De Zero - Periódico da Comarca de Ordes

Casa
España
Ordes
De Zero - Periódico da Comarca de Ordes

De Zero. O valor de informar. Mensual gratuíto. Comarca de Ordes. Cerceda, Frades, Mesía, Ordes, Oroso, Tordoia, Trazo.

10/07/2025

Trazo gastará 329.005 euros en Merelle (Xavestre), a través dun plan autonómico.

Executarase a reurbanización "das rúas interiores desta vila do municipio", di a Xunta, dotando a zona de novo mobiliario urbano, ademais de intervir no lavadoiro existente.

A intervención, que ten un prazo de execución de tres meses, está pagada pola Xunta nun 70% e polo Concello nun 30%.

A alcaldesa, Fina Suárez, e a conselleira de Infraestruturas, María M. Allegue, asinaron o convenio da obra este mércores.

10/07/2025

Convenio entre o Concello de Cerceda e a empresa Coventina Renovables, promotora da central hidroeléctrica de bombeo entre o lago das Encrobas e o Xalo.

O acordo vincula o desenvolvemento do proxecto cunha nova infraestrutura de abastecemento para o Xalo, que a compañía pagaría integramente. A captación aproveitaría un depósito do encoro superior. O Concello supervisará o deseño da rede.

Do mesmo xeito, Coventina achegará 50.000 euros ao Concello para diversas accións en beneficio da veciñanza. A empresa comprometeuse tamén a ofrecer formación laboral para que cando menos a cuarta parte do persoal contratado durante a construción da central sexa da zona.

A central reversible está orzamentada en 449 millóns de euros. Gran parte da instalación é subterránea. A súa potencia ronda os 450 MW. Movería un caudal de 135 metros cúbicos por segundo.

O convenio foi asinado por Jesús Berzosa, representante da empresa, e o alcalde, Juan Manuel Rodríguez.

09/07/2025

Incidencia de tráfico. Un camión está detido, ocupando parte dun carril, na estrada de Ordes a Cerceda por Mercurín.

Sitúase logo da recta de Virís e detívose por un problema nunha roda.

Precaución ao circular pola zona.

08/07/2025

A Deputación da Coruña saca a concurso as obras do derradeiro treito que faltaba para completar a Vía Verde entre Cerceda e Santiago.

Son uns tres quilómetros no municipio santiagués entre a ponte sobre o Tambre, onde remata o tramo de Oroso, e o traxecto que xa está feito en Compostela.

As obras licitáronse por uns 280.000 euros. Inclúen o acondicionamento da vía e a reparación de dous camiños na zona. Financianse con fondos Next Generation UE.

O presidente da Deputación, Valentín González Formoso, explicou que se cumprirá así o seu compromiso de completar a Vía Verde, expresado na inauguración do treito da comarca de Ordes en 2022, e lembrou que o proxecto levaba gardado "no caixón" desde 2008 ata a súa chegada ao goberno provincial.

07/07/2025

De novo recoméndase evitar a N-550 nas inmediacións de Sigüeiro, por mor das retencións nos dous sentidos de circulación que ocasionan os traballos de mellora do firme.

07/07/2025

As reservas de sangue están baixas e son moi necesarias. Hoxe hai unha oportunidade para a solidariedade en Ordes.

04/07/2025

Cerceda obtén 250.000 euros da Deputación para renovar o céspede artificial do campo de fútbol do Roxo. É o 80% do custo das obras. O outro 20% será con fondos municipais.

O investimento recóllese nun convenio asinado entre o alcalde, Juan Manuel Rodríguez, e o presidente provincial, Valentín González Formoso.

O campo leva unha década en servizo e segundo as institucións "presenta un acusado desgaste debido ao uso intensivo que se fai das instalacións, de modo que chegou á fin da súa vida útil".

Tamén a base na que se asenta a herba artificial e o sistema de recollida de augas presentan "unha notable deterioración", recoñecen, de modo que agora optan por "céspede artificial de última xeración asentado sobre unha nova base elástica prefabricada".

O prazo de execución que contempla o proxecto é de seis semanas a partir da sinatura da acta de traza de planta. A nova superficie contará cunha garantía mínima de dous anos tras a recepción da obra.

03/07/2025

Retencións de varios quilómetros por mor das obras de mellora da N-550 na contorna de Sigüeiro.

Os atascos prodúcense nos dous sentidos de circulación. Hai uns minutos chegaban ata o desvío a Verdía en Marantes vindo desde Santiago e tamén son considerables vindo desde Ordes.

A recomendación é evitar a N-550 utilizando alternativas como a N-634, a AP-9 ou as estradas de Carballo e de Trazo, entre outras, segundo precise cada usuario.

Esta mañá o Concello de Oroso emitiu un comunicado acusando á Delegación do Goberno de non facilitarlle información sobre os traballos en execución, o que interpreta como un desprezo institucional, ademais de imposibilitar o diálogo para establecer posibles medidas preventivas.

O alcalde, Alex Doval, afirma que se está producindo unha situación de "caos" pola "descoordinación". Reclámalle á Delegación do Goberno un comportamento máis respectuoso co Concello e sobre todo pensar nos prexuízos á poboación.

03/07/2025

O Concello de Ordes promociona xa a Mostra de Cans de Caza, o 27 de xullo no Mesón do Vento.

01/07/2025

Xa está en vigor a obriga de colocar crotais electrónicos a todos os animais bovinos nados do 30 de xuño en diante.

En realidade só leva chip o crotal que se debe colocar na orella esquerda do animal. O da dereita é como os que xa se viñan utilizando.

Os crotais entréganse de balde nas oficinas agrarias. As explotacións teñen que pagar os que rompan ou se perdan. Os electrónicos custan tres euros, o doble que os existentes ata agora, máis gastos de envío.

Segundo os modelos, algúns instrumentos que xa se usaban serven para colocar na orella tanto o crotal de sempre como o electrónico, algo máis ancho. Outros non teñen adaptador e un novo pode custar uns cen euros, segundo fontes do sector.

O uso de chips coa información das reses facilita todos os trámites relacionados coa súa identificación, especialmente en poxas, mercados ou tarefas de saneamento.

01/07/2025

O Concello de Oroso anuncia que denunciará as persoas que causaron destrozos na pista polideportiva de Porto Avieira.

O alcalde, Álex Doval, asegura que teñen identificados os "delincuentes" e que "non é a primeira vez" que sucede.

Unha ringleira de báculos de delimitación foron tirados ao chan nas últimas horas. O Concello anticipa que instalarán cámaras de vixilancia en todo o perímetro para intentar previr o vandalismo.

O rexedor apela á responsabilidade veciñal e ás obrigas cidadás de coidar o mobiliario público como ben común.

30/06/2025

Accidente na N-550 en Oroso. Pasadas as sete da tarde impactaron dous coches. Dúas persoas foron trasladadas ao hospital con feridas. Descoñécese o seu estado de momento.

O sinistro e a atención ás vítimas obrigaron a cortar a estrada, desviando o tráfico polas vías de servizo.

Imaxes: Protección Civil.

Dirección

Rúa Emilia Pardo Bazán, Nº 2
Ordes
15680

Teléfono

+34617917130

Página web

https://issuu.com/dezero_comarcadeordes

Notificaciones

Sé el primero en enterarse y déjanos enviarle un correo electrónico cuando De Zero - Periódico da Comarca de Ordes publique noticias y promociones. Su dirección de correo electrónico no se utilizará para ningún otro fin, y puede darse de baja en cualquier momento.