servizo fundamental, tanto para a poboación infantil lalinense coma para os pais e nais, xa que se trata dun servizo de conciliación fundamental para calquera familia.

🔺Para o BNG de Lalín "é preciso que Lalín conte con todos os servizos públicos que sexan precisos para mellorar a calidade de vida e o benestar dos nosos veciños e veciñas”.

🗣"Non se lle pode pedir á xente que veña vivir a Lalín, que se quede, que se empadroe, e á hora de mellorar a súa calidade de vida con servizos municipais o concello non está. Por iso o BNG lembra que a prioridade do nacionalismo en Lalín é que o noso concello sexa un concello do século XXI, referente en benestar e servizos públicos para a xente", conclúen.

17/08/2023

🔴🚨A Garda Civil solicita colaboración cidadá para localizar a estes mozos por unha violación no Porriño

⚠️Vén de distribuír os seus retratos robot

ℹA Garda Civil de Pontevedra investiga a comisión dun delito contra as persoas na madrugada do día 18 de xullo, durante a celebración das Festas de San Campio, na parroquia de Pontellas do Porriño.

👉Especialistas do Departamento de Identificación do Servizo de Criminalística da Garda Civil confeccionaron os retratos robot dos mozos presuntos autores da agresión.

☎️Por iso solicítase que calquera persoa que poida achegar algún tipo de información ou dato que axude á súa identificación póñase en contacto coa Garda Civil a través do teléfono habilitado para este fin 600 461 444.

⚠️Tamén se poderá achegar información de forma presencial, en calquera Posto da Garda Civil, garantíndose en todo caso a confidencialidade do comunicante.

17/08/2023

🔴O PSOE de Lalín urxe a executar o Plan de Mobilidade Urbana Sostible presentado en 2019

ℹO concelleiro socialista, Mario López, escoitou os veciños da Ronda Leste para coñecer de primeira man a problemática que supón o estacionamento de camións no arcén da estrada que une Lalín e Ourense.

👉O edil indica que é evidente que "hai un risco real para os cidadáns que transitan por esta rúa" e que "de estar executado o PMUS esta problemática xa estaría solucionada para os transeúntes" e tamén para "os camioneiros que non teñen alternativas viables de estacionamento".

▶️Dende o partido socialista advirten que este caso súmase á unha lista, cada vez máis longa, de problemas relacionados coa seguridade vial e a mobilidade no noso concello. López recordou que o Plan de Mobilidade Urbana Sostible é un proxecto do goberno de coalición que o goberno do partido popular "recurtou" e "tentou presentar como propio".

➡️O concelleiro socialista afirmou que catro anos depois de presentar o proxecto "os veciños e veciñas poden constatar que os avances na implementación do PMUS son mínimos" e lamentou que "atoparon un proxecto feito e non foron quen de sacalo adiante".

🗣López denunciou o "abandono total de funcións" neste eido e criticou que non se coñeza ningún avance en medidas que mellorarían a seguridade vial e a mobilidade no noso concello como "o taxi-rural, os camiños escolares seguros, a urbanización da Ronda Leste, no transporte público, etc.".

📌Dende o PSdeG instaron ó goberno local a "poñerse a traballar canto antes" para dar solución aos "problemas reais da cidadanía" neste eido e a abandonar a propaganda como única acción de goberno.

14/08/2023

🏃‍♀️🏃‍♂️O Club Atletismo Deza abre inscricións o 1 de setembro tras colleitar numerosos galardóns a pasada tempada

ℹNa pasada tempada o Club Atletismo Deza colleitou numerosos galardóns en diferentes probas provinciais, galegas e estatais.

👉En canto aos Campionatos Galegos de Clubes conseguiu tres equipos clasificados no Top-10: Séptimo posto sub10 masculino, décimo sub10 feminino e décimo sub12 feminino. Participou como filial no Campionato galego de clubes sub14, sub16 e sub18, logrando o podio de forma individual en todos eles.

📌Por segundo ano consecutivo volveu ao Campionato de España da man do atleta Beltrán Rivas, que acadou unha 7ª posición na categoría sub 14 da combinada C (salto de altura, salto de lonxitude e 80 metros valados).

📌Tamén tivo presenza nos Campionatos Galegos Individuais de inverno con galardóns para Beltrán Rivas, prata en salto de lonxitude e en salto de altura sub14; Xoan Peón, ouro en lanzamento de peso sub10; Marta Lázara, 4ª en lanzamento de xavelina (categoría absoluta) e subcampiona galega sub18; Antía Framiñán, 4ª en lanzamento de peso, e Diego Reboredo, bronce en lanzamento de disco sub16.

▪Nesta proba o Atletismo Deza asistiu como filial co equipo Atlética A Silva no Campionato galego de clubes de probas combinadas, cun cuarto posto absoluto, no que colaborou Marta Lázara.

📌En canto aos Campionatos Galegos Individuais ao aire libre, participou filial en sub 16 e sub 20, con Diego Rebordeo e Marta Lázara, respectivamente, e acadou un segundo posto en lanzamento de xavelina e en lanzamento de disco.

📌Ademais, recolleu o ouro con Marta Lázara en sub18 de probas combinadas; unha prata con Diego Reboredo en lanzamento de disco sub16; outro ouro con Beltrán Rivas en triple salto (con récord galego) e quedou terceiro clasificado en salto de altura sub14; tamén Alan Fernández se proclamou campión galego de salto con pértega sub14; Xoan Peón campión galego de lanzamento de peso e lanzamento de pelota sub10, e Iago Rodriguez subcampión galego de lanzamento de peso sub12.
Competiron como filiais de A Silva e Gimnástica de Pontevedra no Campionato galego de clubs sub14 no que quedaron subcampións.

▶️A nova tempada dará comezo o 11 de setembro e as inscricións abriranse o 1 de setembro. Dende o Club informan que haberá novidades e agardan que a vindeira tempada veña tamén cargada de probas e galardóns, ademais de aumentar o número de atletas.

DZ Dixital

25/08/2023

24/08/2023

23/08/2023

23/08/2023

21/08/2023

19/08/2023

19/08/2023

18/08/2023

18/08/2023

17/08/2023

17/08/2023

14/08/2023

Dirección

Página web

Notificaciones

Contacto La Empresa

Atajos

Compartir

Categoría