De Zero - Periódico da Comarca de Ordes

14/01/2026

A organización das festas en Ordes presenta a súa proposta para o entroido.

14/01/2026

A escola infantil municipal da Ulloa, en Sigüeiro (Oroso), recibirá un investimento de 150.000 euros.

Foi asinado esta mañá no Concello pola conselleira de Política Social, Fabiola García, e polo alcalde, Álex Doval, que despois visitaron o propio centro. Actos nos que tamén participou o xerente do Consorcio Galego de Servizos de Igualdade e Benestar, Perfecto Rodríguez.

Os traballos afectarán tanto ao interior como ao exterior da escola e consistirán na reforma da instalación eléctrica, co fin de aumentar a eficiencia enerxética e mellorar a iluminación, e na renovación dos elementos de carpintería, como as portas e as ventas. Tamén se intervirá nas aulas, pintando e cambiando mobiliario e equipamento.

Ademais, a achega da Xunta dotará o centro dun novo parque infantil nas inmediacións, cunha área de xogos renovada e cun terreo adaptado e con zonas verdes.

14/01/2026

Xa se pode obter o Abono Único do Ministerio de Transportes, con viaxes sen límite en autobuses de liñas estatais e trens de Cercanías ou de Media Distancia.

Custa sesenta euros ao mes, que quedan en trinta para as persoas nadas do 1 de xaneiro de 2000 en diante.

Toda a información:
https://www.transportes.gob.es/transporte-terrestre/abono-unico

14/01/2026

Intento de estafa suplantando a Seguridade Social.

Está a circular unha carta falsa que trata de parecer enviada pola Tesourería Xeral da Seguridade Social (TGSS).

O texto pide datos persoais e bancarios con escusas como un “cambio de datos” ou un suposto “ataque informático” para xustificar a solicitude do DNI e extractos bancarios.

O Ministerio pide non facer caso da carta a quen a reciba porque é unha fraude.

De ningún modo hai que facilitar ningún dato e, de acordo coa recomendación do Goberno de España, hai que procurar prestar atención a persoas que, por confianza ou inxenuidade, sexan propensas a caer na trampa para que estean en alerta.

13/01/2026

Ordes ten activado o proceso para contratar varias intervencións viarias na parroquia de Montaos. O Concello licitou proxectos orzamentados en case 390.000 euros, dentro do POS+Adicional 2025 impulsado pola Deputación da Coruña.

Ata o 19 de xaneiro poderanse presentar ofertas para realizar as obras, con mellora no asfalto e acondicionamento de varias vías.

En concreto, son as pistas que van dende Queis por detrás da igrexa ata o campo de fútbol de Montaos (870 metros de
lonxitude), a de acceso á Espiñeira (2 treitos de 480 x 5,5 m e 175 x 5 m), a
que vai da Chan á N-550 (110 x 4 m), a de servizo na N-550 (55 x 4 m), así como outra na Condomiña (2 treitos de 48 x 4,8 m e 145 x 3,5 m).

Tamén se contemplan intervencións nos camiños da Porta dos Condes a Piñeiro (3 treitos de 85 x 5,5 m, 20 x 4,5 m e 385 x 3 m) e no que vai dende o interior de Fosado á estación (2 treitos de 145x4 m e 100x5,9 m).

12/01/2026

Esfaragúllase o pacto entre as farmacias da vila de Ordes que desde hai anos permitía que unha das tres estivese sempre de garda, en rotación semanal.

No cambio de responsable, unha delas desvinculouse do acordo. A raíz de aí, o Colexio de Farmacéuticos estableceu que sexan as cinco do municipio -as tres na vila e as do Mesón do Vento e Montaos- as que roten nas quendas, de venres a venres.

Deste xeito, en dúas de cada cinco semanas a capital municipal queda sen farmacia de garda. Este vindeiro venres a partir das dez da noite xa sucederá, coa apertura da do Mesón.

