29/07/2026
🚨 DETIDA EN VILAGARCÍA TRAS PRESUNTAMENTE AGREDIR E AMEAZAR Á SÚA NAI
Unha muller foi detida na tarde deste martes en Vilagarcía de Arousa como presunta autora dun delito de violencia no ámbito familiar, despois de, supostamente, agredir e ameazar de morte á súa nai.
Segundo a información facilitada pola Policía Local, os feitos producíronse na rúa Gumersindo Nartallo, onde un viandante alertou ao 112 tras escoitar os berros dunha muller que pedía auxilio desde o balcón da súa vivenda.
Á chegada dos axentes, a vítima foi posta a salvo, mentres que a presunta agresora permanecía atrincheirada nunha habitación armada cun coitelo. Tras varios minutos de mediación, os policías lograron que depuxese a súa actitude e procederon á súa detención.
A muller presentaba cortes autoinflixidos nos brazos, polo que foi atendida por unha ambulancia medicalizada do 061 e trasladada ao Hospital do Salnés baixo custodia policial. Unha vez recibiu a alta, foi posta a disposición da Policía Nacional e pasará a disposición xudicial.
A nai presentou a correspondente denuncia acompañada do parte de lesións.
