18/09/2025
A Cidade da Cultura de Galicia foi escenario hoxe da cesión dunhas misivas inéditas de Manuel Curros Enríquez. Trátase de 32 cartas manuscritas que o escritor lle enviou ao seu grande amigo José Ojea entre xuño de 1904 e xaneiro de 1908, tres meses antes de morrer na Habana.
De aí que este tesouro constitúa o "Derradeiro epistolario" do autor do Rexurdimento. Mais o valor do achado non está tanto no momento temporal como no contido. Así o indicou o profesor Alonso Montero, quen destacou "a verdade que transpiran estas páxinas dirixidas a un amigo de plena confianza". De aí que o “carácter dogmático e severo do autor” se vexa atenuado nesta súa relación de profundo afecto para amosarnos “o Curros máis humano e afectuoso”.
No acto participaron tamén Ana Isabel Vázquez, directora xerente da Fundación Cidade da Cultura; Valentín García Gómez, secretario xeral da Lingua; a doadora Emilia García Paadín e o conselleiro de Cultura, José López Campos, quen recoñeceu ”o valor deste epistolario dunha das grandes figuras da literatura e o pensamento galego”, que está previsto pase a formar parte “do legado histórico que temos a responsabilidade de salvagardar desde a Xunta de Galicia para as seguintes xeracións de cara a coñecer e afondar na nosa identidade e nas persoas que contribuíron a forxala”.