Sen embargo, os cambios poderían non quedar aí, pois un recurso ante a Xunta da farmacia desconforme contra a resolución do Colexio podería levar a que entren na rotación outras tres farmacias, de fóra do concello.

Serían as de Abellá (Frades), Viaño Pequeno (Trazo) e Visantoña (Mesía), que son as tres pertencentes a municipios que teñen como referencia o Punto de Atención Continuada de Ordes e están a como moito os quince quilómetros e os quince minutos do PAC que fixa a normativa legal.

De momento non hai data para que a Xunta decida, pero fontes coñecedoras da situación estiman que o máis probable é que acceda a incluír as oito farmacias, dado que sería plenamente legal e encaixa con outros casos análogos noutras zonas de Galicia.

Se finalmente sucede, o periplo nocturno de pacientes do PAC non sería só polas farmacias do termo de Ordes, senón nas outras da comarca. Poderían darse casos como, por poñer un, pacientes de Trazo que acudan ao PAC a Ordes e terían que ir polo medicamento a Visantoña, cruzando case toda a comarca.

Imaxe de arquivo.

12/01/2026

A consulta de Pediatría do centro de saúde de Ordes está repleta de pingueiras e presenta unha situación de insalubridade e risco laboral cada vez que chove.

Fontes coñecedoras dos feitos explican que leva sucedendo polo menos catorce anos, sen que a Xunta atenda con eficacia as reclamacións de arranxo. "Ninguén parece facer nada", quéixanse.

Nunha xornada coma a de hoxe, algunha consulta do centro precisa seis ou sete caldeiros para evitar que o chan se molle demasiado.

09/01/2026

O Concello de Trazo estrea un vehículo adaptado adquirido con fondos procedentes da Xunta, do Plan de Transformación e Resiliencia do Goberno de España e da Unión Europea.

Hoxe acudiu a presentalo a conselleira de Política Social, Fabiola García. De todos os xeitos, non entrará en funcionamento de momento. "En breve", aclararon, estará á disposición de persoas con dificultades de mobilidade, tanto por idade como por discapacidade.

A conselleira, acompañada pola alcaldesa, Fina Suárez, asegurou que o vehículo pretende “garantir a igualdade de oportunidades e a inclusión social, evitando un dos males do noso tempo: a soidade non desexada", relatou.

08/01/2026

Unha persoa perdeu onte unha cantidade de diñeiro en Ordes, nalgún punto do itinerario que figura na imaxe. Se alguén atopou o diñeiro, prégase que o deposite nas dependencias da Policía Local.

07/01/2026

Unha lectora pídenos divulgar esta información sobre as axudas de 100 euros do Ministerio de Sanidad para adquirir lentes e lentes de contacto, pois considera que hai poboación que lle pode interesar pero descoñece o plan.

Todos os datos:

Plan Veo: ayuda para gafas y lentillas, Ministerio de Sanidad

06/01/2026

Resultados do sorteo de lotaría celebrado este mediodía.

06/01/2026

A industria Losán, cunha planta situada na zona limítrofe de Curtis, Mesía e Vilasantar, volve atravesar serias dificultades. O persoal ten nóminas e extras sen cobrar, non obtivo actualización do IPC no ano que rematou e sobre todo ve con total incertidume o futuro.

Nas últimas horas, o Pleno do Concello de Curtis, por unanimidade, demandou unja solución para a empresa na que se implique a Xunta e o Goberno de España. Reivindican a activación total da empresa, o pagamento do que lle adebeda ao persoal e o mantemento de todos os postos.

Losán xa recibira 35 millóns de euros públicos como rescate en 2021. Agora volve atravesar problemas financeiros e están en dúbida uns douscentos empregos directos.

O Concello de Curtis defende a fábrica como estratéxica para a zona, dada a relevancia do sector foresral.

Na imaxe, protesta da representación dos traballadores hai uns días na Coruña.