Editorial Hugin e Munin

09/10/2026

Acaban de chegar da imprenta as dúas novidades de comezos do outono.

Por unha banda, publicamos A torre á beira do río, do autor grego Konstantinos Chatzopoulos, unha novela naturalista de comezos do século XX traducida do grego por Alfonso Blanco. É a primeira vez que esta obra se traduce a unha lingua peninsular. Ambientada no mundo rural de Etolia-Acarnania, retrata a decadencia dunha familia a través da historia de tres irmás que viven illadas nunha vella torre. A pobreza, o orgullo, os prexuízos e a obsesión polos cartos van minando a súa autonomía, nunha narración que combina a observación social cunha intensa dimensión psicolóxica. A crítica ás estruturas patriarcais e económicas da Grecia da época, así como os suxestivos paralelismos co ruralismo literario galego de Otero Pedrayo ou de Risco, dotan esta lectura de especial interese.

Pola outra banda, incorporamos ao catálogo Carmilla, o célebre relato gótico do autor irlandés Joseph Sheridan Le Fanu, traducido do orixinal inglés por Alejandro Tobar. Trátase dun clásico da literatura vampírica que precedeu en máis de dúas décadas o Drácula de Stoker. A historia de Laura, unha moza que vive co seu pai nun castelo de Estiria, dá un xiro inquietante cando unha descoñecida chamada Carmilla pasa a residir con eles tras un accidente. Entre a fascinación e o medo, Le Fanu constrúe unha atmosfera ambigua na que o vampirismo se mestura co desexo lésbico, co pano de fondo do tránsito á madureza. Amais do seu enorme valor como relato sobrenatural, a obra ofrece unha perturbadora reflexión sobre o desexo.

07/10/2026

05/10/2026

O domingo 11 de outubro, ás 12 horas na praza da Quintana de Santiago de Compostela, celebramos os quince primeiros anos de existencia de Hugin e Munin cun faladoiro arredor do catálogo e, dun xeito algo máis amplo, do lugar que ocupa a literatura traducida no sistema literario galego.

Que obras chegamos a coñecer grazas á tradución? Que tradicións literarias están ben representadas e cales seguen pendentes? Que papel desempeñan os profesionais da tradución e as empresas especializadas na formación do corpus literario galego? Que visibilidade ten a literatura traducida entre o lectorado, a crítica e o ámbito académico? De que maneira pode contribuír a tradución á mellora da literatura escrita orixinalmente en galego?

Manuel Arca, María López Sández e María Reimóndez conversarán, coa moderación de Alejandro Tobar, sobre diversos aspectos das obras publicadas por Hugin e Munin ao longo destes quince anos, e non só. O punto de partida será o catálogo, con case 150 títulos: cun repaso dos acertos, mais tamén das eivas, as lagoas e certos campos insuficientemente explorados. Haberá espazo para debates máis espiñentos, como a recorrencia ás traducións indirectas, a recepción crítica da narrativa traducida ou a relación entre tradución literaria e ensino universitario.

Aberto a todo tipo de público.

05/10/2026

"Dez libros para outubro de 2026". Biosbardia

02/10/2026

Co gallo do 15 aniversario da editorial, repartiremos un novo caderno de agasallo entre subscritores e compradores en SELIC, que abre as súas portas hoxe venres 2 de outubro ás 16:30 horas.

23/09/2026

Unha muller perdida, novela publicada orixinalmente en lingua inglesa no ano 1923, ten como protagonista a suxestiva Marian Forrester, que Willa Cather, gañadora dun premio Pulitzer, presenta a través da voz narrativa e da mirada fascinada e esperta de Niel Herbert dende cativo.

A historia, enriquecida cun fato de personaxes perfilados con habelencia –como o capitán Forrester, o matrimonio Ogden ou o avogado Ivy Peters–, está ambientada en Sweet Water, unha localidade ficticia que, coma noutras obras de Cather, se enmarca nos tempos do gran desenvolvemento do Vello Oeste americano.

A prosa sinxela, nostálxica e evocadora da escritora permite penetrar nunha historia salientable en canto ao tratamento do paso do tempo ou á súa capacidade para transmitir a beleza e a decadencia dun estilo de vida refinado que esmorece de forma inexorable. Tamén, no que se refire a Niel Herbert, contén moitos dos trazos característicos da novela de formación, entre outros a decepción que a miúdo acompaña a entrada na madureza.

Traducida por Antía Veres Xesto e galardoada co XVIII Premio Plácido Castro de Tradución.

14/09/2026

O mono Xouth foi a última novela grega que publicamos (en 2024). O vindeiro mes de outubro chegará a seguinte tradución dende esa lingua. Será xa a novena peza importada da literatura helena.

Esta novela, cuxa tradución ao galego é a primeira a unha lingua romance, considérase pioneira da literatura fantástica escrita en grego moderno. Como adianta o título, céntrase nas peripecias de Xouth, un enigmático escritor e viaxeiro alemán que acabou metamorfoseado nun orangután e posto ao servizo dun home grego europeizado que finxe pertencer a unha nobre estirpe.

As peculiaridades do simio a canda sucesivos amos, a crónica satírica das viaxes e o constante intercambio cultural entre Oriente e Occidente sérvenlle ao autor, o irónico e irascible Iakovos Pitsipios, para cuestionar, fuxindo do historicismo e achegándose á picaresca, a autenticidade e a identidade da Grecia posrevolucionaria, inmersa nun clima de constantes cambios sociais e onde a presión de diversas instancias europeas se entendía como opresiva por parte de destacados sectores. Neste sentido, o autor tiña moi presente o termo «hipereuropeización», acabado de cuñar, e consideraba o gusto polos costumes estranxeiros unha sorte de autoodio por parte do pobo grego. Tampouco non era alleo a outro termo irmán: «hiperhelenización».

A través dunha hábil mestura de fantasía e cotiandade, esta obra –inacabada pero autoconclusiva– supón non só unha potente crítica dos costumes da época, senón incluso unha emenda ao concepto de civilización, presentada en forma de alegoría a varias voces; entre elas, sobre todo, a do mono.

Traducida por Alfonso Blanco.

30/08/2026

Da entrevista de Teresa Constenla a Gonçalo M. Tavares para El País Semanal {ES}

29/08/2026

, de Leïla Slimani. Galardoada co Premio Goncourt 2016, trátase dunha historia a medio camiño entre a fábula tráxica e o thriller psicolóxico, inspirada nun caso real e que destila un suspense hipnótico. Traducida do francés por Isabel Soto.